Stage Fright (1950)

Stage Fright (op plattdüütsch so veel as „Lampenfever“; dt. Titel: Die rote Lola) is de Titel vun en US-amerikaanschen Thriller vun Alfred Hitchcock ut dat Johr 1950. De Film baseert op de Romanen Man Running un Outrun To Constable vun Selwyn Jepsen.

Filmdaten
Plattdüütsch Titel:	—
Originaltitel:	Stage Fright
Düütsch Titel:	Die rote Lola
Produkschoonsland:	USA
Johr vun’t Rutkamen:	1950
Läng:	105 Minuten
Originalspraak:	Engelsch
Öllersfreegaav in Düütschland:	FSK 6
Filmkru
Speelbaas:	Alfred Hitchcock
Dreihbook:	James Bridie Whitfield Cook Ranald MacDougall Alma Reville
Produkschoon:	Herbert Coleman Alfred Hitchcock
Musik:	Leighton Lucas
Kamera:	Wilkie Cooper
Snitt:	Edward B. Jarvis
Szenenbild:	Terence Verity
Kledaasch:	Milo Anderson Christian Dior (Dietrich)
Dorstellers
Jane Wyman: Eve Gill Marlene Dietrich: Charlotte Inwood Michael Wilding: Det. Insp. Wilfried 'Ordinary' Smith Richard Todd: Jonathan Cooper Alastair Sim: Commodore Gill Sybil Thorndike: Mrs. Gill Kay Walsh: Nellie Goode Miles Malleson: Mr. Fortesque Patricia Hitchcock: Chubby Bannister Hector MacGregor: Freddie Williams

Inholt

Jonathan Cooper warrt vun de Polizei söcht, vunwegen dat he den Ehmann vun sien Leefsten ümbröcht hebben schall. Sien Verlööfte Eve Gill sett allns doran, em to schulen un verstickt em. Op’n Weg na ehrn Vadder vertellt Jonathan in en Torüchblenn, wat passeert is: Dorna hett nich he den Ehmann ümbröcht, man sien Leefste sülvst, de Schauspelersche Charlotte Inwood. Üm Charlotte to schulen weer he aver in ehr Huus gahn, üm ehr en nee Kleed to hollen, vun wegen dat se sik teemlich mit Blood vullsmeert harr.

De Saak nimmt en Wenn, as Eve ehr Vadder seggt, dat de Bloodplack op dat Kleed mit Afsicht dorop kleit worrn is. Jonathan will dorvun nix weten un smitt dat Kleed in’t Füer, üm dat Bewiesstück tonichten to maken. Eve beslutt nu aver, sik sülvst kunnig to maken, wat wohrhaftig vörfallen is. Se lett sik bi Charlotte Inwood as Deenstmagd anstellen. As se den Detektiv Smith dröpt, de mit den Moordfall beopdraagt is, fangt se an sik in em to verkieken.

In’t Theater warrt Eve Tüüg, as Jonathan mit Charlotte tosamenkummt un ehr vertellt, dat he noch dat Kleed mit den Bloodplack hett. Dormit sett he ehr ünner Druck, dat se in tokamen Tieten mit em tosamen leven schall. Eve föhlt sik jümmer mehr hen- un herreten twüschen Jonathan un den Detektiv Smith. Op en Goornfest stellt Eve ehr Vadder Charlotte en Fall: He smeert dat Kleed vun en Popp mit sien Blood vull un lett ehr na de Schauspelersche bringen, de foorts verstört reageert. Togliek finnt Smith aver rut, dat Eve sik ok de Deenstmagd vun de Schauspelersche insleken hett un föhlt sik vun ehr verschaukelt. Nu gesteiht Eve em aver, dat se sik in ehr verkeken hett. Smith seggt ehr un ehrn Vadder to, dat se Charlotte Inwood noch eenmol en Fall stellen drööft.

Dorbi stellt sik aver rut, dat nich de Schauspelersche ehrn Mann ümbröcht hett, man Jonathan. Eerst will Eve dat nich wohrhebben un versöcht nochmol wedder Jonathan to schulen, man denn gifft ok he to, dat he de Möörder weer un dat he ok fröher al en Deern doodmaakt hett. Üm as krank dörtogahn överleggt he, ok Eve an de Siet to maken, man se kann sik mit en drüdde Fall ut de Gefohr befre’en. Bi de Flucht vör de Polizisten kummt Jonathan üm’t Leven un Eve finnt Trost bi Detektiv Smith.

Kritik

• De tz München oordeel, dat Stage Fright een vun de sluusohrigsten Filmen vun Alfred Hitchcock weer.
• Dat Lexikon vun’n internatschonalen Film beteken dat Wark as teemlich swack, vun wegen dat dat en konventschonellen Krimi weer.

Utteken

De Film weer för dree Filmpriesen vörslahn un hett twee dorvun wunnen:

• 1950: den NBR Award in de Kategorie Top Ten Movies
• 1950: den Mention-Pries vun’t Locarno International Film Festival för Alfred Hitchcock

Achtergrund

In den Film arbeit Hitchcock eenmol mehr mit dat Thema vun den verfolgten Unschulligen, dat he in vele annere Filmen as The 39 Steps, Saboteur oder North by Northwest al bruukt hett. De Ünnerscheed is, dat de vermodte Held sik in dissen Fall an’t Enn as schullig rutstellt. De Rüchblenn to Anfang vun’n Film, in de Jonathan Cooper sien Verlööfte Eve Gill vertellt, dat Charlotte Inwood ehrn Ehmann doodslahn hett, wiest sik an’t Enn as Löög. Disse „Filmlöög“ is al fief Johren vörher vun Edgar G. Ulmers in den Film Detour insett worrn un is vundaag as Stilmiddel begäng.

De düütsche Titel „Die rote Lola“ is snaaksch, vunwegen dat in’n helen Film keen „Ro’e Lola“ opduken deit. Wohrschienlich schüll de Titel op Marlene Dietrich ehr Rull Lola Lola in den Film Der blaue Engel vun 1930 anspelen.

In Stage Fright speelt to’n eersten mol Hitchcock sien Dochter Patricia mit. Se speelt de Rull vun de Chubby Bannister un hett mehrmols Jane Wyman doubelt. Hitchcock sülvst hett ok in dissen Film en Cameo-Optritt hatt: He is na 38 Minuuten in de Straat to sehn, as he sik na Eve ümkieken deit.

Groten Spood harr de Film nich.

Literatur

• Robert A. Harris, Michael S. Lasky, Rutgever: Joe Hembus: Alfred Hitchcock und seine Filme (OT: The Films of Alfred Hitchcock). Citadel-Filmbuch bi Goldmann, München 1976, ISBN 3-442-10201-4
• François Truffaut: Mr. Hitchcock, wie haben Sie das gemacht?. Heyne, München 2003, ISBN 3-453-86141-8

Weblenken

• Stage Fright (1950) in de Internet Movie Database (engelsch)
• Stage Fright bi marlenedietrich-filme.de
• Kritik vun U. Behrens op filmzentrale.de