Thieshoop

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Hanstää Gemeen: Braackel
Flach:	3,48 km²
Inwahners:
Postleettall:	21438
Vörwahl:	04173
Geograafsche Laag:	53° 19′ N, 10° 5′ O

Thieshoop (hoochdüütsch Thieshope) is en Dörp in de Gemeen Braackel (Samtgemeen Hanstää) in’n Landkreis Horborg, Neddersassen. De Oort warrt ok Herdenkaben nöömt.

Geografie

Thieshoop liggt in’n Noorden von de Lümbörger Heid. De Wulfser Beek, de later in’n Aubeek münnt, hett sien Born bi Thieshoop. Ans flütt dat Water, dat in Thieshoop dalkummt, na’n Peerbeek, de ok in’n Aubeek münnt.

De Naveröörd sünd Holtörp in’n Noorden, Scharmbääk un Parrns in’n Noordoosten, Wulfsen un Tangendörp in’n Süüdoosten, Braackel in’n Süüdwesten, Marxen in’n Westen un Ramßel un Ohlendörp in’n Noordwesten.

Historie

In’n Eersten Weltkrieg sünd söss Soldaten ut Thieshoop fullen oder vermisst.

Verwaltungsgeschicht

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen. 1932 is dat Deel von’n Landkreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Braackel worrn.

Inwahnertall

Johr	Inwahners
1793-00-001793	1 Füürsteed
1812-00-001812	51
1824-00-001824	7 Füürsteden
1848-00-001848	53 Lüüd, 7 Hüüs
1871-12-011. Dezember 1871	68 Lüüd, 10 Hüüs
1910-12-011. Dezember 1910	109
1925-00-001925	132
1933-00-001933	131
1939-00-001939	108

Religion

Thieshoop is evangeelsch-luthersch präägt un höört to dat Kaspel von de Gertrud-Kark in Parrns.

För de Kathoolschen is de Goden-Hirt-Kark in Winsen tostännig.

Wapen

Dat Wapen von Thieshoop wiest op grönen Grund en sülvern Schaap.

Kultur

En Denkmaal för de Fullenen ut’n Eersten Weltkrieg steiht in Parrns bi de Kark.

In Thieshoop warrt ünner annern ok Faslam fiert.

Weertschop un Infrastruktur

Thieshoop hett en egene freewillige Füürwehr.

Siet 2013 löppt de Eerdgas-Pieplien NEL in’n Noorden twüschen Thieshoop un Holtörp langs.

Verkehr

Dör Thieshoop löppt de Landsstraat 215, de in’n Noordoosten na Parrns un in de Neegd von Luhdörp un Winsen an de L 234 ran geiht un in’n Süüdwesten över Braackel un Quarrendörp na Hanstää. In’n Süüdoosten löppt de Kreisstraat 6 na Tangendörp un Toppenstää. In’n Noordwesten geiht en lüttjere Straat an de K 22 ran, de denn na Holtörp löppt.

De Autobahn 7 (Afsnidd Hamborg–Hannover) löppt direkt an Thieshoop langs. De Opfohrt 39 Thieshoop liggt blots en poor hunnert Meter in’n Westen von Thieshoop an de L 215.

De nächsten Bahnhööv sünd so teihn bet ölven Kilometer wied weg in’n Noordoosten de Bahnhoff Stell un de Bahnhoff Winsen an de Bahnlien Hamborg–Hannover. Von 1874 bet 1981 hett dat ok Personenverkehr op de Bahnlien Wittenbarg–Bookholt geven, de een Kilometer in’n Süden von dat Dörp langslopen is. In de eerste Tied weren de nächsten Bahnhööv söss Kilometer in’n Westen in Marxen un söven Kilometer in’n Oosten in Wulfsen (dor ok Ansluss an de Bahnlien Winsen–Hützel). In dat 20. Johrhunnert hebbt denn ok de Öörd Braackel un Tangendörp egen Bahnhööv kregen, de all beid so bi twee Kilometer wied weg weren.

Scholen

De Kinner ut Thieshoop gaht na de Grundschool Braackel.