Evan X Hyde
Evan X Hyde (Evan Anthony Hyde; * 30. April 1947 in Belize-Stadt) is en Schriever, Journalist un Politiker (UBAD, PUP) ut Belize.
Evan Anthony Hyde is 1947 as öllst Kind von Elinor Belisle un Charles Bartlett Hyde in Belize-Stadt (Brietsch-Honduras) boren.[1] Siene Familie weren Kreolen. He weer op dat St. John’s College in Belize-Stadt. He hett von 1965 bet 1968 op dat Dartmouth College in Hanover (USA) studeert un dor 1968 en Bachelor in Engelsch maakt. Trügg in Belize is he Schoolmeester an dat Belize Technical College worrn.
Op de Universität in de USA is he mit de Ideen von de Börgerrechtsbewegung un Black Power in Kuntakt kamen, de sik för de Rechten von de Swarten insett hebbt. Dat hett op Hyde groten Indruck maakt un as Hyde na Belize trügg weer, hett he düsse Ideen in dat Land mitbröcht. He hett an’n 9. Februar 1969 mit annere de United Black Association for Development (UBAD) grünnt. De eerste Präsident weer Lionel Clarke un Hyde weer Sekretär, man Hyde hett denn al in’n März 1969 as Präsident övernahmen. In dat Johr 1969 hett Hyde sien tweten Vörnaam afleggt un dorför dat X insett. De Naam X steiht in för de unbekannten Vörfohren, de jemehr Naams dör de Slaveree verloren harrn.[1]
Noch 1969 hett Hyde sien Arbeid an dat Belize Technical College wedder opgeven, üm sik op de Arbeid in de UBAD to kunzentreren.
In’n August 1969 hett he toeerst dat Bladd Amandala rutgeven, wat en Parteibladd von de UBAD weer.[1] In’n März 1970 sünd Hyde un de Amandala-Journalist Ismail Shabazz as Opröhrer vör Gericht kamen, von wegen Artikels, de se in Amandala schreven harrn. In’n Juli 1970 sünd se aver freespraken worrn.
Bi de Stadtraadswahl in Belize-Stadt 1971 sünd UBAD un NIP tohoop as Coalition 9 antreden. Hyde weer de Spitzenkannedaat, aver de Koalitschoon kunn keen Afornten in’n Stadtraad bringen.[2]
1973 hett en groten Deel von de UBAD beslaten, mit de National Independence Party un annere Gruppen tohooptogahn, üm de Oppositschoonskräft in de United Democratic Party (UDP) to vereenigen. Hyde weer dorgegen un is Parteibaas von de Rest-UBAD bleven.
Bi de Parlamentswahl in Belize 1974 weer he Kannedaat för de UBAD in’n Wahlkreis Collet un hett 4,1 % von de Stimmen haalt. Dormit keem he op’n drüdden Platz achter Vernon Harrison Courtenay von de PUP un Kenneth Tillett von de UDP un kunn nich in dat Repräsentantenhuus von Belize intehn.
Na de verloren Wahl hett Hyde denn UBAD oplööst un sik op’n Journalismus kunzentreert. Blangenbi hett he aver ok jümmer wedder Böker schreven. Bi de Stadtraadswahl in Belize-Stadt 1977 is Hyde nochmaal för de People’s United Party (PUP) antreden, kunn sik aver nich dörsetten.[2]
He is sietdem Rutgever un Alleenbesitter von dat Bladd Amandala un dat Medienünnernehmen Kremandala.[1] To Kremandala höört blangen Amandala ok de Radiosenner KREM Radio, de in’n November 1989 anfungen hett, to sennen. Hyde weer in de Johren 1970 Radiomoderator bi Radio Belize, is dor aver 1978 vör de Döör sett worrn. Dorüm hett Hyde sien egen Senner grünnt.
2004 hett tosätzlich de Feernsehsenner KREM TV anfungen to sennen, de ok to Kremandala höört.
Hyde weer in eerste Eh verheiraadt mit Audrey Scott, mit de he veer Kinner harr. Nadem he sik hett scheden laten, harr he noch dree Kinner mit Claudette Coleman. Mit ehr harr he den Söhn Cordel Hyde, de Politiker worrn is. Ut noch en annere Beziehung hett Hyde noch en Dochter.
Twüschen 1993 un 1998 weer he ok Maat von’n Senaat.
Warken
ännern- Knocking Our Own Ting. Benex Press, 1969
- North Amerikkkan Blues. Angelus Press, 1971
- The Crowd Called UBAD. 1972
- Feelings. Angelus Press, 1975
- Poems of Passion, Patriotism and Protest. 1981 (tohoop mit Rowland Parks un Dickie Bradley)
- Sports, Sin and Subversion. Ramos Publishing, 2008