Bite the Bullet
Bite the Bullet (op Platt so veel as „Biet op de Kugel“; dt. Titel: 700 Meilen westwärts) is en US-amerikaanschen Western vun 1975, in den veele beropen Schauspelers mitspeelt hebbt.
| Filmdaten | |
|---|---|
| Plattdüütsch Titel: | — |
| Originaltitel: | Bite the Bullet |
| Düütsch Titel: | 700 Meilen westwärts |
| Produkschoonsland: | USA |
| Johr vun’t Rutkamen: | 1975 |
| Läng: | 126 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Richard Brooks |
| Dreihbook: | Richard Brooks |
| Produkschoon: | Richard Brooks |
| Musik: | Alex North |
| Kamera: | Harry Stradling Jr. |
| Snitt: | George Grenville |
| Szenenbild: | Robert F. Boyle |
| Dorstellers | |
| |
Inholt
ännernEn Reeg vun modig Kerls, de al ’n beten in de Johren kommen sünd, de junge, opbrusende Revolverheld Carbo un Miss Jones, en ehmalige Hoor, drapt sik to en Peerrennen, dat vun en Rutgever vun en Daagblatt utlööft warrt. De Streek schall 700 Mielen hebben un föhrt över grote Längden dör de Wööst.
De Grünnen vun de Deelnehmers, dat Rennen mittomaken sünd düchtig ünnerscheedlich. Eenige wüllt sik wichtig doon, annere wüllt sik sülvst bewiesen, dat se noch nich oolt un unnütt sünd, wedder anneren geiht dat alleen üm dat Geld, wat to winnen is. Överhööft dreiht sik all’ns üm’t Geld: Woneem sik olle Hasen drapen doot, dor verdeent lichte Deerns goot Geld un ok dat Wettgewarf bleiht op.
Vun en Moment op’n annern beslutt Sam Clayton, en Deertenfründ dör un dör, ok an dat Renenn deeltonehmen, as he spitz kriggt, dat sien Fründ vun fröher, Luke Matthews, ok mitmaken deiht. Man Sam ünnerscheed sik vun all de anneren, wiel he jümmer praat is to helpen, wenn annere in en Nootlaag sünd, wat in Verloop vun dat Rennen faken vörkummt. Vör allen aver passt he jümmers op, dat de Deelnehmers jemehr Peer goot behannelt un tütt jeden to Verantwoorden, de dat nich deiht.
Wiel dat Rennen mööt de Deelnehmers bit an de Grenzen gahn, vun wat se in de Laag sünd, tostannen to bringen. Duert nich lang, bit de eersten op de Streck blievt un opgeven mööt, as jem kloor warrt, dat se de Strapazen nich wossen sünd. Na un na warrt de Tokieker wies, woneem de Lüüd so tohopenkommen sünd, worüm se dat Rennen bestriedt un wokeen se överhöfft sünd. Dat passeert bi de Gespreken an’t Lagerfüer oder an de Kontrollpunkten, woneem de Rieders vörstellig to warrn hebbt. Mit de Tiet warrt de Deelnehmers jümmer weniger un blots noch en Handvull kummt för den Sieg in Fraag. Bi all de Konkurrenz warrt dorbi ok Fründschoppen slaten.
Opletzt kummt dat to en Meten twüschen de beiden ollen Kameraden. Sam, de de Nees vör hett un dat Teel al vör Oogen sütt, markt aver, dat sien Peer em nich länger dregen kann. Ut Rücksicht stiggt he af un löppt tofoot wieter un gifft dor den Sieg mit op. Luke kummt nöger. Man liekers för em bannig veel Geld op’t Speel steiht, beslutt he, sien Fründ nich to överhollen. He stiggt ok af un geiht blangenan. Tohopen gaht se över de Teellienen.
Thematiken
ännernDe Film Bite the Bullet is en nich so ganz tyypsch Western. De Film hett woll de tyypschen Elementen vun en klassisch Western mit de klischeehaftigen Rullen, de dor so mit tohöhrt, kummt aver mit ganz wenig Gewalt un Scheeteree ut. In’n Vördergrund steiht de Deertenfründ Sam Calyton, de sik dör Insicht, Fairness, Respekt un de Helpspraatschop uttekend. He schuult nich blots Deerten, man ok Butensieters as t. B. de fröhere Hoor oder den Mexikaner, de vun all anneren verspott warrt.
Dör sien Hanneln sett he Teken, de bi eenige vun de annern opnahmen warrt. So bi Miss Jones, de Hoor, de ehrn Mann en Straaf bi’n Utbo vun en Bahnstreek afarbeiden mutt. Ehr egentlich Plan is, em wiel dat Rennen, freetosetten. As he aver vun de restlichen Deelnehmers de Peerd klauen will, verfolgt Sam un Luke den Utrieter. De aver stellt jüm en Fall, man jüst as de beiden Helden dorop rinfallen schüllt, warrt se vun Mis Jones warnt, de dorbi riskiert, sülvst in Gefohr to kommen. Un ok de junge Carbo, dat Hittblood, lehrt sien Deel un wiest sik an’n end insichtig. De gegensietig Respekt tütt sik as en roden Faden dör den Film un schapt sien Höögpunkt to’n Sluss, as de beiden Frünnen de Mööglichkeit för jemehr egen Sieg nich wohrnehmt.
Kritiken
ännern- In großartigen Bildern umgesetzte Unterhaltung. (Lexikon vun’n internatschonalen Film)
- Richard Brooks drehte den an Spannung kaum zu überbietenden Post-Western nach einer wahren Begebenheit. Er zeichnet gekonnt - und durchaus mit einer Menge ironischer Zwischentöne - das Bild von im Leben gestrauchelter Personen, die sich aus unterschiedlichen Motivationen als Glücksritter versuchen. Ein Klassiker! (Prisma Online)
Utteken
ännern- De Film weer 1976 tweemol för den Oscar nomineert in de Kategorien Best Toon un Best Filmmusik.
- Uttekend worrn is de Film in dat lieke Johr mit den Bronze Wrangler vun de Western Heritage Awards.
Websteed
ännern- Bite the Bullet in de Internet Movie Database (engelsch)