Tsunami (Film)
Tsunami (op DVD as Tsunami – Terror in der Nordsee) is de Titel vun en düütschen Feernsehfilm ut dat Johr 2005, den in’n Opdrag vun Pro 7 dreiht worrn is. Speelbaas weer Winfried Oelsner weer, dat Dreihbook is vun Hans-Hinrich Koch, de den Film ok produzeert hett. De Weltooropföhren vun den Film weer an’n 28. August 2005 in’t spaansche Feernsehn. In Düütschland weer de Film an’n 29. September 2005 vun Pro 7 utstrahlt.
| Filmdaten | |
|---|---|
| Plattdüütsch Titel: | — |
| Originaltitel: | Tsunami |
| Düütsch Titel: | Tsunami |
| Produkschoonsland: | Düütschland |
| Johr vun’t Rutkamen: | 2005 |
| Läng: | 90 Minuten |
| Originalspraak: | Düütsch |
| Öllersfreegaav in Düütschland: | FSK 12 |
| Filmkru | |
| Speelbaas: | Winfried Oelsner |
| Dreihbook: | Hans-Hinrich Koch |
| Produkschoon: | Hans-Hinrich Koch |
| Musik: | Johannes Kobilke |
| Kamera: | Bernhard Jasper |
| Snitt: | Daniela Beauvais |
| Dorstellers | |
| |
Inholt
ännernDe Energiekunzern Alpha Gas bedrifft Bohrinseln in de Noordsee vör Sylt. Op Rantum IV hett de bullige Kramlick dat Seggen, de bi de Ünnersöken forsch vörgeiht un vun de Bedenken vun den Ümweltbeopdragten Christian Wieland nix weten will. De Firma söcht dor ahn Verlööf na Methanhydrat, den Energiedräger för de tokamen Tiet. Wieland is mit de Methoden vun Kramlick nich inverstahn un is bang, dat de Sprengungen, de Kramlick to’n Vermeten vun de Lagersteden maken will, dat Methanhydrat to’n Tünnern bringen un dormit en Kedenreakschoon utlösen künnt.
Gedanken maakt is ok de junge Hydroloogsche Svenja Schweiger vun’t Ümweltamt vun de EU, de över de Firma keen Kuntakt to Wieland kriggt. Se is övertüücht, dat op de Plattform nich na Ööl söcht warrt un sütt de Ümwelt in Gefohr, vunwegen dat de Firma so heemlich deit, un leggt sik mit de Firmenbasen an. Se versöcht nu Wieland privat antodrapen. As se bi sien Huus ankummt, sünd jüst sien Frünnen Helge un Jaan togegen, de em to’n Angeln afholen wüllt. Se finnt Christian aver doot vör, de oogenschienlich de Trepp rünnerfallen is. In Wohrheit hett Brock, de rechte Hand vun Kramlick, em an de Siet maakt.
As Jaan later an sien Reekner sitt, kriggt he en Nettbreef vun Christian, den he vör sien Dood al opsett harr, vör den Fall, dat em wat passeert. Mit dorbi sünd Dokumenten to dat Projekt op Rantum IV, de Jaan an Svenja Schweiger wietergifft. As sik de beiden an’n Strand drapen doot, löpt jüst en Tsunamibülg op – dat Resultat vun’t Sprengmeten, dat Kramlick in de Twüschentiet hett maken laten – un verwööst de Küst. Jaan redd sik un ehr mit sien Motorrad.
Över ehrn Kollegen Wolfgang warrt Svenja wies, dat en Explosion dorachterstickt, de in de Neeg vun Rantum IV passeert is. Tosamen maakt se sik op egene Fuust op’n Weg na de Bohrinsel, üm dor na Bewiesen to söken. Vun den Fleger Holger laat se sik mit’n Heevschruver dorhen bringen. Gliektietig kriggt Kramlick Naricht vun sien Firma, dat se em afsetten wüllt wegen sien rabiat Vörgahn. Dat lett sik Kramlick nich gefallen un drauht, de letzten Sprengladungen hoochtojagen, wenn se em nich 10 Millionen Euro överwiesen doot.
Op Rantum IV warrt Svenja un Jaan foorts fangen sett. Mit de Help vun den Ingenieur Kortner kamt se wedder free. Se versöökt Kramlick optohollen, de jümmer mehr den Vestand to verleren schient. As he markt, dat Alpha Gas sien Drauhn nich eernst nahmen hett, tünnert he de Sprengladungen. De Bülg de sik dorophen opboet, is nochmol veel grötter as de eerste. Allns düüt dorophen, dat se jüst vör Sylt breken deit. Wiel sik Sylt to’n Evakueeren praat maakt, versöcht sik Kramlick dor ünner’t Volk to mischen. Jüst rechttietig hett Jaan de redden Idee, woans de Bülg noch vör Sylt to breken is un kann butendem ok noch sien Süster Franka redden, op de ehr Boot ok Kramlick uttoneihn versöcht hett.
Kritik
ännernCinema: Nach der verheerenden Flutkatastrophe in Südostasien blieb den ProSieben-Verantwortlichen nichts anderes übrig, als die für das Frühjahr geplante Ausstrahlung des ‚Event-Movies‘ zu verschieben. Jetzt ist die Trauerzeit offenbar vorbei und der TV-‚Tsunami‘ darf auf den Zuschauer zurollen. Immerhin: In dieser dramaturgisch komplett vergrützten, lachhaft kruden Mischung aus Schmonzette und Action-Thriller erinnert kaum etwas an die traurige Realität. Fazit: Lahme Nordsee-Welle mit reißerischem Titel.[1]
Anners wat
ännernDe Film is dreiht worrn vördem dat swore Eerdbeven in’n Indischen Ozean 2004 passeert is, bi den en gresigen Tsunami wiete Küstenrebeden överspöölt worrn sünd. Wegen sien Aktualität is he dormols düchtig diskuteert worrn.
Bi sien Weltpremiere in’t spaansche Feernsehn harr de Film ruchweg 5 Millionen Tokiekers. In 120 Länner is he mit hoge Quoten lopen, so ok in Thailand un Indonesien – twee Länner, de bi den echten Tsunami an dullsten wat afkregen harrn.
Ofschoonst de Tricktechnik en teemlich realistisch Bild vun de Tsunamibülgen tekent, hett de Geschicht ut wetenschoppliche Sicht natürlich nich veel mit de Wohrheit to doon.
Borns
ännernWeblenken
ännern- Tsunami in de Internet Movie Database (engelsch)