Veers
Dit Woort hett noch annere Bedüden: kiek dorför ünner Veers (Oort).
De Veers is en 31 Kilometer langen Beek, de von links in de Wümm münnt.
| Veers | |
|---|---|
| Laag | Neddersassen |
| Stroomsystem | Werser |
| Läng | 31 km |
| Afströömrebeed | 118,18 km² |
| Born | bi Snevern (op 86 m över NN) |
| Münn | bi Veersbrügg in de Wümm (op 24 m över NN) |
| Water je Sekunn | 1,45 m³/s |
| linke Blangenströöm | Kröpelbeek |
| rechte Blangenströöm | Lünzener Brookbeek |
 | |
De Born von de Veers liggt in dat Pietzmoor in’n Süüdoosten von Snevern. Von dor flütt de Beek na Westen an de enkelten Hööv Dannhost, Stimbeck, Hasselhoff un Vöden langs, de all an dat Süüdöver liggen doot. An dat Noordöver doot blangen Snevern Gallhorn un Zoarn liggen. Bi’n Lünzenbrookhoff münnt von links de Kröpelbeek in de Veers, de sien Born bi Schüllern hett. De Beek flütt denn dör Lünzen. Dor hett de Veers fröher de Möhl von Lunzmöhlen andreven.
Denn geiht dat vörbi an Grauen, Molkenreith un Nersum op dat linke Över un Riep un Riepermoor an dat rechte Över. Bi Deepen dreiht de Veers na Noordwesten. Bi Deepen liggt dat Naturschuulrebeed Hemslinger Moor un Stück wieder de Veers dal dat Naturschuulrebeed Veersdaal. Noch en Stück wieder liggt denn Westervees an dat rechte Över. Bi Westervees an de Münn von’n Lünzener Brookbeek dreiht de Beek denn wedder op Westen, kummt an den lütten Oord Veers un an Badlsdörp vörbi un münnt bi Veersbrügg twüschen Scheeßl un Wohlsdörp in de Wümm, kort nadem de Bundsstraat 75 un de Bahnlien Hamborg-Bremen noch mit Brüggen över den Beek rövergahn sünd.
Dat Water in de Wümm flütt denn wieder in de Lesum, de Werser un toletzt in de Noordsee.
In’n April 2012 hett dat en Unfall in en Biogasanlaag in Schultenwe geven, bi den 400 m³ Gäärresten in’n Lünzener Brookbeek flaten sünd. Op en Enn von negen Kilometer is allens in’n Brookbeek doodbleven un ok in de Veers ünnerhalv von Westervees sünd veel Fisch doodbleven.
An de Veers leevt vondaag ok wedder Otters.
Weblenken
ännern
Koordinaten:53° 9′ N, 9° 28′ O