Rudolph I. „Rudy“ Castillo (* 28. Dezember 1927 in Belize-Stadt; † 19. März 2010 in Belmopan) weer en Beamten un Diplomaat ut Belize.

Castillo is 1927 as Söhn von Marcelina un Justo Sabas Castillo in Belize-Stadt (to de Tied Brietsch-Honduras) boren.[1] He güng in Belize-Stadt op dat St. John’s College.[1] Von 1946 bet 1952 weer he Schoolmeester an dat St. John’s College un is denn to’n Rundfunk wesselt.[1][2] He hett in Grootbritannien Kurse bi de British Broadcasting Corporation (1952) un dat Central Office of Information (1959) beleggt.[1]

Castillo hett von 1952 af an lange Tied för Radio Belize arbeidt un weer Ansegger (1952–1955), Programmdirekter (1955–1959) un Information Officer (1959–1962).[3][1][2] He weer ok Beamten för de Regeren von Belize un harr ünner annern de Ämter as Chief Broadcasting Officer, Chief Information Officer (siet 1962), Sekretär in dat Ministerium för Bildung (1976–1980), Kabinettssekretär (1980–1983) un Chief of Protocol (1981–1983).[3][1] He weer för de Regeren von Belize Mitgrünner un Rutgever von de Tiedschrift The New Belize, de all dree Maand rutkeem.[1] Von 1963 bet 1964 weer he Viez-Präsident von de Holy Redeemer Credit Union.[1] För Reuters hett he von 1952 bet 1975 as Korrespondent arbeidt.[2]

Castillo harr na de Unafhängigkeit von Belize von’n 20. Mai 1983 bet 1985 as Hoochkommissar dat Leid över de Hoge Kommission von Belize in London. Tosätzlich is he in’n Juni 1983 as Baadschopper in Frankriek akkrediteert worrn, in’n Oktober 1983 bi de Europääschen Gemeenschoppen un de UNESCO, in’n November 1983 in Düütschland un in’n Dezember 1983 bi’n Hilligen Stohl.[2] Toletzt weer he von 1990 af an de eerste Hoochkommissar von Belize in Kanada mit Seet in Ottawa.[2]

Nadem Castillo in’n Februar 2010 stört is, müss he opereert warrn.[3] Dör Komplikatschonen bi de Operatschoon is he in en Koma fullen un bet to sien Dood nich mehr opwaakt.[3] He is an’n 19. März 2010 in Belmopan doodbleven.[3] De Truurfier weer an’n 22. März in de Our Lady of Guadalupe Co-Cathedral in Belmopan.[3]

Castillo hett an’n 4. Oktober 1947 Gwendolyn Frances freet.[3][1] De beiden harrn söven Kinner.[3][1]

Ehren ännern

Castillo weer Member of the Order of the British Empire.

Warken ännern

  • Profile of the Rt. Hon. George Price - Man of the People. Belmopan 2002

Footnoten ännern

  1. a b c d e f g h i j Personalities Caribbean. Personalities Limited, 1973, Sied 233
  2. a b c d e The International Year Book and Statesmen’s Who’s Who. Burke's Peerage Limited, 1992, Sied 105
  3. a b c d e f g h Broadcasting pioneer, Rudy Castillo, passes away, Channel 5 Belize an’n 19. März 2010