Soltdoorsvörstadt

De Soltdoorsvörstadt (hoochdüütsch Salztorsvorstadt) is en Stadtdeel von de Stadt Stood in’n Landkreis Stood, Neddersassen.

Luftbild von Stood, de Soltdoorsvörstadt is baven in de Midd to sehn

Geografie

De Soltdoorsvörstadt liggt in’n Oosten von de Stoder Binnenstadt. Twüschen de Vörstadt un de Binnenstadt liggt de Borggraven un de Stoder Haven, de in’n Noorden an de Swing anbunnen is. De Swing billt denn in’n Noorden de natürliche Grenz von de Soltdoorsvörstadt. Na Oosten to liggt Oolland mit de Öörd Wöhrn, Melau un Speersoort.

Dat Rebeed in’n Süden von de Oollanner Straat hett fröher ok to de Soltdoorsvörstadt tellt. Nadem dor in de Johren 1960 en Plattenbo-Siedlung anleggt worrn is, warrt dit Rebeed vondaag aver Oollanner Veerdel nöömt un billt en egen Stadtdeel.

Historie

De eerste Warft in de Vörstadt hett dat al vör 1645 geven. In dat 18. un 19. Johrhunnert hebbt in dat Rebeed von de Soltdoorsvörstadt aver jümmer blots enkelte Hüüs stahn. 1758 is dor en ne’e Warft grünnt worrn un 1896 de Holthannel Hagenah-Borcholte mit en Sageree un de Noorddüütsche Ledderfabrik. 1976 hett de Warft dichtmaakt un 1986 de Holthannel. De Grundstücken legen na disse Tied braak. In de Johren 1990 hett de Stadt Stood denn de Slüüs un Brügg twüschen Borggraven un Haven nee boot un de Kumplex mit dat Cinestar-Kino, de Bowlingbahn, Restaurants un dat RAMADA-Hotel is anleggt worrn. In de Johren 2000 sünd tosätzlich en Reeg ne’e Wahn- un Bürohüüs (mit üm un bi 270 Wahnungen un Büros) an dat Över von de Swing un en Olenhuus boot worrn. Dat Sanerungsprogramm is von 2003 bet 2017 lopen, de letzten Hüüs, de in dat Programm boot worrn sünd, weren aver al 2013 trech. Ok de Havenanlagen hett de Stadt saneert. Allens tohoop sünd dor 6,5 Milljonen Euro ut öffentliche Middel investeert worrn (Bund un Land 3,6 Milljonen, Stadt 1,8 Milljonen un üm un bi 1 Milljoon an Utglieksbedrääg un Tinsinnahmen dör de Stadt). Mit Stand 2013 hebbt in de Vörstadt üm un bi 300 Minschen leevt.

Tosätzlich sünd ok de Agentur för Arbeid Stood un de IHK Stood in de Soltdoorsvörstadt tohuus.

Verwaltungsgeschicht

De Oort hett vör 1859 to dat Amt Stood tohöört un denn von 1859 bet 1885 to dat Amt Himmelpoorten. Na 1885 weer dat in’n Kreis Stood. 1932 is dat Deel von’n ne’en, grötteren Landkreis Stood worrn.

Inwahnertall

Johr	Inwahners
1791-00-001791	4 Füürsteden
1824-00-001824	6 Füürsteden
1848-00-001848	12 Lüüd, 3 Hüüs

Religion

De Soltdoorsvörstadt is evangeelsch-luthersch präägt un höört to dat Kaspel von de Wilhadi-Kark in Stood.

För de Kathoolschen is de Hillig-Geist-Kark in Stood tostännig.

Weertschop un Infrastruktur

In de Soltdoorsvörstadt sitt ünner annern dat Ünnernehmen Kurotec-KTS.

Verkehr

Dör de Soltdoorsvörstadt löppt de Oollanner Straat, de in’n Westen na de Binnenstadt von Stood föhrt un in’n Oosten an de Landsstraat 111 ran un von dor as Landsstraat 140 wieder na Hullern, Greundiek un Jörk. De L 111 geiht in’n Noordwesten na Bützfleet un Drochters un in’n Süden an de Autobahn 26 un de Bundsstraat 73 ran. De Opfohrt 3 Stood-Oost op de A 26 (Afsnidd Stood–Hamborg) liggt so veer Kilometer in’n Süüdoosten.

De nächste Bahnhoff is so bi een Kilometer wied weg in’n Süüdwesten de Bahnhoff Stood an de Nedderelvbahn von Cuxhoben na Hamborg.