Taufik Cotran
Taufik Suliman Cotran (* 6. August 1926 in Haifa, Palästina; † 8. März 2007 in Burnham Beeches) weer en Commonwealth-Jurist.
Cotran is 1926 as Christ un Söhn von Fadua, borene Khoury, un Suliman Cotran in Haifa boren, wat to de Tied in dat Mandaatsrebeed Palästina leeg un ünner de Kuntrull von Grootbritannien stünn. He güng op de Ramallah Friends Schools in Ramallah un weer twee Johr an de Amerikaansche Universität Beirut. 1945 is he na Jerusalem gahn, üm dor Juristeree to studeren. Blangenbi hett he as Översetter an’n Böversten Gerichtshoff von Palästina arbeidt. As sik de Kunflikt twüschen araabsche Palästinensers, Joden un Briten 1948 ophitt hett, is de Familie na Beirut gahn. Nadem denn de Staat Israel grünnt worrn is, kunn he nich na Palästina trügggahn. He hett in London an de Universität London Juristeree studeert un dat Studium mit en Bachelor of Laws afslaten. He is Barrister worrn un hett 1951 ok de brietsche Staatsbörgerschop annahmen.
Cotran is von 1951 bet 1955 toeerst Assistenz-Staatsanwalt un Magistraat in Libyen ween un denn von 1955 bet 1960 Polizeimagistraat un Distriktrichter in Khartum (Anglo-Ägyptisch Sudan). Dor hett he ok dat Kummittee leidt, dat de Meuteree von de Sudan Defence Force in de Öörd Torit, Juba, Yei un Maridi (August 1955) ünnersöcht hett, de de Anfang von’n Eersten Sudaanschen Börgerkrieg weer.
Von 1960 bet 1965 weer he Magistraat un Staatsanwalt in Uganda. In de Tied 1966 bet 1968 is he as Justiziar in de Weertschop wesselt un hett in Grootbritannien un Kenia för Rothmans Pall Mall Ltd. arbeidt. Von 1969 bet 1973 weer he Bövermagistraat in Uganda. He güng von 1974 bet 1976 as Richter na Lesotho un is dor 1976 Chief Justice von Lesotho worrn. 1986 is he von Lesotho na Belize wesselt un Chief Justice von Belize worrn. Dat is he bet 1990 bleven, as em George Brown aflööst hett.
Cotran hett an’n 23. März 1952 Felicity Maria Hoffelner freet. De beiden harrn dree Kinner.
Ehren
ännernCotran is 1980 to Königin Elisabeth II. ehren Geboortsdag Commander of the Order of the British Empire worrn.