Johannes Hoppe (Politiker)

Johannes Heinrich Nicolaus Hoppe (* 13. Februar 1861 in Hornborg; † 22. Juli 1925 in Stood) weer en düütschen Jurist un Politiker.

Hoppe is 1861 as Söhn von’n Aftheker Johann Heinrich Hoppe in Hornborg boren. He weer 1869 toeerst op de Volksschool in Hornborg. Nadem de Vader de Aftheek in Hornborg verköfft un en ne’e Aftheek in Steenkark opmaakt hett, weer de Söhn denn von 1869 bet 1872 op en Privatschool in Steenkark. Von 1872 bet 1881 güng Hoppe op dat Athenaeum Stood. Na de School weer he 1881 bet 1882 an de Universität München un 1882 bet 1885 an de Universität Berlin. 1881 is he Maat von de Burschenschaft Babenbergia München worrn. Dat Referendarexamen hett he bi dat Kamergericht in Berlin maakt un denn 1885 an de Universität Göttingen sien Dokterarbeid schreven. Na dat Studium weer he von 1885 bet 1886 Eenjohrig-Freewilligen bi de Garr-Feldartillerie un hett 1886 en Hoff in Süderdiek övernahmen, den he bet 1907 sülvs bewirtschaft un denn an en Verwandten verpacht hett. Von 1892 bet 1898 weer he Gemeenvörsteiher. Ok in de Kedener Diek- un Sielverbänn weer he aktiv. Na 1907 hett Hoppe in Stood leevt un weer dor von 1918 bet 1925 Avkaat bi dat Amtsgericht Stood. He weer Hauptmann von de Landwehr-Feldartillerie I un Dreger von de Landwehr-Deenstutteeknung I. Klass.

Bi de Wahl 1898 weer Hoppe in’n Wahlkreis Stood 1 (Jörk-Keden) Kannedaat för dat Prüüßsche Aforntenhuus, kunn sik aver nich gegen Johann Schoof dörsetten.

Von 1909 bet 1918 weer he för de Natschonalliberale Partei un den Wahlkreis Hannover 18 (Stood, Geestmünn, Bremervöör, Oosterholt) Maat von’n Rieksdag.

Na 1919 weer Hoppe Maat von de DDP.

Literatur

• Helge Dvorak: Biographisches Lexikon der Deutschen Burschenschaft. Band I: Politiker, Teilband 7: Supplement A–K, Winter, Heidelberg 2013, ISBN 978-3-8253-6050-4. S. 484–485.