Slichten Schietkleier

De Slichte Schietkleier (Geotrupes stercorarius) is en Käver ut de Familie vun de Schietkleiers (Geotrupidae). Geotrupes heet Eerdbohrer (vun ooldgr. gē „Eer“ un trupes, de latiensche Form vun ooldgr. trypetēs „Bohrer“); stercorarius is „een, de utmesten deit“.

Systematik

Stamm:	Liddfööt (Arthopoda)
Ünnerstamm:	Tracheendeerter (Tracheata)
Böverklass:	Sessfööt (Hexapoda)
Klass:	Insekten (Insecta)
Ünnerklass:	Fleeginsekten (Pterygota)
Böverornen:	Neeflunken (Neoptera)
Ornen:	Kävers (Coleoptera)
Ünnerornen:	Polyphaga
Böverfamilie:	Scarabaeoidea
Familie:	Schietkleiers (Geotrupidae)
Oort:	Slichten Schietkleier (Geotrupes stercorarius)

Wetenschoplich Naam

Geotrupes stercorarius

Linnaeus, 1758

Kennteken

De Kävers weert 16 bit 25 Millimeters lang. Se sünd swatt bit hen to swattblau, de Unnersieten is blau, blauvigelett oder blaugröön. An de Deekflunken sitt en poor spiddelige Haare an.

Wo se vorkamen doot

Slichte Schietkleiers leevt in Europa un Asien, in'n Norden bit na Lappland hen. In Kanada sünd se insleept wurrn. To finnen sünd se vun dat platte Land bit hooch to 2.000 Meters in'e Bargen, sunnerlich in'n Woold.

Wie se leven doot

De Imagines fleegt an'n Avend mit düütlichen Brummen knapp over de Eer langs. Mit dat Achterlief könnt se Musik maken, just as Haupeer un Heemken. In't Vörjohr paart sik Heken un Seken un buddelt denn achternah en Gang in'e Eer. De is bi 40 cm lang, mit allerhand Siedelgänge doran, de loopt all in en Kamer ut. In düsse Kamern warrt en Schietkogel inleggt mit een Ei dor an dat achterste Enne in. Dornah warrt de Gang mit Schiete vull maakt un tolest mit Lehm afslaten. Dat duert een Johr un de Budden sünd utwussen un könnt sik verpoppen.

Literatur

Karl Wilhelm Harde, František Severa, Edwin Möhn: Der Kosmos Käferführer: Die mitteleuropäischen Käfer. Franckh-Kosmos Verlags-GmbH & Co, Stuttgart 2000, ISBN 3-440-06959-1
Jiři Zahradnik, Irmgard Jung, Dieter Jung et al.: Käfer Mittel- und Nordwesteuroēpas. Parey, Berlin 1985, ISBN 3-490-27118-1

Weblenken

Slichten Schietkleier. Mehr Biller, Videos oder Audiodateien to’t Thema gifft dat bi Wikimedia Commons.