George Shearing
George Albert Shearing (* 13. August 1919 in London; † 14. Februar 2011 in New York City, New York[1]) weer en US-amerikaansch Jazz-Pianist vun britisch Herkunft.
Shearing, vun Geburt an blind, fung mit dree Johren an, Klaveer to speelen. Indem he Jazz-Upnahmen „afhörn“ dee, broch he sück de musikalschen Grundtüüg vun de Stil sülvst bi un fung bald an, in Londoner Hotels, Clubs un Bars uptotreden; af un an alleen, fakener in Danskapellen.
1940 wurr Shearing Liddmaat in de damals anseggt Band vun Harry Parry. He speel för de BBC, ünner annern mit den Jazz-Geiger Stéphane Grappelli un mit Jimmy Skidmore. 1946 gung de Pianist in de USA, deren Staatsbürgerschap he 1955 annehm.
As Baas vun en Quintett (Klaveer, Gitarr, Bass, Slagtüüch un Vibraphon), in dat över de Johren Musiker as Cal Tjader, Charlie Shoemake, Chuck Wayne, Marjorie Hyams, Denzil Best, Israel Crosby, Joe Pass, Pat Martino un Gary Burton mitwarkten, nehm Shearing en Antall hööchst spoodriek Schallplatten up; dorünner „September in the Rain“, sien eenzig Hit in de US-Charts, un „Lullaby of Birdland“. Sien Stil, de ünner annern dat Unisono-Speel vun Klaveer un Vibraphon begäng maken de, wurr wiethenn kopeert.
Later is Shearing in’ Trio, solo un tonehmend in’ Duo uptreden; he speel mit den Montgomery Brothers, Marian McPartland, Brian Torff, Jim Hall, Hank Jones, Kenny Davern, Stix Hooper un Neil Swainson tosammen. Ok Singer as Nat King Cole, Peggy Lee, Ernestine Anderson, Carmen McRae un Mel Tormé hebbt mit hüm arbeit.
Inspiration weer för Shearing ok de klassisch Musik; eenige vun sien Soli erinnern an den Stil vun Debussy un Erik Satie.
En Variante vun de Blockakkord-Technik, dat Shearing voicing, ist nah hüm nömmt.