Star Trek: The Next Generation
Star Trek: The Next Generation (op platt so veel as „Reis na de Steerns: De nächste Generatschoon“; dt. Titel: Raumschiff Enterprise: Das nächste Jahrhundert), kort ok TNG, is en US-amerikaansche Science-Fiction-Reeg, de 1987 in de USA in’t Feernsehn kamen is. Dat is de tweete Feernsehreeg – wenn man vun de Tekentrick-Reeg afsütt, de nich veel Spood harr – ut dat Star-Trek-Universum, dat Gene Roddenberry sik inst utdacht hett. De Reeg lööp meist twintig Johren na de Originalfeernsehreeg Star Trek un is mit 178 Folgen in söven Staffeln bit 1994 produzeert worrn.
| Daten vun de Reeg | |
|---|---|
 | |
| Plattdüütsche Titel: | — |
| Düütsche Titel: | Raumschiff Enterprise: Das nächste Jahrhundert |
| Originaltitel: | Star Trek: The Next Generation |
| Produkschoonsland: | USA |
| Produkschoonsjohr(en): | 1987–1994 |
| Produzent(en): |
Rick Berman |
| Episodenläng: | ~42 Minuuten |
| Episodentall: | 178 in 7 Staffeln |
| Originalspraak: | |
| Musik: | |
| Titelleed: | |
| Idee: | |
| Genre: | |
| Eerst Sennen: | 28. September 1987 |
| Eerst Sennen (D): | 7. September 1990 op ZDF |
| Dorsteller | |
|
Hööftdorstellers:
Nevendorstellers: Afsnitt in’n Artikel | |
Vun 1988 an, hett de CIC de eersten 14 Folgen op Video rutbröcht. In Düütschland weer de Feernsehreeg vun 1990-1993 toeerst in’t ZDF utstrahlt, later denn vullstännig op Sat.1. För’t Feernsehn weern all Episoden aver noch mal nee synchroniseert. Meten an de Tokiekertallen, weer The Next Generation in de USA een vun de bedüdensten Feernsehregen.
Inholt un Entwickeln vun de Reeg
ännernThe Next Generation speelt in’t 24. Johrhunnert, also ruchweg 100 Johren later as de Originalreeg Star Trek. Dat Grundkunzept is dat glieke bleven: de Geschichten dreiht sik üm de Kru vun dat fiktive Ruumschipp Enterprise, wat en Nafolger vun dat Ruumschipp ut de Originalreeg is. In de Episode beleevt de Kru wunnerliche un snaaksche Saken. Dorbi warrt ünner annern Motiven ut de Science-Fiction opgrepen, as Tietslöpen, Tietreisen, künstlich Leven oder Paralleluniversen. Veelfack drapt se op butenirdische Levensformen un frömme Zivilisatschonen. Dorto kamt interstellare Kunflikten oder de Geföhlen, de twüschen de Figuren ut de Reeg tostannenkamt un sik entwickelt. De meisten Episoden wiest twee oder mehr Geschichten op, de blangenenanner vertellt warrt.
De Szenarien vun de Episoden deent faken as Achtergrund för moralische oder ethische Fragen, de sik faken ok üm sellschoppliche Lasten dreiht, de dat in Wohrheit gifft. Dör de Diplomatie, mit de in Star Trek vörgahn warrt, driggt de Reeg en humanistische Bottschop. Dat wiest sik nich toletzt ok in de Böversten Direktive, de de Kru ünnerseggen deit, sik in de moraalsche oder technische Entwicklung vun annere Kulturen intomischen. Sünners disse Böverste Direktive föhrt dör ehrn hogen Anspröök jümmer wedder to Lasten un moraalsche Kunflikten.
Dat Ruumschipp Enterprise hett in disse Feernsehreeg mehr as 1000 Mann Besatten. Dorto kamt noch de Familien, de deelwies mit an Boord sünd, so dat dat Schipp ok en Schoolsystem un Kinnergoorns opwiest. Dat Schipp sülvst kann bi Gefohr splitt warrn in en Andriefsdeel un den so nöömten „Ünnertassendeel“, in den sik de Lüüd an Boord normalerwies opholt.
Dör dat wedderholte Inbinnen vun Gastrullen in de Geschicht warrt övergriepen Sträng in de Geschichten inboet. Tomeist sünd dat de hööchsten Offizeeren, de in de enkelten Episoden dorstellt warrt un de Gefohren to bestahn hebbt. Eerst to’n Enn vun de Reeg weern mehr un mehr ok Kruliddmaten in lüttere Räng utboet un fakener dorstellt. De Entwickeln vun de Figuren is tomeist nich graadlienig verlopen, man to’n Sluss hen weern se kumplex un mit vele Aspekten utformt. De meisten Figuren wiest tyypsche Egenorden un Charakteregenschoppen op. So is dat för Worf de strenge klingoonsche Ehrenkodex, na den he leevt, wiel de Android Data dorna strevt, minschlicher to warrn.
Gene Roddenberry, de Schöpper un Utfinner vun’t Star-Trek-Universum hett mit de Tiet an Infloot verloren bi’t Utgestalten vun de Reeg, as Rick Berman as Co-Produzent to de Reeg dorto keem. AS Roddenberry 1991 doodbleven is, hett Berman de hele Reeg övernahmen. De Feernsehreeg hett sik vun de drüdden Staffel an mehr op kriegerische un politische Strietereen utricht un barg nu ok mehr Action. De Kunflikten harrn faken ok Utwirken op de lateren Folgen. En bekannt Bispeel dorför is de klingoonsche Börgerkrieg.
Personen in de Reeg
ännernJean-Luc Picard
ännern
Jean-Luc Picard stammt vun en franzööschen Wienbuern af. In sien Jöögd weer en en willen Breker, de nix anbrennen leet, wat sik gau ännert hett, as he wiel de Tiet as Steernkadett in en Striet swoor besehrt worrn is un en künstlich Hart kriegen müss. In de eersten Episood övernimmt Captain Picard dat Kommando op de Enterprise, dat Flaggschipp vun de Steernflott. Vörher harr he en Kommando op de Stargazer. He is en diplomaatschen Mann un charakterstarken Vertreder vun de Prinzipien vun de Steernflott dorstellt, de ok ünner Andrauhn vun’n Doot oder vun Gewalt nich gegen sien Övertügen lütt bi gifft.
Picard sien heel Leven dreiht sik üm de Steernflott, man wenn he de Tiet dorto finnen deit geiht he geern ok sien Hobby, de Archäologie, na. Wegen sien hooch Amt, de grote Verantwoorten un de Gefohren, de dat Reisen in’t Weltall mit sik bringt, lett de Kaptein nich geern Geföhlen an sik ran. Wenn he mol wat mit en Fro anfangt, holt dat ut jüst disse Grünnen tomeist nich lang. An meisten hentogen föhlt he sik to Dr. Beverly Crusher, wat in mehrere Episoden opgrepen warrt.
William T. Riker
ännernRiker kummt in de eersten Episood nee an Boord, woneem he den Posten as Eersten Offizeer bekleedt. As den Captain sien Viez warrt he vun Picard tomeist „Nummer Een“ nöömt. Een vun sien Hööftopgaven an Boord is, den Captain to schulen un em mit Raatslag un Help to Siet to stahn. Butendem föhrt he de meisten vun de Butenmisschonen an, wenn sik de Kru op frömme Planeten oder verlaten Ruumscheep ümkieken mutt. Ok Riker steiht vull achter de Grundsätz vun de Steernflott, is aver gauer as Picard ok mol praat op egen Fuust to hanneln.
Will Riker stammt ut Alaska, woneem he vun sien Vadder groottogen worrn is. He warrt in de Reeg warrt as en Sladoot dorstellt, de sik jümmers to helpen weet un in sien Freetiet geern goot leevt. Bi schöne Fronslüüd leet Riker tomeist nix anbrennen, man en sünners go’en Draht hett he jümmer noch to Deanna Troi, mit de he lang för sien Posten op de Enterprise mol en längere Tiet wat harr. Will höört geern Jazzmusik un speelt ok sülvst Posaune un he bedeeligt sik an Crusher ehr Theater-AG. Butendem speelt he mit sien Kollegen geern Poker.
Data
ännern
Lieutenant Commander Data is en Android, en künstliche Levensform, de vun den Utfinner Dr. Noonien Soong konstrueert worrn is. He weer vun Steernflotten-Lüüd in en Kolonie funnen, de vun en Kristallinwesen angrepen worrn is. Se hebbt em na de Steernflott bröcht, woneem he en Utbilln dörlopen hett un nu wegen sien rutragen Künnen as Offizeer deent. Op de Enterprise is Data de tweete Offizeer, de dör sien utmatige Anlaag Informatschonen to verarbeiten kneepsche Situaschonen oplösen deit. Dör sien Technik un Bodeelen hett he butendem utermatige Knööv un Reakschonen un warrt dorüm faken ok in Situatschonen un an Öörd insett, de för normale Minschen to gefährlich weern.
As künstliche Levensform, de vun sien Programmeeren afhangigg is, sett de Figur Data de minschliche Egenorden en Spegel vör, vunwegen dat he vele Saken eenfack nich verstahn kann. Bit to een vun de lateren Folgen, in de he den „Emotschoonschip“ kriegen deit is he ok nich in de Laag to föhlen. Mit Verloop vun de Reeg lehrt Data veel över de Minschen dorto un is vun jem bannig andoon. So dull, dat he sülvst dorna strevt jümmer minschlicher to warrn. Bi dissen Versöök proovt he veel ut, wat en Reekner normalerwies nich kann as de Maleree oder de Dichtkunst.
Geordi LaForge
ännernLieutenant LaForge is de Baasingenieur op de Enterprise, de för de Funkschoonsdüchtigkeit vun’t Schipp tostännig ist un dormit in’n Maschienenruum dat Seggen hett. Vun Geboort an blind is La Forge op de Help vun sien so nöömten VISOR anwiest, en technisch Reedschop, dat elektromagneetsche Bülgen opfangen un verarbeiten un över Implantaten direkt in sien Bregen överspelen deit. Dör sien Visor is LaForge in Laag vele Saken to sehn, de för normale Ogen nich to sehn sünd. In’n Verloop vun de Reeg warrt LaForge to’n Lieutenant Commander beföddert.
So klook un plietsch LaForge in’n Ümgang mit de Technik is, so tutig is he mitünner in’n Alldag. So kummt dat, dat he nich veel Spood mit de Fronslüüd hett, ofschoonst he dat jümmer wedder versöken deit. Sien besten Fründ op de Enterprise is Data, mit den he as Android beter kloor kummt, as mit de Minschen. Faken holt he sik ok Raat an de Bar bi Guinan.
Deanna Troi
ännernDeanna Troi stammt vun den Planet Betazed, woneem de Minschen Gedankenlesen künnt. Bi Deanna is dat nich so dull utprägt, vunwegen dat ehr Vadder vun de Eer stammt. Liekers hett se empaathsche Anlagen, d. h. se kann Stimmungen un Geföhlen bi annere Lüüd wohrnehmen, waz op de Enterprise nütt warrt, üm in gefährliche Situatschonen to’n Bispeel de Gegners beter inschätzen to künnen. An Boord bekleedt se den Posten vun’n Schippscounselor, wat to verglieken is mit en Psychiater.
Troi is jüst so Liddmaat vun de Steernflott as all annern, ofschoonst se tomeist keen Uniform drägen deit. Eenige Johren fröher harr se wat mit den Eersten Offizeer Will Riker, mit den se jümmer noch en grote Fründschop verbinnt. To’n Enn vun de Reeg fangt se aver wat mit Worf, den Sekerheitsbaas, an. In mehrere Episoden kummt ehr exzentrische Mudder Lwaxana an Boord, woneem se de meisten Lüüd op’n Geist geiht. De Verbinnen to ehr Mudder is dorüm nich eenfach. Ehr gröttste Vörleef is Schokolaad in jede Form.
Tasha Yar
ännernLieutenant Tasha Yar is de Sekerheitsbaas’sche op de Enterprise, de al an Boord is, as Picard dat Kommando övernimmt. Se is op den Planeten Turkana IV boren un opwossen, en Planet de inst ut de Föderatschoon uttreden un dorna in Anarchie verfallen is. Tasha Yar hett dor en harde Jöögd verleevt, künn aver een Dag vun den Planeten weglopen un in de Steernflott en nee Leven opboen. Se kummt bi en Butenmissschoon in Ep. 23 to’n Enn vun de eersten Staffel üm, duukt aver in latere Episoden wedder op, in de de Tietverloop dörenanner is.
Tasha Yar hett in en fröhe Episood en intime Affär mit Data, wat ahn to wullen en faste Verbinnen to em opboet. Dör ehr Jöögd op Turkana IV hett se fröh all lehrt to överleven un wiest sik as go’e Taktikersche un spooodriek in’n Nahkamp.
Worf
ännernDe Klingoon Worf is en Weetkind, dat op de Eer vun Pleegöllern groottogen worrn is. He is de eerste Klingoon in de Steernflott un sütt sik in de Plicht gegenöver de Föderatschoon, vunwegen dat se em dat Leven reddt un em optogen hebbt. Liekers föhlt he sik na sien klingoonsche Heimatwelt hentogen, de ehr Kultur deep in em verwörtelt is. Dat Leven na den kriegerischen klingoonschen Ehrenkodex in dat diplomaatsche Ümfeld vun de Steernflott is en duersomen binneren Striet, den Worf mit sik uttodrägen hett.
Worf warrt an Boord Sekerheitsbaas, as Tasha ümkamen is. As Krieger sünd em de Ehr un de Loyalität bannig wichtig. Freetiet un Spaaß dorgegen seggt em minner to, wat em an Boord mehr oder minner isoleren deit. Worf verbinnt en sünnere Fründschop to Captain Picard, de em an de Siet steiht, as sien Vadder beschulligt warrt, de Klingonen inst an de Romulaners verraadt to hebben. Sien Ehr warrt later wedder herstellt. To’n Enn vun de Reeg kummt Worf mit Deanna Troi tosamen.
Dr. Beverly Crusher
ännern
Dokter Crusher is de medizinische Baas op de Enterprise in’n Rang vun en Commander. Se hett teemlich fröh ehrn Ehmann verloren, de bi en Misschoon ünner dat Regeer vun Captain Picard ümkamen is. De beiden kennt sik dorüm al wat länger un later warrt ok kloor, dat Picard sik al fröher in ehr verkeken harr, dorvun aver nix seggt hett, üm de Fründschop nich tonichten to maken. Se hett en Söhn, Wesley, de bit to de veerten Staffel ok an Boord is.
Beverly Crusher weet veel ok över olle Heelmethoden un is in de Laag to improviseeren, wenn dat mol nödig is. Wiel ehr Utbilln hett se veel Stepdans maakt, wat ehr den Ökelnaam „de dansen Dokter“ inbröcht hett. Se dröpt sik faken mit Picard to en gemeensom Fröhstück un föhrt an Boord vun de Enterprise en Theater-Workshop an. Na de tweeten Staffel schüll de Figur gegen en weniger fründliche Figur uttuuscht warrn, so dat Dr. Crusher offiziell en hogen Posten op de Eer övernehmen deit. Se keem in de drüdden Staffel aver wedder torüch, as sik Dr. Pulaski bi de Tokiekers nich dörsetten künn.
Dr. Katherine Pulaski
ännernDokter Pulaski speelt blots in de tweeten Staffel mit un schüll mit en resoluteren Charakter an de Steed vun Dr. Crusher kamen. Man de Tokiekers hebt de Figur nich annahmen, so dat se wedder rutnahmen weer. Dr. Pulaski hett en teemlich direkte Oort un Wies un eckt dorüm faken ok mit Captain Picard an. Ok fallt ehr dat swoor, den Androiden Data as en egen Persönlichkeit to achten, wat en tosätzlich Kunfliktpotential in de Reeg bröcht hett.
Dat stellt sik rut, dat Pulaski inst mol wat mit den Vadder vun Will Riker harr. En sünnere Egenoort vun ehr is, dat se sik nich geern beamen lett, vunwegen dat se bang is, se künn dorbi verschütt gahn, wenn de Maschien mol nich so arbeit, as se dat schall.
Wesley Crusher
ännernWesely Crusher is de Söhn vun Dr. Crusher, de as Teenager bit Staffel veer an Boord vun de Enterprise is. He wasst ahn sien Vadder op, de fröh bi en Butenmisschoon üm’t Leven kamen is. Wesley intresseert sik vör allens, wat mit Technik to doon hett un weet för sien Öller ok al bannig veel över de Funkschonen vun en Ruumschipp. So kummt dat, dat he mehr as eenmol dör sien go’en Infäll un sien Weten de Enterprise ut gefährliche un kneepsche Lagen redden deit.
To Captain Picard boet he mit de Tiet en faste Binnen op, ofschoonost Picard an sik nich mit Kinner ümgahn kann. Wegen Wesley sien Verdeensten üm dat Schipp maakt he em fröh al to’n Fähnrich ehrenwies un ünnerstütt em bi sien Möhen, an de Steernflottenakademie opnahmen to warrn. He geiht dorüm denn vun Boord, duukt aver in enkelte Episoden wedder op. An’t Enn vun de Reeg brikt he aver sien Loopbahn bi de Steernflott af un warrt vun en Butenirdischen op den Weg na en högeren Dorwesenseven bröcht.
Utteken
ännernDe Feernsehreeg weer utermatig spoodriek, wat sik ok in tallrieke Feernsehpriesen wiest. Alltohopen weer Star Trek:The Next Generation för mehr as achtig Utteken vörslahn un hett dörtig Priesen dorvun wunnen – alleen twölf mol weer de Reeg mit den Primetime Emmy ehrt. Wietere Priesen wern ünner annern:
- 1988: de Peabody Award
- 1989: de Young Artist Award in de Kategorie Best syndizeert Familien-Drama oder Kummedie-Reeg
- 1989: de Young Artist Award in de Kategorie Best Jungdorsteller in en syndizeerte Familien-Show för Wil Wheaton
- 1990: de Saturn-Pries in de Kategorie Best Genre Feernsehn
- 1991: de Saturn-Pries in de Kategorie Best Genre Feernsehn
- 1993: de Hugo Award in de Kategorie Best dramaatsche Präsentatschoon
- 1995: de ASCAP Award in de Kategorie Best Feernsehreeeg för Jay Chattaway un Dennis McCarthy
- 1995: de Hugo Award in de Kategorie Best dramaatsche Präsentatschoon
- 2005: en Sünnerpries vun’n Saturn-Pries för dat hele Star-Trek-Universum
Rezepschoon
ännernTo de Tiet as Star Trek: The Next Generation to’n eersten mol in’t US-amerikaansche Feernsehn lopen is, weer de Reeg een vun de bekanntsten Weken-Feernsehregen vun de USA un bito ok een vun de kommerziell spoodrieksten. Vun Sieten vun de Produkschoonsfirma Paramount weer de Feernsehreeg blots ut finanzielle Grünnen instellt. Man weer bang, dat de Produkschoonskosten na de sövten Staffel to dull anstiegen deen. Dat Budget leeg ruchweg bi 1,7 Mio US-Dollar för een Episood. De letzte Episood hett in’n Mai 1994 bi ehr Eerstutstrahlen mehr as 31 MIllionen Tokiekers hatt[1].
|
|
|
|
|
|
|
|
|
|
|
|
|
|
Literatur
ännern- Rick Sternbach / Michael Okuda: The Star Trek Next Generation Technical Manual. 1991
- Andrea zur Nieden: GeBorgte Identitäten. Star Trek als kulturindustrielle Selbstversicherung des technisierten Subjekts. Ça ira, Freeborg, 2003
Borns
ännern- ↑ Schmuckler, Eric: TELEVISION; Profits, Reruns and the End of Next Generation, in: The New York Times vun’n 24. Juli 1994, afropen an’n 18. September 2011
- ↑ Episodenöversicht mit vele Tosatzinformatschonen