Bundsministerium för Ümwelt, Naturschuul, Bo un Reaktersekerheit

Dat Bundsministerium för Ümwelt, Naturschuul, Bo un Reaktersekerheit (BMU), dat tomeist kort as Bundsümweltministerium betekent warrt, is en Ministerium vun de Bundsrepubliek Düütschland. Dat Ministerium ist eerst 1986 grünnt worrn. Sien eersten Deenstsitt is in Bonn, de tweete Deenstsitt is in Berlin.

De Hööftsitt vun’t BMU in Bonn. Vörher weer dat, bit 1997,de Sitt vun’t Postministerium.

Struktur

Dat Bundsümweltministerium kümmert sik an vörderste Steed üm de Ümweltpolitik un üm de Fragen to’n Ümweltschuul in Düütschland. Dat Seggen hett de Minister för Ümwelt, Naturschuul un Reaktersekerheit, de den „beamteten“ Staatssekretär ünner sik hett. De vun’n Minister beropenen beiden Parlamentaarschen Staatssekretären heebt keen Dörgreep op de Verwaltung. Opstunns gifft dat in’t Ümweltministerium 814 Mitarbeiters, de sik op söss verscheden Afdelen verdeelt. Dat sünd:

Afdeel ZG: Zentraalafdeel, Grundsatzfragen to’n Ümweltschuul
Afdeel KI: Klimaschuul, Nakamen Energieoorden un internatschonale Tosamenarbeit
Afdeel WA: Waterweertschop, Affallwertschop, Boddenschuul un Ooltlasten
Afdeel IG: Immisschoonsschuul, Utwirken op de Gesundheit, Ümwelt un Verkehr, Anlagen- un Chemikaliensekerheit
Afdeel N: Natur- un Oordenschuul, Gentechnik, Ümweltfragen in de Land- un Forstweertschap
Afdeel RRS: Strahlenschuul, Sekerheit vun de Atomanlagen, nukleaar Versorgen un Affallentsorgen

To dat Arbeitsrebeet vun’t Ümweltministerium höört butendem dat Bundsamt för Naturschuul (BfN), dat Bundsamt för Strahlenschuul (BfS) un dat Ümweltbundsamt (UBA). Praat staht ok verscheden Gremien, wo Lüüd mit Saakverstand binnen sitt, de Expertisen un Gootachten maken künnt. Dorto tellt de Raat vun de Saakverstännigen för Ümweltfragen (SRU), de Wetenschopplich Biraat vun de Bundsregeeren Globale Ümweltännern (WBGU), de Reaktersekerheitskomisschoon (RSK), de Strahlenschuulkomisschoon (SSK), de Komisschoon för Anlagensekerheit (KAS) un de Ümweltgootachterutschuss (UGA).

De Bundshuushalt hett den BMU för 2005 tohopen 769 Millionen Euro praatstellt. Man, ok annere Ministeriem hebbt Geller för ümweltpolitische Opgaven, so dat sik de Ümweltutgaven vun’n Bund tosamen op 7,438 Milliarden Euro summeert.

In’t BMU sünd ok Uttobillene anstellt, de in de Beroopstwiegen „Fackanstellte för Bürokommunikatschoon“, „Fackanstellte för Medien- un Informatschoonsdeensten – Fackricht Bökeree“ un „Verwaltungsanstellte“ utbillt warrt. De Utbilln löpt vullstännig in Bonn af.

Historie

Dat Bundsümweltministerium is an’n 6. Juni 1986 grünnt worrn, ruchweg fief Weken na de swore Reakterkatastrooph vun Tschernobyl. De dormolige Bundsregeeren wull mit dissen Schritt dorför sorgen, dat de Tostännigkeiten op dit Rebeet in een hand tosamen kamt, dat de ne’en ümweltpolitischen Opgaven beter angahn to künnen. Dorvör weern de Saken vun’n Ümweltschuul op de verscheden Ressorts Binnen-, Landweertschaps- un Gesundheitsministerium verdeelt.

In de Tiet vun’t Grünnen bit 1998 is dat Ministerium vun CDU-Politikers bekleedt worrn. De eerste weer Walter Wallmann. He heet dat Amt keen Johr later al wedder opgeven, vun wegen dat de Ministerpräsident vun Hessen worrn is. Sünners ünner sien Nafolger Klaus Töpfer, de later utföhren Direkter vun de UN-Ümweltorganisatschoon UNEP woorn is, geev dat veele Ännern in de Ümweltgesetten. Dorna weer Angela Merkel in dat Amt, man se harr nich veel Glück mit ehr Arbeit dor. Dat Bundsministerium künn in ehr Amtstiet blots wenig Saken in de Regeeren dörsetten, wieldat de Ümweltschuul jümmer mehr as en Hinnern för de weertschopplilche Entwickeln ansehn weer, de al so in de Kries weer.

Mit de eersten Root-Grönen Koalitschoon hett 1998 Jürgen Trittin vun Bündnis 90/De Grönen dat Ministeramt övernahmen. Dormit geev dat wedder en starker’t Inseten för de Ümweltschuul un in sünnere Fragen ok en Wessel vun de ümweltpolitischen Ansicht. Dat hett sik to’n Bispeeel bi dat Thema Atomutstieg wiest, oder bi’t Endlagern vun radioaktiven Affall (kiek bi AkEnd) oder bi de Ökostüer. Dat Rebeet Bo is eerst 2013 dorto kamen. Dorför weer dat dat Ministerium för Ümwelt, Naturschuul un Reaktersekerheit.

Opstunns föhrt de SPD-Politikersche Svenja Schulze dat Ümweltminsterium in de Groten Koalitschoon ünner Angela Merkel.

Websteden

Offizielle Websteed mit PDF-Dokumenten to’n Rünnerladen (hoochdüütsch)

Ümweltministers vun de Bundsrepubliek Düütschland

Bundsministerien in Düütschland