Torsten Nils Wiesel

Torsten Nils Wiesel (* 3. Juni 1924 in Uppsala) is en sweedsch-US-amerikaansch Neurophysioloog.

Torsten Wiesel, November 2006

Wiesel kreeg 1954 an dat Karolinska Institut in Stockholm sien Doktertitel in Medizin. Dornah gung he in de USA, wo he af 1955 an de Johns Hopkins University weer, af 1958 as Assistant Professor för physiologische Ophthalmologie. Af 1960 weer he Assistant Professor (etwa dat wat in Düütschland Juniorperfesser is), af 1967 Perfesser för Physiologie (un af 1968 för Neurobiologie) in de Fakultät för Psychiatrie un siet 1974 weer he Robert Winthrop Professor för Neurobiologie an de Harvard Medical School in Boston, Massachusetts. 1973 bit 1984 weer he Vörstand (Chairman) vun de Fakultät för Psychiatrie. Van 1978 bit 1979 weer he Präsident vun de Society for Neuroscience. Af 1983 weer he Vincent Brooke Astor Perfesser in dat Labor für Neurobiologie vun de Rockefeller University, deren Labor för Neurobiologie he leiten dee un deren Präsident he 1991 bit 1998 weer.

In Tosommenarbeit mit David Hunter Hubel hett Wiesel siet de 1960er Johren in' Detail den Upbau un de Informatschonsverarbeitung vun de visuell Cortex an dat Bispeel vun Katten un Apen ünnersöcht, de, utgahnd vun dissen Ünnersöken, to dat bestutforscht Deel vun dat Gehirn wurr.

1978 wurr Wiesel mit den Louisa-Gross-Horwitz-Pries uttekent. För sien Arbeiten mit David Hubel över de Informatschonsverarbeitung bi dat Kieken wurrn beid 1981 mit en Hälft vun den Nobelpries för Physiologie oder Medizin uttekent. De anner Hälft gung an Roger Sperry. 1991 wurr Wiesel mit den Neuronal Plasticity Prize uttekent un kreeg ok dornah noch völ Priesen as den Ralph-W.-Gerard-Pries (1993), den Karl Spencer Lashley Pries, den Dickson Pries, den Rosenstiel Award, den Friedenwald Award (1975) un den Jules Stein Award (1971). 2005 kreeg he mit de National Medal of Science de hööchste wetenschaplich Utteknung vun de USA. He is mehrfack Ehrendokter.

Wiesel is Staatsbörger vun de USA. He is Liddmaat vun de National Academy of Sciences un deren Institute of Medicine, de American Academy of Arts and Sciences, de sweedsch Physiologischen Sellschopp un de American Association for the Advancement of Science.

Privates

Wiesel weer in en eerste Ehe van 1956 bit 1970 mit Teeri Stenhammar verheiraadt un in tweete Ehe van 1973 bit 1981 mit Ann Yee. He hett een Dochter Sara Elisabeth (* 1975). To sien Hobbies tellt de Kunst.

Weblenken

Torsten Wiesel. Mehr Biller, Videos oder Audiodateien to’t Thema gifft dat bi Wikimedia Commons.

• Interview (engelsch)