Rockville (Belize)

Rockville is en Oort in’n Distrikt Belize von dat Land Belize. De Oort höört to de Gemeen Hattieville.

Geografie

De Oort liggt twee Kilometer af von’n Sibun River. Op dat annere Över von’n Sibun liggt de Peccary-Hills-Natschonaalpark.

De Naveröörd sünd Hattieville, Tropical Park un Freetown Sibun in’n Noordoosten, Gracie Rock in’n Süden, La Democracia un Mahogany Heights in’n Süüdwesten, Jih Chan in’n Westen un Big Falls in’n Noordwesten.

Historie

De Naam von’n Oort kummt dorvon, dat dat von Belize-Stadt ut keken een von de eersten Steden is, an de de Kalksteen vördaag kummt, de in en groten Deel von Belize in’n Ünnergrund liggt.

Üm 1950 rüm hett in Rockville en Fängnis för apenen Vollzug apenmaakt. Nadem dat Fängnis för apenen Vollzug opgeven worrn is, is dor 1979 mit dat Rockview Mental Health Center en Inrichtung för Fungene mit psycholoogsche Problemen inricht worrn. Gliektiedig is ok dat Princess Royal Youth Hostel na Rockville ümtagen, wat en Inrichtung för junge Lüüd is, de straaffällig worrn sünd. De Inrichtung weer vörher in Belize-Stadt ünnerbrocht. An’n 29. November 2015 sünd bi en Brand in dat Princess Royal Youth Hostel dree Deerns doodbleven. Dat Rockview Mental Health Center hett dichtmaakt, wieldes dat Princess Royal Youth Hostel noch jümmer in Bedriev is.

Weertschop un Infrastruktur

Dat Ünnernehmen National Aggregates Ltd. bedrifft en Kalksteen-Steenkuhl twüschen Rockville un Gracie Rock.

Verkehr

De Oort liggt an’n George Price Highway, de in’n Noordoosten över Hattieville na Belize-Stadt löppt un in’n Süüdwesten na Belmopan, San Ignacio/Santa Elena un Benque Viejo. In’n Süden föhrt en lüttjere Straat na Gracie Rock un an’n Sibun River.