Gottlieb Wilhelm Freudentheil

düütsch Politiker

Gottlieb Wilhelm Freudentheil (* 24. September 1792 in Stood; † 2. April 1869 ok dor) weer en düütschen Politiker un Avkaat.

Gottlieb Wilhelm Freudentheil 1848

Freudentheil is 1792 as jüngst von teihn Kinner von en borene Kuhnemund un den Koopmann Gottlieb Christoph Freudentheil in Stood boren. Sien Broder weer Wilhelm Nikolaus Freudentheil. He weer op dat Stoder Gymnasium Athenaeum un hett denn von 1811 bet 1814 Juristeree un Philosophie an de Universität Göttingen studeert. In de Tied von sien Studium weer he Liddmaat von dat Corps Bremensia Göttingen. 1814 hett sik Freudentheil as Jurist in Stood dallaten un is al 1819 as Börgerwoordholler wählt worrn. 1816 hett he siene eerste Fro freet, de 1823 doodbleven is. 1824 hett he denn Christiane Holtermann freet. De beiden harrn söss Kinner. Sien Söhn Emil Freudentheil is ok Avkaat worrn un hett later in de Kanzlie von sien Vader arbeidt. Na 1825 weer Freudentheil nich mehr Börgerwoordholler. He weer denn Protokollföhrer von’n Raad. 1852 is he Obergerichtsavkaat bi dat Obergericht Stood worrn. De Stadt Stood hett em an’n 19. November 1864 to sien föfftigst Dokterjubiläum to ehren eersten Ehrenbörger maakt. Freudentheil is 1869 na en Hartslag doodbleven. Sien Graff is op’n Horstkarkhoff in Stood un besteiht ok vondaag noch. He hett in Stood in dat Huus in de Straat Water West leevt, dat later na August Karl von Goeben den Naam Goebenhuus kregen hett.

Freudentheil weer aktiven Freemürer in de Loosch Zum großen Christoph in Stood; 1837 weer he deputeerten Meester von de Loosch un later ok Meester von’n Stohl.

Freudentheil is siet 1830 een von de polietsch-liberalen Föhrers in dat Königriek Hannover ween un weer so in ganz Düütschland as Verfatenskämpfer bekannt. He weer över 20 Johr lang juristischen Berader von de Börgerschop in Stood. Later is Freudentheil Afornten von de Stännversammlung von dat Königriek Hannover worrn un hett de Verfaten von dat Königriek Hannover mit begrünnt. 1848 hett he an dat Vörparlament deelnahmen un weer in’n Föfftigerutschuss. Von’n 18. Mai 1848 bet 30. Mai 1849 weer he as Afornten för den 16. hannöverschen Wahlkreis in Stood Liddmaat von de Frankforter Natschonalversammlung. He hett to de gemäßigte Linke höört un weer Maat von de Kaiserdeputatschoon, de den prüüßschen König Friedrich Wilhelm IV. de düütsche Kaiserkroon anbaden hett.

As in de Tied na 1852 in dat Königriek Hannover Avkatenkamern inricht worrn sünd, hett he sik dor för insett, dat ok in Stood een grünnt warrt. He is dor denn de eerste Viezdirekter worrn. He hett 1831 un 1837 twee Schriften över den Avkatenstand rutbröcht. He wull geern en Soort Weltgeschicht von de Avkatenschop rutbringen un hett dor von 1833 af an arbeidt.