Borislav „Bora“ Kostić (* 24. Februar 1887 in Vršac, Banat, Öösterriek-Ungarn, hüüd Serbien; † 3. November 1963 in Belgrad) weer en bedüüdend jugoslaawsch Schachmeester.

Denkmal in Vršac

Leven ännern

Kostić hett dat Schachspeel eerst mit 16 Johren lehrt. Wiels sien Studium in Wien un Budapest harr he sien eerst Erfolge. 1910 wunn he Wettkämpe gegen Frank James Marshall (+1, =2) un Paul Saladin Leonhardt (+3 =1 −1). Sein eerst internatschonal Turnier speel he 1911 in San Remo, wo he sück mit Dawid Przepiórka Platz 4 un 5 deelen dee. Sien nächst groot Turnier weer Karlsbad 1911, dor keem he aber över en deelten 19. Platz nich herut. Wiels den Eersten Weltkrieg is Kostić nah Süüdamerika översiedelt un speel hööftsächlich Wettkämpe gegen süüdamerikaansch Meester. In Buenos Aires 1913 hett he Roland Ilia 6:0 slahn, in Rio de Janeiro Vilageza 8:1, in Santiago de Chile Martinez Lopez 7:0 un in Lima Fernandez Coriha 7:0. Vun 1915 bit 1919 hull he sück in de USA up. Ok dor is he up stark Speler drapen: In Frankfort/Kentucky 1916 wunn he en Wettkamp gegen Jackson Whipps Showalter mit 9,5:4,5 (+7 =5 −2). 1918 wurr he bi en Turnier in New York Tweet achter den lateren Weltmeester José Raúl Capablanca, aber noch vör Marshall un Oscar Chajes. 1919 weer he Capablanca in Havanna in en Wettkamp mit 0:5 ünnerleegen. Nahdem de Krieg vörbi weer, kehr Kostić torüch nah Europa. 1919 wurr he Tweet (achter Capablanca, aber vör Georg Alan Thomas un Frederick Dewhirst Yates) in Hastings, 1920 deelt Tweet in Bromley, 1921 Eerst in Gyula un Hastings.

In de Johren 1924 bit 1926 hett Kostić en Weltreis maakt, de he sück mit Simultan- un Blindschachvorführungen betallen dee. He weer dorbi in Australien, Süüdafrika, Indien, de Philippinen un anner exotische Länner, um dor Schach to spielen. Tallriek Partien ut disse Tiet hemm sück erhollen.

As he weer in Europa weer, hett he ok weer an de bedüüdenst Turnieren deelnommen. In de Johren 1927 in London, 1931 in Prag, 1935 in Warschau un 1937 in Stockholm hett he Jugoslawien up Schacholympiaden vertreeden[1], buterdem hett he ok an de inoffiziellen Schacholympiaden 1926 in Budapest un 1936 in München (bi de he dat beste Eenzelergevnis an dat sösste Brett recken dee) deelnommen.[2] 1928 wunn he in Trenčianske Teplice (vör Endre Steiner, Friedrich Sämisch un Rudolf Spielmann). 1935 wurr he bi de eerstmals utspeelt jugoslaawsch Meesterschap in Belgrad Eerst gemeensam mit Vasja Pirc. Sien gröttsten Turniererfolg fier he 1938 in Ljubljana, as he vör László Szabó, Savielly Tartakower un Lajos Steiner wunn.

Nah dat Enn’n vun den Tweeten Weltkrieg, den he tietwies ok in Konzentratschonslager verbrocht hett, kunn he an de Vörkriegserfolge aber nich mehr anknütten. He nehm woll noch bit 1950 an eenig natschonalen Turnieren deel, harr dorbi aber nich völ Spood. 1962 hett he noch en Veteranenturnier in Zürich gemeensam mit Henry Grob wunnen.

Sien best historsch Elo-Tall weer 2706. De reck he in’n Mai 1921. To disse Tiet weer he de sössbeste Speler up de Welt.[3]. Vun de FIDE kreeg he 1950 den Titel Grootmeester tospraken.

Literatur ännern

  • Dušan Bućan, Petar Trifunović, Aleksandar Božić: Ambasador šaha. Hronika o velemajstoru Bori Kostiću, Belgrad 1966.
  • Alfred Diel: Globetrotter des Schachspiels. In: Kaissiber Nr. 25 (2006), S. 56–57.

Weblinks ännern

Enkeld Nahwiesen ännern

  1. Boris Kostić sien Ergevnisse bi Schacholympiaden up olimpbase.org (engelsch)
  2. Boris Kostić sien Ergevnisse bi inoffiziellen Schacholympiaden up olimpbase.org (engelsch)
  3. Borislav Kostić sien historsch Elo-Zahl bi chessmetrics.com (engelsch)