Arteria subclavia

De Arteria Subclavia oder Ünnerslötelbeenarterie is en arteriell Bloodfatt, dat den helen Arm mit Blood versorgt. Se liggt ünner dat Slötelbeen (Clavicula) un billt ok en poor Aftwiegen, de den Hals un den Kopp versorgt.

De linke un rechte A. carotis communis gaht pielliek vun de Aorta na baven, na de Sieten twiegt de linke un de rechte A. subclavia af.

Verloop

De Arteria subclavia twiegt bi Minschen, Hunnen un Swien links ut den Aortenbagen un rechts ut den Truncus brachiocephalicus un liggt denn ümgeven vun Nervensträng vun’n Plexus brachialis twüschen den Musculus scalenus anterior un den Musculus scalenus medius. Blangen an lööpt de tohöörig Veen, de Vena subclavia, de ’n beten wieter ünnen twüschen den Musculus scalenus anterior un dat Slötelbeen liggt. Op ehrn Weg na de Siet lööpt de Arteria subclavia deeper as de ünnere Rand vun’t Slötelbeen un geiht denn in de Assenhöhl rin, woneem se as Arteria axillaris wieterlöpt.

Aftwiegen

Ehrn Weg langs gifft de Arteria subclavia bi’n Minsch toeerst de Arteria thoracica interna na kaudal („op'n Oors to“, na ünnen) un de Arteria vertebralis na kranial („op’n Kopp to“, na baven) af. Later twiegt de Truncus thyrocervicalis, de sik in mehrere Arterien för den Hals opdeelt, un de Truncus costocervicalis af.