Hauptmenü öffnen

Wikipedia β

Geversdörp

Wapen/Flagg Koort

Wapen vun Geversdörp

Geversdörp
Laag vun Geversdörp in Düütschland
Basisdaten
Bundsland: Neddersassen
Landkreis: Cuxhoben
Samtgemeen: Land Hadeln
Gemeen: Kumbarg
Inwahners:
Hööchd: 1 m över NN
Geograafsche Laag:
Koordinaten:53° 48′ N, 9° 5′ O
53° 48′ N, 9° 5′ O
Luftbild von Geversdörp (2012)
De Geversdörper Klappbrügg över de Oost
Ole Warft von Geversdörp
Dat Raadhuus von 1883

Geversdörp (hoochdüütsch Geversdorf) is en Dörp in de Gemeen Kumbarg, Samtgemeen Land Hadeln, in’n Landkreis Cuxhoben, Neddersassen.

Inholtsverteken

GeografieÄnnern

Geversdörp liggt in’n Noordoosten von’n Landkreis Cuxhoben an de Grenz na’n Landkreis Stood un Keden.

Dat Dörp liggt in de Masch von de Oost un na Oosten to liggt dat Naturschuulrebeed Snook.

De Naveröörd sünd Olenwisch un Hörn in’n Noorden, Kukenbüttel, Süderdiek un Itzwöörden in’n Noordoosten, Wetterdiek in’n Oosten, Laak un Bentwisch in’n Süüdoosten, Braak, Voigtding un Kumbarg in’n Süden, In’n Fellen in’n Süüdwesten un Feldhööv, Dingwöörden un Neehuus in’n Westen.

HistorieÄnnern

In de Oorkunnen kummt Geversdörp toeerst 1146 as Geverstorpe vör. De Naam kummt wohrschienlich von en Persoon mit’n Naam Gever/Gevert.

De Fähr twüschen Geversdörp un Itzwöörden keem 1423 toeerst in de Oorkunnen vör (nyge vere).

1632 stünn de Ümgegend von Geversdörp in’n Dörtigjohrigen Krieg ünner dat Regeer von de Sweden. De Truppen von Pappenheim sünd denn aver von de Itzwöördener Sied von de Oost her gegen de Sweden tagen. De Lüüd von Itzwöörden hebbt sik över de Oost na Geversdörp trüggtagen un sik tohoop mit de Geversdörper an de Oost langs verdeffendeert.

Vör 1885 weer Geversdörp in dat Amt Neehuus. Dit Amt is denn 1885 Deel von’n Kreis Neehuus worrn un 1932 von’n Landkreis Land Hadeln. 1977 keem de Oort denn an’n Landkreis Cuxhoben.

An’n 1. Januar 1972 is Geversdörp Deel von de Samtgemeen An’n Dobrook worrn. To’n 1. November 2016 hett sik de Samtgemeen An’n Dobrook mit de Samtgemeen Land Hadeln tohoopslaten un de ne’e un gröttere Samtgemeen Land Hadeln billt.

De Oort weer von öllers de Hauptoort von de Gemeen Geversdörp, de an’n 1. November 2016 Deel von de Gemeen Kumbarg worrn is.

Bi de Stormflood 1962 is ok bi Geversdörp de Diek braken.

De ole Geversdörper Warft an de Oost warrt vondaag as Ferienanlaag bruukt.

InwahnertallÄnnern

Johr Inwahners
1824-00-00 1824[1] 74 Füürsteden
1848-00-00 1848[2] 508 Lüüd. 68 Hüüs

ReligionÄnnern

 
Andreas-Kark

Geversdörp is evangeelsch-luthersch präägt un billt mit de Andreas-Kark en egen Kaspel. De Kark kummt 1233 toeerst in de Oorkunnen vör. To de Tied hebbt ok noch Neehuus, Belen un Kedenbrook mit to dat Kaspel höört. Binnen in de Kark gifft dat ünner annern en Dööpbecken von 1505 von Hinrich Kock un en Örgel von 1842 von Furtwängler. De Örgel is 1973-1975 von Alfred Führer un 2006 von Bartelt Immer wedder utbetert worrn.

För de Kathoolschen is de Hillig-Krüüz-Kark in Oterndörp tostännig.

WapenÄnnern

Dat Wapen von de Gemeen wiest in’n Schildkopp op roden Grund en sülvern Ploog. Dor ünner wiest dat op sülvern Grund op en Schildfoot von blaue Wellen en rode Kogg mit swarte Seils.

De Ploog steiht för de Bueree un de Kogg för de Seefohrt, de all beid fröher von groot Bedüden för Geversdörp weren.

KulturÄnnern

MuseumsÄnnern

Geversdörp hett en Heimatmuseum, dat siet 1986 in dat Raadhuus ünnerbröcht is un sik ut de Sammlung von Heinz Behrens billt hett.

VerenenÄnnern

De Schützenvereen Geversdörp is 1632 as Freefahn grünnt worrn un weer later en Schützengill. In de hüdige Form hett sik de Vereen 1924 billt. De Vereen fiert jümmer an’t eerste Wekenenn in’n August för dree Daag sien Schützenfest. De Freewillige Füürwehr hett sik 1934 grünnt, nadem dat vörher en Plichtfüürwehr geven harr.

De TSV Geversdörp is 1949 grünnt worrn.

Infrastruktur un WeertschopÄnnern

 
Geversdörper Fischkutter op de Oost

Von’n Geversdörper Haven ut warrt noch mit en enkelten Fischkutter Hamenfischeree bedreven.

Geversdörp liggt mit de Klappbrügg över de Oost an de Düütsche Fährstraat.

VerkehrÄnnern

Geversdörp liggt an de Landsstraat 111, de in’n Noordoosten över de Klappbrügg Geversdörp (1988 boot, Dörfohrt 3,80 Meter hoog, 206 Meter lang un 11 Meter breed) över de Oost na Balje un Freiborg geiht un in’n Westen in Dingwöörden an de Bundsstraat 73 ranlöppt. In’n Süüdoosten löppt de Kreisstraat 25 an de Oost langs över Laak na Öberndörp. Ans gifft dat noch en Straat na Kumbarg.

De nächste Bahnhoff is de Bahnhoff Kumbarg an de Nedderelvbahn, so bi veer Kilometer af von Geversdörp. Bet 1933 weer Geversdörp över Itzwöörden op de anner Sied von de Oost ok över de Kedener Kreisbahn an Keden un Stood anslaten.

ScholenÄnnern

Dat eerste Maal kummt en Schoolmeester för Geversdörp 1580 in de Oorkunnen vör. Von en Schoolhuus in de hüdige Diekstraat 119 warrt toeerst 1619 in de Oorkunnen snackt. 1625 warrt en tweet Schoolhuus in de hüdige Straat An de Kark 93 köfft un 1680 warrt noch wedder en neet Schoolhuus köfft, dat 1720 afbrennt un 1726 nee opboot warrt. 1858 hett dat denn noch wedder en neet Schoolhuus geven, dat bet 1969 bestahn hett, as de School oplööst worrn is. 1865 keem noch en extra School dorto, de bet 1967 bestahn hett.

Vondaag hett Geversdörp blots noch en Kinnergoorn. Na de Grundschool mööt de Kinner na de Grundschool Öberndörp. Na Haupt- un Realschool gaht de Schölers an de School an’n Dobrook in Kumbarg, op Gymnasium na dat Gymnasium Warstood oder dat Gymnasium Oterndörp.

LüüdÄnnern

De Botaniker Jost Fitschen hett en Tied lang in Geversdörp as Schoolmeester arbeidt un leevt. De Politiker Frank Horch is dor 1948 boren.

FootnotenÄnnern

  1. C. H. Jansen: Statistisches Handbuch des Königreichs Hannover. 1824, Sied 208: http://books.google.de/books?id=tG0AAAAAcAAJ&pg=PA208
  2. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 136: http://books.google.de/books?id=eOI-AAAAcAAJ&pg=PA136

WeblenkenÄnnern

  Geversdörp. Mehr Biller, Videos oder Audiodateien to’t Thema gifft dat bi Wikimedia Commons.