Hasendörp

Wapen/Flagg

Koort

Basisdaten

21775

04755

Hasendörp (hoochdüütsch Hasendorf) is en lütten Oort in de Gemeen Helmworth (Samtgemeen Land Hadeln) in’n Landkreis Cuxhoben, Neddersassen.

De Oort bestünn jümmer blots ut veer oder fiev Hööv.

Geografie

De Oort liggt in Hadeln. An’n Süüdrand von Hasendörp löppt de Emmelk langs.

De Naveröörd sünd dat Süderenn von Neenkarken in’n Noorden, Heimhusen in’n Noordoosten, de Helmworther Siedendeel in’n Oosten, Helmworth in’n Süüdoosten, de Helmworther Wetternweg un Middeldeel in’n Süden un de Lee un Höörfelln in’n Noordwesten.

De Oort hett vör 1852 to dat Kaspelsgericht Wester-Helmworth in dat Land Hadeln tohöört un denn von 1852 bet 1885 to dat Amt Oterndörp. Na 1885 weer dat in’n Kreis Hadeln. 1932 is dat Deel von’n Kreis Land Hadeln worrn un 1977 von’n Landkreis Cuxhoben.

De Oort hett bet to’n 1. Oktober 1937 to de Gemeen Wester-Helmworth tohöört, de sik denn mit Ooster-Helmworth to een Gemeen tohoopslaten hett.

Hasendörp is evangeelsch-luthersch präägt un höört to dat Kaspel von de Wilhadi-Kark in Helmworth.

För Hasendörp is de freewillige Füürwehr Helmworth mit tostännig.

Över lüttjere Straten is Hasendörp anbunnen an de Landsstraat 117 in Helmworth, de in’n Noorden na Neenkarken an de L 118 un wieder na Oterndörp geiht un in’n Süüdwesten över de Steenauer Westersied na Beers.

De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 1 Cuxhoben liggt so 19 Kilometer in’n Noordwesten von Hasendörp an de Bundsstraat 73.

De nächste Bahnhoff is so bi acht Kilometer wied weg in’n Noorden de Bahnhoff Oterndörp an de Nedderelvbahn von Cuxhoben na Hamborg.

De Kinner ut Hasendörp gaht na de Grundschool Helmworth.

De Artikel „Hasendörp“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.