Romancing the Stone
Romancing the Stone (op Platt so veel as „Den Steen ümwarven“; dt. Titel: Auf der Jagd nach dem grünen Diamanten) is en US-amerikaansche Actionkummedie ut dat Johr 1984. Speelbaas weer Robert Zemeckis, in de Hööftrullen weern Kathleen Turner, Michael Douglas, de ok de Produzent weer, un Danny DeVito to sehn. Se all hebbt se ok in The Jewel of the Nile wedder mitspeelt, de an dissen Film anslutt.
| Filmdaten | |
|---|---|
| Plattdüütsch Titel: | — |
| Originaltitel: | Romancing the Stone |
| Düütsch Titel: | Auf der Jagd nach dem grünen Diamanten |
| Produkschoonsland: | USA |
| Johr vun’t Rutkamen: | 1984 |
| Läng: | 102 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Robert Zemeckis |
| Dreihbook: | Diane Thomas Lem Dobbs Howard Franklin Treva Silverman |
| Produkschoon: | Michael Douglas |
| Musik: | Alan Silvestri |
| Kamera: | Dean Cundey Álex Phillips Jr. |
| Snitt: | Donn Cambern Frank Morriss |
| Dorstellers | |
| |
Inholt
ännernJoan Wilder is en spoodrieke Schrieversche, de in New York City leevt. Jüst vör korte Tiet is ehr Swager ümbröcht worrn, as se op eenmol Post von em ut Kolumbien kriegen deit. Dat duert nich lang, dor warrt se vun ehr Süster anropen, de roovt worrn is un nu bedrauht warrt. Ehr Rövers, Ira un Ralph, wüllt ehr blots freelaten, wenn se dorför de Schatzkoort kriegt, de Joan jüst mit de Post tokamen is.
Also flüggt de Schrieversche na Kolumbien, üm to doon as ehr opdragen worrn is. Man se warrt in den verkehrten Bus lockt un kummt gau in Nööt. De Aventürer Jack T. Colton warrt dorin verwickelt un helpt ehr ut de Klemm. Joan hannelt mit em en Honorar ut un he seggt to, ehr wieter to helpen. De beiden verstekt sik vör de Rövers un ok vör den Geheemdeenst-Offizeer Zolo, de ok achter de Koort ran is. Ünnerwegens kriegt se unvermodens Help in en Dörp, woneem sik en Smuggler as en groten Anhanger vun de Schrieversche rutstellt.
Mit Help vun de Koort finnt Joan un Colton en groten Smaragd, de den Naam El Corazon driggt. Üm Joans Süster free to kriegen, versökt se, de Koort nu an de Rövers to övergeven. Man, de hebbt in de Twüschentiet al Wind dorvun kregen, dat de Eddelsteen al funnen worrn is. Un so kummt dat in en Fasten in Cartagena, in de Ira Krokodilen tücht, to’n Kamp üm den Steen. Zolo bringt em an sik, man jüst in den Ogenblick warrt em vun een vun de Krokodilen de Hand afbeten. Colton helpt toeerst Joan, de bedrauht warrt, dorna jaagt he achter dat Reptil ran
De Film geiht mit en Happy End in New York to Enn: Joan Wilder hett er Beleevnissen in en Bestseller verarbeit, Colton driggt Stevel ut de Huut vun dat Krokodil, he künn den Steen verköpen un sik dormit sien Droom – en Seilboot – wohr maken.
Kritik
ännernRoger Ebert hett den Film in de Chicago Sun-Times vun’n 1. Januar 1984 mit den Film Indiana Jones and the Raiders of the Lost Ark vergleken. He hett den Film dorför loovt, dat de Klischees, in de en starken Mann för en swacke Fro sorgt, hier ümgahn worrn sünd.
Utteken
ännernDe Film hett fief Utteken kregen und weer för wietere drei Filmpriesen vörslahn, ünner annern ok för den Oscar in de Kategorie Best Snitt. Wunnen hett he:
- 1984: den LAFCA Award in de Kategorie Beste Schauspelersche för Kathleen Turner.
- 1985: den Golden Globe in de Kategorie Best Film – Kummedie oder Musical.
- 1985: den Golden Globe in de Kategorie Beste Hööftdorstellersche – Kummedie oder Musical för Kathleen Turner.
- 1985: den Stuntman Award in de Kategorie Spektakulärst Stunt in en Speelfilm för Vince Deadrick Jr. un Terry Leonard.
- 1985: den Golden Reel Award in de Kategorie Best Toonsnitt.
Anners wat
ännern- De Film hett weltwiet ruchweg 114 Millionen US-Dollar inspeelt un weer dormit in de Mitt vun de 1980er Johren ünner de spoodrieksten Filmen.
- Mit The Jewel of the Nile is de Geschicht 1985 wieterföhrt worrn. In den Film hebbt all dree Hööftdorstellers wedder mitspeelt.
Weblenken
ännern- Romancing the Stone in de Internet Movie Database (engelsch)
- Kritik op Rotten Tomatoes