Johannis-Kark (Stood)

De Johannis-Kark is en evangeelsch-luthersche Kark an’n Sandersweg in Stood (Karkenkreis Stood). Ehren Naam hett se von Jesus sien Jünger Johannes. Al in’t Middelöller harr dat in Stood dat Johannisklooster geven.

De Johanniskark vun Westen

Dat Rebeed, dat de Karkengemeen von de Johannis-Kark billt, hett vörher to dat Kaspel von de Wilhadi-Kark höört.

In’n Süden von Stood hebbt sik kort na’n Tweten Weltkrieg en Barg Flüchtlings und Verdrevene ansiedelt. För dat Rebeed weer de Wilhadi-Kark in de Binnenstadt mit tostännig, aver de Gemeen dee to groot warrn. Dorüm schull en ne’e Kark boot warrn. Dor Koop un Tuusch hett de Wilhadi-Gemeen en Grundstück von 8.746 m² tohoopkregen, dat op en lütten Barg 21 Meter över NN liggt. Toeerst is 1954 en Parrhuus boot worrn. De Grundsteen för de Kark is denn an’n 25. September 1955 leggt worrn. Plaant hebbt dat de Architekten Hopp & Jäger ut Hamborg un köst hett dat 425.000 Mark.

Inwieht worrn is de Kark an’n 22. Dezember 1956 un an’n 1. Oktober 1958 is de Johannis-Gemeen denn kumplett egenstännig un unafhängig von de Wilhadi-Gemeen worrn.

1959 hebbt se en tweet Parrhuus boot un in’n Mai 1962 is de Johanniskinnergoorn inricht worrn. 1999 is en drüdd Parrhuus in Hagen tokamen.

De Karktoorn ut Kedener rode Tegels mit fiev Klocken is 41,70 m hoog. De eersten veer Klocken sünd von 1956, de föffte Klock hett de Kark to ehr 50. Jubiläum 2006 kregen. Dat Karkenschipp is 29,18 m lang, 12,50 m hoog un 11 m breed (an’n Oostgevel bet 19,50 m). Dat 10 m hoge Altarfinster is von Hans Gottfried von Stockhausen. De Örgel stammt von’n Örgelboer Paul Ott. De Sliepladenörgel mit mechaansche Traktur is an’n 31. Oktober 1959 inboot worrn.

Pastoorn

De Johanniskark vun Oosten

• 1954-: Curt Georgi
• 1979-1994: Friedhelm Voges
• Klaus-Uwe Nommensen
• ~1975: Ralf Renner
• 1976-1993: Peter Neumann

Johannis I:

• 2003–2016: Elke Meinhardt

Johannis II:

• -Mai 2014: Enno Stockstrom
• 1. Oktober 2014-: Wilfried Behr

Johannis III (2007 streken):

• 1997-2007: Rudolf Preuß

Kaspel

To de Karkengemeen höört de Stoder Stadtveerdels Pommernveerdel, Sassenveerdel un Horstveerdel, Kopenkamp, Groot Thun, Lütt Thun, Barg, Riensföör un Hagen.

Alltohoop höört dor 6400 Lüüd to.

De Naverkaspels sünd de Wilhadi-Kark Stood in’n Noorden un Oosten, dat Kaspel Hornborg in’n Süüdoosten, Bargst in’n Süden, Mulsen in’n Süüdwesten, de Markus-Kark Stood in’n Westen un de Cosmae-Kark Stood in’n Noordwesten.

Literatur

• 50 Jahre und kein bisschen leise... Kirchweihfest 50 Jahre Johanniskirche 1956-2006. Stood 2006

Weblenken

Johanniskark (Stood). Mehr Biller, Videos oder Audiodateien to’t Thema gifft dat bi Wikimedia Commons.

• Websteed von de Karkengemeen (hoochdüütsch)