United Black Association for Development

De United Black Association for Development (UBAD) weer en Organisatschoon un polietsche Partei in Brietsch-Honduras/Belize, de von 1969 bet 1974 bestahn hett. De Partei hett to de Black-Power-Bewegung höört.

HistorieÄnnern

Von 1965 bet 1968 hett Evan X Hyde op dat Dartmouth College in Hanover (USA) studeert is dor mit de Börgerrechtsbewegung un Black Power in Kuntakt kamen, de sik för de Rechten von de Swarten insett hebbt. Nadem he na Brietsch-Honduras trügg weer, hett he sik ok in sien Heimaatland för düsse Ideen insett. He hett Vörlesungen in dat Extra-Mural Department von de University of the West Indies in Belize-Stadt hollen.[1] Na en Vörlesung in dat Bliss Institute in’n September 1968 över Black History hebbt sik Lüüd in de United Black Culture Association tohoopfunnen, de sik dor över uttuuscht hebbt. Dat hett dorto föhrt, dat düsse Lüüd an’n 9. Februar 1969 de United Black Association for Development grünnt hebbt.[1] De eerste Präsident weer Lionel Clarke, Hyde weer Sekretär von de Organisatschoon. UBAD hett en Bäckeree bedreven, de UBAFU nöömt worrn is (in de Garifuna-Spraak dat Woord för Macht). De Bäckeree weer Deel von en Programm, bi dat Schoolkinner in Belize-Stadt en Fröhstück praatstellt worrn is.

Blangen de UBAD hett sik 1969 ok dat Peoples Action Committee (PAC) billt, bi dat Assad Shoman un Said Musa de Anföhrers weren. Wieldes sik de UBAD mehr op Kultur un Bildung hollen dee, weer dat PAC starker in de Politik ünnerwegens.[1]

In’n August 1969 hett de UBAD anfungen, dat Bladd Amandala (von amandla, dat Nguni-Woord för Macht) ruttobringen.

In’n Oktober 1969 hebbt sik UBAD un PAC tohoopdaan un sik Revolitical Action Movement (RAM) nöömt.[1] Dat PAC harr sien egen Bladd, dat FIRE heten dee. Amandala un FIRE hebbt sik tohoopdaan un dat Bladd hett Amandala with FIRE heten.

Evan X Hyde weer Präsident von dat RAM, Viez-Präsident weer Assad Shoman, Schatzmeester Ismael Shabazz un Vörsitter (Chairman) Albert Faber.[1] Dat eerste RAM-Drepen weer an’n 22. Oktober 1969.[1]

Al in’n Januar 1970 sünd PAC un UBAD wedder uteneen un ok Amandala hett dat with FIRE wedder ut’n Naam streken.

In’n Februar 1970 hebbt Hyde un Shabazz in Amandala en Artikel mit’n Naam Games Old People Play hatt, in den se de Justiz von Brietsch-Honduras angriepen deen.[1] Dor sünd se an’n 5. März för fastnahmen worrn.[1] Se sünd as Opröhrers anklaagt, aver an’n 7. Juli 1970 freespraken worrn.[1]

In’n Loop von dat Johr 1970 is de UBAD von dat kulturelle Flach jümmer mehr na dat polietsche övergahn un an’n 15. Juli 1970 hett sik de UBAD bi en Drepen in de Liberty Hall (bedreven von de UNIA) to en polietsche Partei verkloort.[1]

Bi en Parteidrepen in de Liberty Hall an’n 12. August 1970 is Hyde as Präsident wählt worrn, Galento X Neal as Viez-Präsident, Charles X Stamp as Vörsitter, Lillette Barkley as Generaalsekretär un Ismael Shabazz as Schatzmeester.[1] In’n November 1970 hett Hyde dat Amt as Präsident opgeven un Galento X Neal is Präsident worrn.[1] Bi’n Parteidag an’n 28. Februar 1971 is Hyde wedder Präsident worrn, Neal Viez-Präsident, Shabazz Schatzmeester, Wilton Meighan Generaalsekretär un Rufus X Schatzmeester.[1]

Bi de Wahl to’n Stadraad von Belize-Stadt an’n 8. Dezember 1971 is de UBAD tohoop mit de National Independence Party (NIP) as Coalition 9 antreden.[2] Von de negen Kannedaten kunn sik aver nüms dörsetten un de People’s United Party (PUP) hett all negen Seten wunnen.[1]

In dat Johr 1972 sünd de Aktivitäten von de UBAD wat minner worrn. An’n 1. Juni hett de Partei aver en Demonstratschoon organiseert, bi de Steen op de Baadschop von Guatemala smeten worrn sünd.[1] Ok Regerungsgebüüd un Geschäften an de Albert un Regent Street in Belize-Stadt sünd angrepen worrn.[1] Düsse Demo hett dorto föhrt, dat 15 Lüüd fastnahmen worrn sünd, mank jem Norman Fairweather.[1]

In dat Johr 1973 hett dat Gespreken twüschen de verscheden Oppositschoonspartein in Belize geven, de jemehr Kräft gegen de PUP verenen wullen.[1] UBAD hett an de Gespreken deelnahmen, hett sik denn aver nich bedeligt, as sik NIP, People’s Development Movement un Liberal Party to de United Democratic Party (UDP) tohoopdaan hebbt.[1] Liekers sünd en Reeg Maten von de UBAD to de ne’e Partei överlopen.[1]

Bi de Parlamentswahl in Belize an’n 30. Oktober 1974 is de UBAD antreden un Hyde weer Kannedaat in’n Wahlkreis Collet.[1] He hett blots 4,1 % von de Stimmen haalt. Annere Kannedaten hett dat nich geven.

Na de verloren Wahl hett de Partei en Statement rutgeven, in dat se seggt hebbt, dat de Politik von de UBAD op de Politik von de PUP-Regeren jüstso as op de von de UDP inwarkt harr.[1] Dat fröhere UBAD-Maat Assad Shoman weer nu Minister för de PUP, wieldes UBAD-Sympathisanten so as Philip Goldson, Paul Guerrero, Said Musa un Teodocio Ochoa in dat Repräsentantenhuus oder in’n Senaat sitten deen.[1] Dormit harr, so meen Hyde, UBAD doch veel reckt, ok wenn de Partei sülvs keen Mandaten harr.[1] To’n 1. November 1974 hett sik de Partei denn oplööst.[1] Nableven is aver dat Bladd Amandala, dat as Daagbladd bet in de Nutied rutgeven warrt.

FootnotenÄnnern

  1. a b c d e f g h i j k l m n o p q r s t u v w x y Lawrence Vernon: A History of Political Parties in Belize 1950–1981.
  2. Myrtle Palacio: Belize City Council Election Results 1962 to 2003