Hectocotylus
En Hectocotylus is en Arm bi Heken vun de Koppfööt. He warrt to'n Begatten bruukt un is vundeswegen speziell upboot. Düsse Tentakel warrt bruukt, um de Eier vun dat Seken to befruchten, un is so upboot, datt dor dat Heken siene Spermatophore in sitten deit. De warrt bi de Paarung afgeven. Normolerwiese warrt de Hectocotylus elk Saison nee utbillt, wenn de Paarung vor de Döör steiht. De Form verscheelt sik bi de enkelten Aarden. Bi Haliphron atlanticus (den Sevenarm-Kraken) warrt de Hectocotylus in en lüttjen Geweev-Büdel bi dat rechte Ooge lagert un is nich groot to sehn, so datt dat laten deit, as harr de Krake man bloß seven Arms. En sunnerlichen Fall liggt vor bi de Argonauten. Ok dor bringt de Hectocotylus de Spermatophoren in de Höhlen vun dat Seken sien Mantel. Man Heken un Seken bruukt sik dor gor nich bi anfaten oder sehn: De Arm kann sik vun dat Heken losmaken un vun alleen na dat Seken henswemmen. George Cuvier hett em beschreven un em sien Naam geven, man egenaardig is dat doch, datt he toeerst meen, he weer en Parasiten, de an dat Seken ansitten dö. Eerst later is kloor wurrn, wo sik dat bi den Hectocotylus um hannelt. Al Aristoteles harr den Arm in siene Warke over de Biologie beschreven, man, bit he in dat 19. Johrhunnert nee entdeckt wurrn is, dachen de Lüde, dor hannel sik dat um en Mythos bi.
