The Man from Utah
| Filmdaten | |
|---|---|
| Plattdüütsch Titel: | — |
| Originaltitel: | The Man from Utah |
| Düütsch Titel: | Rodeo |
| Produkschoonsland: | USA |
| Johr vun’t Rutkamen: | 1934 |
| Läng: | 52 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Robert N. Bradbury |
| Dreihbook: | Lindsley Parsons |
| Produkschoon: | Paul Malvern |
| Musik: | Lee Zahler |
| Kamera: | Archie Stout |
| Snitt: | Carl Pierson |
| Dorstellers | |
| |
The Man from Utah (op plattdüütsch so veel as „De Mann ut Utah“; dt. Titel: Rodeo) is de Titel vun en US-amerikaanschen Western ut dat Johr 1934. In den B-Movie hett John Wayne de Hööftrull speelt, Speelbaas weer Robert N. Bradbury. Dreiht weer de Film an verscheden Öörd in Lone Pine, Kalifornien[1]. De Premiere weer an’n 15. Mai 1934 in de USA[2].
Inholt ännern
Bi de Söök na Arbeit warrt John Weston vun den Marshal Higgins anhüürt, üm verdeckt as sien Deputy an dat Dalton Valley Rodeo deeltonehmen. Bi de Rodeos winnt in letzte Tiet jümmer de glieke Rieder. Un wenn mol een beter is as he, den fallt he dood vun’t Peerd. De Marshal glöövt, dat dor mit Slangengift naholpen warrt, hett aver keen Bewies. In Dalton Valley schall John rutfinnen wokeen dorachter stickt un woans se dorbi vörgaht. Op’n Weg na Dalton Valley warrt John gewohr, dat en Postkutsch överfallen warrt. He grippt in un plückt na un na all Angriepers vun’t Peerd. Dorbi schinnt he groten Indruck bi Marjorie Carter, de Dochter vun den Richter in Dalton Valley. Carter, de nich blots Richterman ok Besitter vun de öörtlichen Bank is, sleiht John vör, Sheriff to warrn, wat John aflehnen mutt.
Wohrhaftig stellt sik rut, dat John beter is as de Lüüd vun Spike Barton, de dat Rodeo organiseert un ok dat Wettgeschäft kontrolleert. Toeerst versöökt se em ut den Wettstriet to smieten, dordör dat se em tosamenslahn wüllt. Dorto warrt he vun Dolores inlaadt, de John al so op’n Kieker hett. Ut taktische Grünnen geiht he dorop in un dröpt op Cheyenne Kent, den Dolores as ehrn Broder vörstellt. John markt rechtietig, dat he in en Fall lockt worrn is. As dat Licht utgeiht, kann he utneihn un kummt mit hele Huut dorvun af. Vun wegen dat sien Lüüd na den Kutschenöverfall nu al wedder verseggt hebbt, versöcht Barton nu John to köpen: He beedt em 2000 US-Dollar an, wenn he den annern Dag mit Afsicht verleren deit.
John deit so, as wenn he inverstahn weer. In Wohrheit aver hett John gor nich vör to verleren, un Barton hett nich vör, John an’t Leven to laten. Dormit rekent John aver al so un ünnersöcht vör dat Rodeo-Finale sien Sadel nipp un nau un finnt opletzt ok wohrhaftig de Nadel mit Slangengift, de he sekerstellt. So kann he den Wettstriet ahn Hinnern winnen. Man to de glieken tiet överfallt Barton mit sien Lüüd de öörtliche Bank. Vun Dolores kriggt John en Henwies dorop. Foorts maakt he sik op’n Weg dorhen un kann de Verbrekers ophollen. Alleen Barton sülvst kann eerst noch utbüxen, liekers kriggt John em tofaten un övergifft em mitsams de giftige Nadel an den Marshal. An’t Enn vertellt he sien Afsicht in de Stadt to blieven un Marjorie to heiraden.
Achtergrund ännern
De Film is Deel vun de Lone-Star-Reeg. To Anfang warrt John Weston (John Wayne) as Cowboy wiest, de singt un Gitaar speelt. Singen deit aver nich John Wayne sülvst, man Jack Kirk. Enige vun de Rodeo-Szenen weern ut Archiv-Material tosamensneden un wiest Sam Garrett as Rodeo-Rieder.
Borns ännern
- ↑ Dreihöörd in de IMDb afropen an’n 16. Mai 2013
- ↑ Premierendaten auf IMDb afropen an’n 16. Mai 2013