Flegen

De Flegen (Brachycera) sünd, gegen de Muggen (Nematocera) over, de annere Unnerornen vun de Tweeflunken (Diptera). Mank de Flegen gifft dat bannig veel Familien.

Flegen
Brummer (Calliphora spec.)
Systematik
Domään: Eukaryota ahn Rang: Veelzellers (Metazoa) Afdeel: Geweevdeerter (Eumetazoa) Ünnerafdeel: Tweesiedendeerter (Bilateria) ahn Rang: Ehrdermünner (Protostomia) Böverstamm: Huututtreckers (Ecdysozoa) Stamm: Liddfööt (Arthopoda) Ünnerstamm: Tracheendeerter (Tracheata) Böverklass: Sessfööt (Hexapoda) Klass: Insekten (Insecta) Böverornen: Neeflunken (Neoptera) Ornen: Tweeflunken (Diptera) Ünnerornen: Flegen (Brachycera)
Wetenschoplich Naam
Brachycera
Schiner, 1862

Leven

En Flege leevt, wenn se utwussen is, faken bloß en paar Dage oder Weken. De meiste Tied bringt se as Budde to, wo se in allerhand unnerscheedlich Umto un up allerhand verscheden Substrat leven deit. As utwussene Fleege (Imago) is se in use Breeden tomeist vun April- bit Oktobermaand togange. Den Winter könnt de Deerter in all Phasen vun ehr Leven overstahn, wenn se in ehr Umto Schuul finnt. Tahlrieke Aarden sünd bloß man in’n Winter aktiv, sogor, wenn se utwussen sünd.

Freten

Flege up en Pizza

Flegen freet all orgaansche Substanzen. Dor kann sik dat um orgaansche Stoffe bi hanneln, de ut’neen fallt un vergammelt, man ok um annere Deerter, de se jagen doot, oder wo se as Parasiten an sitten doot. Meist nehmt de Budden un ok de adulten Flegen Freten to sik. En paar Flegenaarden weert vun de Minschen as Untüüch ankeken, wiel datt se Planten freet, de de Buern anboot hefft (u. a. allerhand Bohrflegen).

Vermehren

Twee Flegen paart sik

Kopp vun en Flege

Allerhand Aarden leegt de Eier allerwegens hen un scheert sik denn dor nich wieter um. Dormit de Aart overleven deit, mütt denn unbannig veel Eier afleggt weern. Man dat gifft ok Flegen, de pleegt ehr Brödels, sunnerlich mank de Parasiten. In de matigen Zonen mit ehre düütlichen Johrtieden, gifft dat allerhand Aarden, de könnt in een Johr en ganze Reeg vun Generatschonen tostanne bringen. Wie sik de Flegen vermehrt, dat hangt bannig vun dat Klima af un dorvun, of noog to Freten dor is. Vundeswegen kann dat elk Johr anners utsehn.

Brummers up Kohschiete

Deel vun en Huusflege ehr Been

Fleeschlege in Portugal. Se maakt mit Vör- un Achterbeen Kopp un Flunken rein. Film mit halve Snellheit, dormit een beter sehn kann, wat de Flege maakt.

Dat gifft Flegenaarden, de bringt en Deel vun ehr Leven in Fleesch oder Schiete to, oder in orgaansch Material, dat vergammeln deit. Dor is dat mööglich, datt se Kieme upnehmt, de Krankheiten utlösen könnt un de se as Vekters an Minsch un Veeh fuddergeevt. Sunnerlich verscheden Aarden vun de Brummers (Calliphoridae), Fleeschflegen (Sarcophagidae) un Echte Flegen (Muscidae, u. a. de Huusflege, de wiethen vorkamen deit) stöört de Minschen un könnt Krankheiten overdregen. Ehre Budden freet Affall un sitt in dode Planten un Deerter. De wecken Aarden leevt as Endoparasiten ok in Geweev, dat noch levennig is un maakt ehren Weert krank.

Systematik

De Flegen weert in twee Gruppen updeelt, je nadem, wie se ut ehre Poppen utkrupen doot: Dat gifft Spleetkrupers (Orthorrapha) un Deckelkrupers (Cyclorrhapha).

Familien un Aarden (Utwahl)

• Bauen, Tabanidae
• Brummers, dormank Lucilia caesar, Lucilia sericata, Goldflege
• Echte Flegen, dormank de Huusflege (Musca domestica)
• Fruchtflegen Drosophilidae
• Schachbrettflegen Sarcophagidae, dormank Sarkophaga carnaria
• Stahflegen, Syrphidae
• Strandflegen (Helcomyzidae)
• Asteia concinna
• Oxypsila abdominalis
• Psila fimetaria
• Setisquamalonchaea fumosa

Literatur

• Joachim Haupt & Hiroko Haupt: Fliegen und Mücken. Beobachtung – Lebensweise. Weltbild, Augsborg 1998, ISBN 3-89440-278-4

Weblenken

Flegen. Mehr Biller, Videos oder Audiodateien to’t Thema gifft dat bi Wikimedia Commons.