Sula-Daal

Dat Sula-Daal (spaansch Valle de Sula) is en Daal in’n Noordwesten von Honduras, dat sik von de Küst von de Karibische See 100 Kilometer binnenlands reckt (bet in de Gegend von Río Lindo) un bet över 30 Kilometer breed is. Dat Daal liggt twüschen de Sierra del Omoa in’n Westen un de Cordillera Nombre de Dios in’n Oosten un warrt billt von de Strööm Río Chamelecón, Río Ulúa un Río Mezapa. Dat Land in dat Daal is sied un Swemmland, wieldes an de Rannen de Bargen hoogstiegt.

Bild ut Satellitendaten von dat Daal

Luftbild von de Münnen von Río Ulúa (brunen Stroom in’n Vörgrund) un Río Mezapa (brunen Stroom in’n Achtergrund)

Dat Daal reckt sik över de Departamentos Cortés, Yoro un Atlántida. De wichtigsten Städer sünd San Pedro Sula, El Progreso, Choloma, Puerto Cortés, Villanueva un Tela.

Dat Daal mit siene fruchtboren Boddens höört to de an’n dichtesten besiedelten Rebeden in Honduras. De natürliche Plantenwelt von dat Daal is tropischen Dröögholt. Aver dör dat siede Land un de Strööm, de dor dörfleet, lett sik dat Land licht bewatern un al fröh sünd in de Region Plantaaschen anleggt worrn. Vör allen Bananen, aver ok Zuckerrohr, Zitrusfrücht un annere Frücht warrt dor plant. In dat Daal leevt so bi 27 % von de Inwahners von Honduras, man 50 % von’n Export un 63 % von dat Bruttobinnenlandsprodukt von Honduras kaamt ut dat Valle de Sula.