James Doohan

James Montgomery Doohan (* 3. März 1920 in Vancouver, British Columbia, Kanada; † 20. Juli 2005 in Redmond, Washington, USA) weer en kanaadschen Schauspeler. Mit sien Rull as Ingenieur „Scotty“ in de Original-Feernsehreeg Star Trek is he weltbekannt worrn.

James Doohan (1997)

Leven un Wark

Doohan hett de High School an de „Sarnia Collegiate Institute and Technical School“ in Ontario besöcht, woneem he sünners good in Mathematik un de Naturwetenschoppen afsneden hett. Wiel den Tweeten Weltkrieg deen he in de königlich-kanaadschen Artillerie in’n Rang vun en Captain. An’n D-Day is he dör söss Kugeln vun en egenen Wachmann verwunnt worrn un hett dordör den Middelfinger vun sien rechten hand verloren. In Film- un Feernsehprodukschonen weer de besehrte Hand aver normalerwies nich wiest.

Sien Loopbahn as Schauspeler füng in de 1950er Johren in dat Genre Science Fiction an. 1953 speel he en Hööftrull in de Feernsehreeg Space Command. vun doran weer he in verschedene Nevenrullen in Regen as Gunsmoke, Bonanza oder The Fugitive to sehn. Doohan harr en sünnert Spraak- un Stimmtalent un künn ok utlännsche Akzenten goot namaken. As he bi Gene Roddenberry, den Utfinner vun Star Trek vörspraken hett, hett he em verschedene Akzenten vörstellt. Op Roddenberry sien Fraag, wat sien leefsten Akzent weer, verkloor Doohan, dat sien Ansicht na „de besten Ingenieuren vun de Welt all Schotten weern“. Dorophen hett he 1966 de Rull vun den pragmaatschen Baasingenieur Lt. Comm. Montogmery Scott („Scotty“) kregen. Sien Dorstellen vun den heldenhaften Scotty hett vele Schölers un Studenten dorto bröcht, Studiengäng ut de Ingenieurswetenschoppen to wählen. Vun de Milwaukee School of Engineering is Doohan dorför mit en Ehrendokter uttekent worrn.

Doohan 1969 to Besöök bi’t NASA Dryden Flight Research Center

Wegen sien stimmliche Wannelborkeit hett Doohan faken ok mehrere Stimmrullen övernahmen. In de Originalreeg Star Trek harr he tosätzliche fief Stimmrullen, in de Trickfilmreeg Star Trek: The Animated Series harr he sogors 51 Stimmrullen blangen sien Stammrull as „Scotty“. Faken hett he dorbi mehrere Figuren in de sülven Episood snackt. Sien Rekord leeg in de Episood Yesteryear bi söven verschedene Spreekrullen. Na dat Enn vun de Originalreeg 1969 müss Doohan aver faststellen, dat he so stark op de Rull fastleggt weer, dat he dat bannig swoor harr, ne’e Engagements to kriegen. Eerst as teihn Johren later star Trek mit de Kinofilmen nee beleevt weer, künn he wedder in grötteren Ümfang Foot faten. Blangen de eersten söven Star-Trek-Kinofilmen harr he Gastrullen in de Feernseregen Magnum, Hotel un MacGyver. In de 1990er Johren weer he in de Sepenoper The Bold And The Beautiful. Butendem hett he tohopen mit S. M. Stirling en poor Romanen publizeert, de to de Military Science-Fiction to tellen sünd.

Doohan hett lange Tiet an Diabetes, Lungenfibroos un an de Parkinson-Krankheit leden. 2004 geev sien Fru Wende Doohan bekannt, dat he bito ok noch an Alzheimer krank worrn is. In’n Oktober vun’t glieke Johr is he dat letzte mol in de Apentlichkeit to sehn wesen, as he mit den Steern op’n Walk of Fame ehrt worrn is. An sien Siet dorbi weern sien fröheren Kollegen George Takei, Nichelle Nichols un Walter Koenig.

James Doohan weer dreemol verheiraat un weer Vadder vun tosamen negen Kinner. Sien jüngste Dochter Sarah is an’n 11. April 2000 boren worrn. An’n 20. Juli 2005 is de Schauspeler in Biwesen vun sien Familie in sien Huus in Redmond an de Naklapp vun en Lungensweer doodbleven. Sien letzten Willen weer, dat sien Asch in’t Weltall bröcht warrn schüll – jüst so as de vun Gene Roddenberry vör em al. Sien Överresten weern 2007 mit en SpaceLoft XL-Rakete för korte Tiet in’t All bröcht In’n August 2008 schülln sien ÖVerresten to’n tweeten mol in’t All schoten warrn, man de Rakete harr en technisch Problem, so dat se in’n Pazifik stört is. An’n 22. Mai 2012 is de Urne mit Doohan sien Asch an Boord vun’t Ruumschiff Dragon C2+ vun Cape Canaveral ut afflagen.

Filmografie (Utwahl)

Johr	Titel	Synchroonsnacker
1953	Space Command, Feernsehreeg
1956	Flight Into Danger, Feernsehn
1963	The Labyrinth, Feernsehn
1966	Scalplock, Feernsehn
1965-67	Peyton Place, Feernsehreeg
1968	Jigsaw dt.: Die nackte Tote
1966-69	Star Trek, Feernsehreeg dt.: Raumschiff Enterprise	K. E. Ludwig
1971	Pretty Maids All in a Row dt.: Sex-Lehrer-Report
1971	Man in the Wilderness dt.: Ein Mann in der Wildnis
1973-74	Star Trek: The Animated Series, Trickfilmreeg dt.: Die Enterprise	Thomas Danneberg u. a.
1978	Jason of Star Command, Feernsehreeg
1979	Star Trek: The Motion Picture dt.: Star Trek: Der Film	K. E. Ludwig Kaspar Eichel (ne’e Szenen)
1982	Star Trek II: The Wrath of Khan dt.: Star Trek II: Der Zorn des Khan	K. E. Ludwig Kaspar Eichel (ne’e Szenen)
1984	Star Trek III: The Search for Spock dt.: Star Trek III: Auf der Suche nach Mr. Spock	K. E. Ludwig
1986	Star Trek IV: The Voyage Home dt.: Zurück in die Gegenwart – Start Trek IV	K. E. Ludwig
1989	Star Trek V: The Final Frontier dt.: Star Trek V: Am Rande des Universums	K. E. Ludwig
1991	Knight Rider 2000, Feernsehn	K. E. Ludwig
1991	Star Trek VI: The Undiscovered Country dt.: Star Trek VI: Das unentdeckte Land	K. E. Ludwig Kaspar Eichel (ne’e Szenen)
1992	Double Trouble dt.: Double Trouble – Warte, bis mein Bruder kommt
1993	Amore!
1994	Star Trek: Generations dt.: Star Trek: Treffen der Generationen	K. E. Ludwig
1994	River of Stone
1996	Storybook dt.: Adventure Land
1996-97	The Bold and the Beautiful dt.: Reich und schön
1998	Bug Buster
1999	Through Dead Eyes dt.: Mit den Augen einer Toten
1999	The Duke dt.: Lord Hubert – Hundeadel verpflichtet

Utteken

Doohan sien Steern op’n Walk of Fame an’n 21. Juli 2005, een Dag na sien Dood

James Doohan weer 1987 för den Saturn-Pries in de Kategorie Best Nevendorsteller för Star Trek IV: The Voyage Home nomineert wesen. 2003 is he för sien Levenwark mit den SFX Award un 2004 mit sien Steern op’n Hollywood Walk of Fame ehrt worrn.

Literatur

• Doohan, James; David, Peter (1996). Beam Me Up, Scotty: Star Trek's "Scotty" in his own words. ISBN 0-671-52056-3. (Autobiografie)

Weblenken

James Doohan. Mehr Biller, Videos oder Audiodateien to’t Thema gifft dat bi Wikimedia Commons.

• James Doohan in de Internet Movie Database (engelsch)