Echte Heemken

De Echten Heemken (Gryllidae), up Nedersaksisch Heumse, sünd en Familie mank de Insekten. Se höört to de Ornen vun de Langspriet-Haupeer (Ensifera) mit to un staht dor gegen de Loofhaupeer (Tettigoniidae) over.

Echte Heemken
Grasheemke (Gryllus campestris), Seken
Systematik
Stamm: Liddfööt (Arthopoda) Ünnerstamm: Tracheendeerter (Tracheata) Böverklass: Sessfööt (Hexapoda) Klass: Insekten (Insecta) Ünnerklass: Fleeginsekten (Pterygota) Böverornen: Neeflunken (Neoptera) Ornen: Haupeer (Orthoptera) Ünnerornen: Langspriet-Haupeer (Ensifera) Böverfamilie: Heemken (Grylloidea) Familie: Echte Heemken (Gryllidae)
Wetenschoplich Naam
Gryllidae
Laicharting, 1781

Kennteken

As all Langspriet-Haupeer sünd de Achterbeen bi de Echten Heemken wat langer. Dor könnt se denn beter mit jumpen. De Föhlspriete laat na en langen Faden. Gegen de Loofhaupeer over, de dat Vördeel vun ehre Flunken as en Dack nevenanner stellt, wenn se nich flegen doot, liggt de Deekflunken bi de Heemken platt over’nanner. Meist liggt dor de rechte Flunken over den lunken. All Heemken möögt dat geern, wenn dat warm is. Se höört to de Insekten, de sik nich verpoppen doot. Vundeswegen hannelt sik dat bi ehre Larven um Nymphen, de al bannig na de Olen slaht.

Gesang

De Gesang bi de Heemken kummt tostanne, wenn de so nömmte Schrillader an de Unnerkant vun den rechten Vörflunken fix over de Achterkant vun den annern Vörflunken reven warrt. Dat warrt denn Stridulatschoon nömmt. Mit so’n Luudgeven grenzt de Heken ehr Revier af gegen annere Heken, un se lockt dor ok de Seken mit an.

Aarden

Bi de allerhand Unnerfamilien gifft dat over de ganze Eer hen mehr as hunnert Aarden mank de Echten Heemken. Hier en Utwahl:

• Brachytrupinae
• Gryllinae
  • Trütje – Acheta domesticus
  • Kortflunkenheemke – Gryllodes supplicans
  • Steppenheemke – Gryllus assimilis
  • Middellansche-See-Heemke – Gryllus bimaculatus
  • Grasheemke – Gryllus campestris
  • Suzumushi – Meloimorpha japonica
  • Ööstlich Heemke – Modicogryllus frontalis
  • Wooldheemke – Nemobius sylvestris
  • Sumpheemke – Pteronemobius heydeni
  • Mormonenheemke – Anabrus simplex
• Gryllomiminae
• Gryllomorphinae
• Itarinae
• Landrevinae
• Blötenheemke – Oecanthinae
  • Wienheemke – Oecanthus pellucens
• Sclerogryllinae

De Hunnenkröpels (Gryllotalpidae) höört nich to de Echten Heemken mit to. Se stellt, binnen desülvige Ornen, en egen Familie dor.

Literatur

• Max Beier, Lucien Chopard: Orthopterorum Catalogus. Junk, Den Haag 1962–71.
• Max Beier, Franz Heikertinger: Grillen und Maulwurfsgrillen. in: Die neue Brehm-Bücherei. (119), Westarp, Hohenwarsleben 2003. (Utgave vun 1954 nahdruckt) ISBN 3-89432-585-2.
• Huber, Franz: Lautäusserungen und Lauterkennen bei Insekten (Grillen). Westdeutscher Verlag, Opladen 1977. ISBN 3-531-08265-5.
• Otte, Daniel: Orthoptera species file. Band 1, Philadelphia 1994. ISBN 0-9640101-1-9, ISBN 0-9640101-2-7.
• Otte, Daniel & Richard D. Alexander: The Australian crickets. Philadelphia 1983.
• Ragge, David R. & W. J. Reynolds: The songs of the grasshoppers and crickets of Western Europe. Harley, Colchester 1998. ISBN 0-946589-49-6.

Weblenken

Echte Heemken. Mehr Biller, Videos oder Audiodateien to’t Thema gifft dat bi Wikimedia Commons.