Robert Garrett (Lichtathlet)

Robert S. Garrett (* 24. Mai 1875 in’n Baltimore County, Maryland; † 25. April 1961) weer en US-amerikaanschen Lichtathlet un Tautrecker.

Garrett 1896 bi’n Diskusworp

Sport-Loopbahn ännern

Garrett hett an de 1. Olympischen Sommerspelen vun de Neetiet deelnahmen, de 1896 in Athen utdragen weern. Dor hett he veer Medaillen wunnen, neemlich Gold in’t Kugelstöten un in’n Diskusworp un Sülver in’n Hoochsprung un in’n Wietsprung. Mit disse Leistungen weer Garrett de sösstbeste vun all Deelnehmers un de beste Athlet ut de US-amerikaanschen Mannschop. 1897 is Garrett de IC4A Kugelstöötmeester worrn.

Ok veer Johren na Athen weer he in Paris bi de 2. Olympischen Sommerspelen wedder an’n Start un hett nochmol twee Bronzemedaillen wunnen, een in’n Kugelstöten un de annere bi’n Standdreesprung. As Liddmaat vun de Mannschop hett he butendem an’n Schaukamp in’t Tautrecken deelnahmen. Ok för’n Diskusworp weer he wedder anmellt. He hett an den Wettkamp aver nich deelnahmen, vunwegen dat de an en Sünndag utdragen warrn schüll, wat Garrett wegen sien christlichen Gloven nich maken wull.

Garrett stamm ut en rieke Bankiersfamilie un hett an de Princeton University studeert. He wies sik as utermatig goot in de Lichtathletik un is Mannschopskaptein vun de Lichtathletik-Mannschop an de Universität worrn, wiel he in de Ünner- un Böverstoop weer. Vör allen weer Garrett en Kugelstöter, man he hett ok an de Sprungwettstrieden deelnahmen. För de Olympschen Spelen in Athen harr em de Professer William Milligan Sloane vörslahn, ok mol den Diskusworp to versöken, de to de Tiet in de USA noch nich bekannt weer.

Se hebbt sik denn mit Wetenschopplers tosamendoon, üm en Teken vun en Diskus to kriegen. Garrett güng dorna na en Smitt, üm sik en Diskus maken to laten. De fardige Diskus wöög ruchweg fief Kilogramm, un dat weer so goot as nich mööglich, em to smieten. Also hett Garrett de Idee an den Wettstried deeltonehmen eerstmol wedder opgeven. As Söhn vun en rieke Familie hett he sien Överfohrt na Athen sülvst betahlt un noch dorto vun dree vun sien Studienkameraden (Francis Lane, Drüdder över 100 m; Herbert Jamison, Tweeter över 400 m; Albert Tyler, Tweeter bi’n Staffhoochsprung). In Athen hett he markt, dat de Diskus dor blots twee Kilogramm wegen de, also hett he beslaten, ut Spaaß doch an den Wettkamp deeltonehmen.

De greekschen Gegners smeten all na de överleverte klass’sche Technik, wogegen Garrett mit en Dreihtechnik arbeiten de, üm de Snelligkeit vun’n Diskus bi’t Afsmieten grötter to maken. Sien eersten beiden Worpen sehn teemlich tuntig ut: De Diskus is dör de Luft eiert un flöög blots knapp an de Tokiekers vörbi. Bi sien letzten Versöök aver is de Diskus 19 cm wieter seilt as de vun den besten greekschen Deelnehmer Panagiotis Paraskevopoulos. De hett sik in sien letzten Dörgang noch eenmol verbetern künnt, bleev dorbi aver liekers achter Garrett torüch.

De Tiet na’t Studium ännern

As he mit sien Studium fardig weer, is Garrett Bankier worrn un hett verschedene Wetenschopsrebeden finanziell ünnerstütt, as de Archäologie un de Geschichtswetenschop. So hett he holpen bi de Organisatschoon vun en archäoloogsche Expeditschoon na Syrien, de vun 1899 bit 1900 vun Howard Crosby Butler leidt worrn is. As sien Hobby sammel he Manuskripten ut dat Middelöller un ut de Renaissance. Sien Sammlung vun över 10.000 Manuskripten hett he 1942 de Princeton University överlaten.

Weblenk ännern