Belize Natural Energy
Belize Natural Energy Limited (BNE) is en Ünnernehmen ut Belize, dat Eerdööl fördert.
Grünners sünd Susan Morrice un Mike Usher. Geschäftsföhrer is siet 2018 Marlowe Neal. Vörher weer dat von 2006 bet 2018 Gilbert Canton.
Dat Ünnernehmen harr Stand 2017 170 Lüüd in Lohn un Brood.[1] 2007 harr BNE 398 Lüüd anstellt.[2]
Historie ännern
Ofschoonst Belize in en Rebeed liggt, dat de geoloogschen Vörutsettungen för Eerdööl hett, hebbt verscheden Ünnernehmens siet de Johren 1950 över 50 Probebohrungen in Belize maakt un nix funnen.[3]
De Geologin Susan Morrice hett liekers meent, dat in Belize Ööl to finnen is un hett sik mit Mike Usher tohoopdaan un in dat Johr 2002 BNE grünnt. Dat Ünnernehmen hett 2003 en Verdrag (Production Sharing Agreement) mit de Regeren von Belize afslaten, üm ne’e Bohrungen dörtoföhren.[3] 2005 hett BNE mit dat Bohrlock Mike Usher No. 1 in Spanish Lookout (Distrikt Cayo) Ööl funnen.[3] Toeerst harr BNE sien Sitt in Belize-Stadt, is aver in’n November 2007 ümtagen na Iguana Creek twüschen de Öörd Spanish Lookout un Buena Vista.
Von 2007 bet 2009 hett dat Ünnernehmen en Anlaag boot, üm dat Eerdgas, dat anfallt, in LNG ümtowanneln.
2009 is ok in dat Öölfeld Never Delay in’n Noordoosten von Belmopan Ööl funnen worrn.[4][3]
De Fördermengen sünd blots lütt. In siene besten Tieden hett dat Öölfeld von Spanish Lookout 5000 Barrel an’n Dag produzeert un dat Öölfeld von Never Delay 500 Barrel.[4] In jüngere Tieden sünd de Fördermengen op 900 Barrel in Spanish Lookout un 50 Barrel in Never Delay fullen.[4] Dat Rohööl warrt över’n Haven von Big Creek exporteert.[4] De Fördermenge von 2005 bet Januar 2015 leeg bi 10 Milljonen Barrel.[3]
Footnoten ännern
- ↑ Jane Whaley: The Oil Within, GEO Profile in’n Februar 2017, Sied 33–36
- ↑ Tough Questions, Few Answers from Belize Natural Energy, 7 News Belize an’n 30. November 2007
- ↑ a b c d e About Us, BNE
- ↑ a b c d Crude Oil Production, Ministerium för Weertschopliche Entwicklung un Eerdööl
Koordinaten:17° 15′ N, 88° 58′ W