Technik- un Verkehrsmuseum Stood

Dat Technik- un Verkehrsmuseum Stood weer en Museum in Stood, dat den dör de Technik in Gang bröcht Wannel in de Levens- un Arbeidsverhältnisse von de Minschen in de Stoder Region twüschen üm un bi 1850 un de Nutied dorstellt hett. Dat Museum harr so bi 5.000 Stücken in siene Sammlung.

Hall von dat Museum mit’n Segelfleger „Milomei M1“
Füürwehrfohrtüüg von Ford, Opel, Hanomag un Mercedes-Benz
Diesellok von Deutz
Ford Modell T ut dat Johr 1921
VW T2-Elektrotransporter, de för de Stadtwarken Stood lopen is

De Dregervereen von dat Museum is 1983 grünnt worrn un dat Museum hett 1984 in en Hall in de Freebörger Straat apenmaakt, de de Stadt Stood tohören dee un för de de Vereen nix betahlen müss. Vörher weer op dat Grundstück de Schrotthannel Iesen-Edler.[1] De Vereen hett dat Museum föhrt, bet dat in’n November 2012 dichtmaken müss.

Dat Museum müss in’t Johr 2000 all Militärobjekte ut de Sammlung afgeven. Dat weer en Oplaag von de Stadt Stood. Ans wullen se dat Museum nich noch mehr Toschüss geven.[2]

2009 harr de Stadt Stood Probleme mit de Finanzen. De Vereen hett mit dat Museum elk Johr veel Geld verloren un de Stadt harr dat jümmer utgleken. Dat wull de Stadt nu aver nich mehr doon, üm den Stadthuusholt uttoglieken. Gliektiedig hett dat Plaans geven, dat Grundstück för en poor Milljonen Euro to verköpen.[3] De Stadt hett in’n Dezember 2010 den Meedverdrag mit’n Vereen künnigt. Dat weer sounso al lang so, dat de Stadt den Vereen vörhollen hett, dat se keen klore Lien bi ehre Sammlung hebbt un allens möögliche sammelt, ahn didaktisch Kunzept.[4] De Stadt hett in’n Januar 2012 denn en Rümungsklaag inreckt. Stadt un Dregervereen hebbt sik denn in Göödverhandlungen vör dat Landgericht Stood eenigt, dat Museum bet Enn Oktober 2012 optolösen.[5] De Dregervereen wull geern mit sien Museum in en annere Gemeen ümtehn. Annere Gemenen wullen de unstruktureerte Sammlung aver ok nich övernehmen un de Dregervereen wull denn in’n Juli 2012 en Börgerbegehren in Gang bringen, dat dat Museum bestahn blieven schall.[6] Von dat Börgerbegehren is nix worrn un in’n Oktober 2012 hett de Vereen ahn Spood versöcht, dat Resultaat von de Göödverhandlung juristisch antofechten.[7] An’n 15. November 2012 is dat Museum dör en Dwangsvullstreckung slaten worrn.[8] In’t Vörjohr 2013 hebbt se de Museumsbestand na Hannover brocht. In de Hallen von dat fröhere Ünnernehmen Louis Eilers Stahlbau in Hannover-Ledeburg is för 2016 plaant, ünner den Naam „EilersWerke - Mobile Welten“ en Museum apen to maken.[9]

Swoorpunkte ännern

Footnoten ännern

  1. Technik-Museum mit Zukunft, Stader Tageblatt von’n 23. Oktober 2004
  2. MI-8T hob am Haken ab, Stader Tageblatt von’n 13.1 Dezember 2000
  3. Konsolidierung durch Verkäufe, Stader Tageblatt von’n 09. November 2009
  4. Galgenfrist läuft im Technikmuseum ab, Stader Tageblatt von’n 1. September 2011
  5. Ende Oktober ist Schluss, Stader Tageblatt von’n 1. März 2012
  6. Bürgerbegehren soll Museum retten, Stader Tageblatt von’n 11. Juli 2012
  7. Gericht: Museum muss gehen, Stader Tageblatt von’n 20. Oktober 2012
  8. Zwangsvollstreckung im Museum, Stader Tageblatt von’n 15. November 2012
  9. „Mobile Welten“ in Hannover wächst heran, Hannoversche Allgemeine Zeitung von’n 15. Februar 2013]

Weblenken ännern

  Technik- un Verkehrsmuseum Stood. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 37′ N, 9° 29′ O