Camp Bay (Roatán)

Camp Bay is en Oort op dat Eiland Roatán (Islas de la Bahía) in dat Municipio José Santos Guardiola, Departamento Islas de la Bahía, Honduras. Binnen dat Municipio höört de Oort to de Aldea José Santos Guardiola.

Geografie

De Oort liggt an de Karibische See an de Noordküst von Roatán un dorbi temlich in’n Oosten von dat Eiland. Vör de Küst doot Krallenriffs von dat Maya-Riff liggen. In’n Süüdwesten von Camp Bay liggt de Picacho Hill, wat mit 224 m över de See de tweethöögste Punkt von Roatán is. In’n Westen liggt dat Kap Alligator Nose.

De Naveröörd sünd Santa Elena in’n Oosten, Port Royal in’n Süüdoosten, Calabash Bight un Oak Ridge in’n Süüdwesten un Punta Gorda un Diamond Rock in’n Westen. Santa Elena is dorbi dör en fucht Mangrovenholt von’n Rest von Roatán afdeelt un warrt af un an ok as egen Eiland tellt.

Weertschop un Infrastruktur

Wichtig för de Weertschop weer traditschonell de Fischeree. Aver vondaag speelt de Tourismus en grote Rull, de ünner annern von’n langen Sandstrand (Camp Bay Beach) antagen warrt, de de längste op Roatán is.

Verkehr

De eenzige Straat föhrt in’n Süüdwesten twüschen Diamond Rock un Oak Ridge langs na French Harbour un wieder na Coxen Hole.

De nächste Flegerhaven is de Juan Manuel Gálvez International Airport bi Coxen Hole.