Santa Elena (Islas de la Bahía)

Santa Elena (engelsch St. Helene) is en Oort (Aldea) op dat Eiland Roatán (Islas de la Bahía) in dat Municipio José Santos Guardiola, Departamento Islas de la Bahía, Honduras. Dor leevt üm un bi 1500 Lüüd.

Santa Elena in dat Municipio José Santos Guardiola

Geografie

Santa Elena liggt in’n Oosten von Roatán an de Küst von de Karibische See. Vör de Küst liggt dat Rose Cay. De Isla Morat un Barbareta doot ok dichtbi liggen.

De Oort is dör en dree Kilometer langen sieden Afsnidd, de mit Mangrovenholt bewussen is, von’n Rest von Roatán afdeelt. Dör düssen Afsnidd löppt ok en lütten Kanaal, över den een per Boot na de annere Sied von Roatán kamen kann. Bevör de Gördel ut Mangrovenholt sik billt hett, weer dat Rebeed von Santa Elena en egenstännig Eiland. Deelwies warrt dat Rebeed ok vondaag noch as Eiland ankeken un Isla Santa Elena nöömt.

Weertschop un Infrastruktur

De Minschen in Santa Elena leevt vör allen von de Fischeree.

De Oort weer bet 2019 nich zentraal mit elektrischen Stroom versorgt, ofschoonst dat enkelte private Anlagen geven hett. Bet Mai 2019 hett de Roatán Electric Company (RECO) den Oort mit en 4,4 Kilometer lang Ünnerwater-Kabel an dat Stroomnett anslaten.

Verkehr

Dat gifft kene Straten, de von Santa Elena na annere Öörd föhrt. Dat Mangrovenholt in’n Westen trennt Santa Elena von’n Rest von Roatán. De Verkehr na buten löppt kumplett per Boot. Liekers gifft dat en poor Weeg twüschen de verscheden Delen von’n Oort Santa Elena. Bi Coxen Hole (35 km in’n Süüdwesten) liggt de Juan Manuel Gálvez International Airport.