Tenever
Tenever (hoochdüütsch Tenever) is en Oortsdeel in’n Oosten von’n Stadtdeel Oosterholt in de Stadt Bremen. De Oortsdeel hett 10.018 Inwahners op en Rebeed von 2,548 km². Von dat Stadtzentrum von Bremen is de Oortsdeel 13 Kilometer wied weg.
Geografie
ännernDe Naveroortsdelen sünd Oosterholt in’n Süden, Ellenerbrook-Schevemoor in’n Westen un Överneeland in’n Noorden. In’n Oosten grenzt de Oortsdeel an de Gemeen Eiten in’n Landkreis Veern, Neddersassen.
Historie
ännernTenever kummt 1246 as Tedenvere toeerst in de Oorkunnen vör. De Naam kummt wohrschienlich von en Personennaam Dedo un dat Woord Fähr. Dat Rebeed hett to’n Goh Hollerland tohöört, dat al fröh de Stadt Bremen höört hett.
1539 hett de Bremer Börgermeester Daniel vun Büren de Ole en Hoff in Tenever köfft. Disse Hoff is 1892 an Johann Heinrich Egestorff övergahn un weer de Basis för de Egestorff-Stiftung, wat vondaag en groot Olenhuus in Tenever is.
In de Franzosentied von 1811 bet 1814 hett de Oort to de Mairie Överneeland in’n Landkanton Bremen höört. Dat Rebeed hett in disse Tied to dat Franzöösche Kaiserriek ünner Napoleon höört.
Bet 1970 weer Tenever ländlich un von Bueree präägt. In de Johren 1970 is dor denn ünner den Slötelutdruck Urbanität durch Dichte en Grootwahnsiedlung mit Wahnblocks boot worrn, de bet to 22 Etaaschen harrn. Dat weren so bi 2650 Wahnungen. Dat schullen toeerst noch mehr warrn, aver dat is 1975 stoppt worrn. In’n November 1977 weer dat Boprojekt trech.
2004 hebbt se anfungen, den Stadtdeel to saneren un üm un bi en Drüddel von de olen Wahnblocks sünd afreten worrn. Ünner annern sünd de Kesseler Block un Block 410 afreten worrn. Dor sünd nu Wischen un en Skateranlaag anleggt worrn. Düsse Ümgestaltung weer 2009 afslaten.
Von de Inwahners sünd so bi 70 % Migranten, 30 % Spätaussiedlers un 40 % ut dat annere Butenland.[1]
Inwahnertall
ännern| Johr | Inwahners |
|---|---|
| 1812[2] | 97 |
| 1823[3] | 155 |
Religion
ännern
Tenever is evangeelsch-luthersch präägt un hett mit de Kark Tenever en egen Kark, de 1976 boot worrn is. Fröher hett de Oort to dat Kaspel Överneeland höört.
De Kark in Tenever hett sik an’n 1. Januar 2008 mit de Karken Blockdiek un Ellener Brook to de Trinitatisgemeen Bremen tohoopslaten.
För de Kathoolschen is de St.-Antonius-Kark tostännig.
Weertschop un Infrastruktur
ännernDe freewillige Füürwehr Oosterholt is för Tenever mit tostännig.
Verkehr
ännernAn’n Süüdrand von Tenever löppt de Oosterholter Heerstraat langs, de in’n Oosten in Neddersassen as Landsstraat 168 na Eiten un Bassen geiht. In’n Westen geiht de Oosterholter Heerstraat na Segelsbrugge un Hastedt.
Tenever hett en direkten Ansluss an de Autobahn 27 över de Opfohrt Eiten. Dichtbi is de A 27 över dat Bremer Krüüz ok mit de Autobahn 1 verbunnen.
De nächste Bahnhoff is de Bahnhoff Mahndörp an de Bahnlien Bremen-Hamborg, wat von Tenever so veer Kilometer in’n Süden is. De Lien 1 von de Bremer Stratenbahn is 2012/2013 von de Züricher Straat över Tenever bet na’n Bahnhoff Mahndörp verlängert worrn.
Freetied
ännernIn Tenever gifft dat dat Hallenbad OTe-Bad.
Footnoten
ännern- ↑ http://www.bremen-tenever.de/Leben%20in%20Tenever_Zahlen%20und%20Fakten.html
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 94: http://books.google.de/books?id=Q 5OAAAAcAAJ&pg=PA94
- ↑ Philipp C. Heineken: Die freie Hansestadt Bremen und ihr Gebiet: in topographischer, medizinischer und naturhistorischer Hinsicht geschildert. 1836, Band 1, Sied 105: http://books.google.de/books?id=rGgAAAAAcAAJ&pg=PA105
Literatur
ännern- Wendelin Seebacher: ...das tun wir nicht wieder: Bremen Osterholz-Tenever - Geschichte eines Demonstrativbauvorhabens. 2013, ISBN 978-3943425192
Weblenken
ännern
- Websteed över den Oortsdeel (hoochdüütsch)
Koordinaten:53° 4′ N, 8° 58′ O