Itzwöörden

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Land Hadeln Gemeen: Kumbarg
Inwahners:
Postleettall:	21784
Vörwahl:	04752
Geograafsche Laag:	53° 48′ N, 9° 5′ O

Itzwöörden (hoochdüütsch Itzwörden) is en Oort in de Gemeen Kumbarg (Samtgemeen Land Hadeln) in’n Landkreis Cuxhoben, Neddersassen. De Oort höört von öllers bi Geversdörp mit bi.

Luftbild von Itzwöörden, in’n Vörgrund Geversdörp, Itzwöörden is in’n Achtergrund op de anner Sied von de Oost (2012)

Klappbrügg twüschen Itzwöörden un Geversdörp

Geografie

Itzwöörden liggt in de Masch an dat rechte Över von de Oost un ganz in’n Noordoosten von’n Landkreis Cuxhoben an de Grenz na’n Landkreis Stood. In’n Süüdoosten liggt dat Naturschuulrebeed Snook.

De Naveröörd sünd Hörn un Kukenbüttel in’n Noorden, Süderdiek in’n Noordoosten, Wetterdiek in’n Oosten, Laak in’n Süüdoosten, Good Neendiek/Marn in’n Süden, Geversdörp un Dingwöörden in’n Süüdwesten un Neehuus in’n Westen.

Historie

De Fähr twüschen Geversdörp un Itzwöörden keem 1423 toeerst in de Oorkunnen vör (nyge vere).

1632 stünn de Ümgegend von Itzwöörden in’n Dörtigjohrigen Krieg ünner dat Regeer von de Sweden. De Truppen von Pappenheim sünd denn aver gegen de Sweden tagen. De Lüüd von Itzwöörden hebbt sik över de Oost na Geversdörp trüggtagen un sik tohoop mit de Geversdörper an de Oost langs verdeffendeert. Dorbi hebbt de Truppen von Pappenheim Itzwöörden ansteken, dat denn afbrennt is.

Itzwöörden weer vör 1885 in’t Amt Neehuus un na 1885 in’n Kreis Neehuus. 1932 is dat an’n Landkreis Land Hadeln kamen un 1977 denn an’n Landkreis Cuxhoben.

De Oort höört von öllers bi de Gemeen Geversdörp mit bi, de an’n 1. November 2016 Deel von de Gemeen Kumbarg worrn is.

1988 is denn de Klappbrügg Geversdörp von de Landsstraat 111 trech worrn un na över 500 Johr hett dat keen Fähr mehr geven.

Inwahnertall

Johr	Inwahners
1824-00-001824	17 Füürsteden
1848-00-001848	113 Lüüd, 16 Hüüs

Religion

Itzwöörden is evangeelsch-luthersch präägt un höört to dat Kaspel von de Andreas-Kark in Geversdörp.

För de Kathoolschen is de Hillig-Krüüz-Kark in Oterndörp tostännig.

Infrastruktur

Verkehr

Dör Itzwöörden löppt de Landsstraat 111, de in’n Noorden na Hörn un denn in’n Noordoosten na Balje un Freiborg geiht. In’n Süüdwesten geiht de Straat över de Klappbrügg över de Oost na Geversdörp un denn bi Neehuus an de Bundsstraat 73 ran.

De nächste Bahnhoff is de Bahnhoff Kumbarg an de Nedderelvbahn. Von 1899 bet 1933 harr de Oort ok en egen Bahnhoff an de Kedener Kreisbahn, de denn aver wedder dichtmaakt worrn is. Itzwöörden weer de Ennbahnhoff von de Bahnlien.

Scholen

1837 is en School in Itzwöörden boot worrn.