K-PAX (Film)
K-PAX (dt. Titel: K-PAX — Alles ist möglich) is en Science-Fiction-Filmdrama vun den Speelbaas Iain Softley ut dat Johr 2001. De Hööftrull speel Kevin Spacey. Dat Dreihbook baseert op den Roman K-PAX (dt:: Wie von einem fremden Stern) vun Gene Brewer un vertellt de Geschicht vun en Mann, de vun sik seggt, dat he vun den Planet K-PAX ruchweg 1000 Lichtjohren wiet weg in de Neeg vun’t Steernbild Lier kummt.
| Filmdaten | |
|---|---|
| Plattdüütsch Titel: | — |
| Originaltitel: | K-PAX |
| Düütsch Titel: | K-PAX – Alles ist möglich |
| Produkschoonsland: | Grootbritannien Düütschland USA |
| Johr vun’t Rutkamen: | 2001 |
| Läng: | 120 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Iain Softley |
| Dreihbook: | Charles Leavitt |
| Produkschoon: | Lawrence Gordon Lloyd Levin Robert F. Colesberry |
| Musik: | Ed Shearmur |
| Kamera: | John Mathieson |
| Snitt: | Craig McKay |
| Szenenbild: | John Beard |
| Kledaasch: | Louise Mingenbach |
| Dorstellers | |
| |
Inholt
ännernVunwegen dat he keen Utwies bi sik hett un sik snaaksch verhollen deit, warrt Prot in’n Grand-Central-Bahnhoff vun New York City fastnahmen. He gifft sik as Butenirdischen ut, de vun den Planet K-PAX kamen deit. He warrt dorophen in en psychiatrische Anstalt inwiest, man, keen Therapie will bi em anslahn. So warrt he na een Maand Dr. Powell towiest, de wegen sien vele Arbeit sien Familie vernalässigen deit. Dr. Powell finnt rut, dat Prot geern Aaft eten deit un dat he ultravigelett Licht sehn kann. Na korte Tiet fangt vör allen de Patienten vun de Anstalt an, Prot sien Geschicht to glöven. Ok Dr. Powell is andoon vun de logischen Tosamenhäng in dat, wat Prot vertellt.
Prot weet veel över Naturwetenschoppen un is in de Laag astrophysikaalsche Fragen to lösen. Dr. Powell beslutt mit em in’t Hayden Planetarium to fohren, üm mit en Koppel vun rutragende Astrophysikers mehr ruttofinnen. Dor schall he wiesen, dat he in de Laag is sik mit Överlichtsnelligkeit to bewegen, man, wiel de Demonstratschoon röögt he sik nich vun de Steed. He seggt, dat he so gau is, dat dat Oog vun de Minschen nich in de Laag is dat wohrtonehmen. De Wetenschopplers glöövt an en Jux. Liekers, kann he jemehr Fragen nipp un nau antern un to’n Bispeel de Ümloopbahnen vun de Planeten in sien vörgeevlich Heimatsystem opteken un dorbi sogor en physikaalsch Radels verkloren, dat bit dorhen nich verstahn weer.
Dr. Powell stellt fast, dat Prot op sien Ümfeld un sünners op de annern Patienten en go’e Utwirken hett. Prot snackt dorbi vun Sülvstheelkraft. De Patienten versprickt Prot, dat he een vun jem op sien Torüchreis na K-PAX mitnehmen kann. All maakt se sik dorför praat. Dr. Powell dorgegen is bang, dat an den Dag vun de „Torüchreis“ wat Gresig passeren schall. He gifft sik also Möh, vörher allns över Prot sien verleden Leven ruttofinnen. He maakt mit em en Öllerregresschoon, wat em bi jeedeen Drapen neger an dat trurige Geheemnis vun den Mann bringen deit. Dr. Powell kummt achter de Geschicht vun Robert Porter, de Arbeiter in en Slachthoff weer. Porter harr vör fief Johren versöcht sik ümtobringen, nadem he en Inbreker in sien Huus mit egen Hannen doodmaakt hett, de vörher sien Fro un sien Dochter ümbröcht harr. Ogenschienlich is Prot disse Robert Porter, de den Sülvstmoordversöök överleevt, aver sien Gedächtnis verloren hett.
As de Tiet vun sien Trüchreis neger kummt, töövt Prot in sien Kamer un kiekt ut dat Finster. Dr. Powell harr den Tietpunkt meist verslapen un löpt gau dör dat Krankenhuus na Prot. De Wachtkamera, mit de de Mitarbeiters Prot beobachten doot, fallt ut, as dat Licht vun de Sünn, de jüst opgeiht, in de Kamer schient. As Dr. Powell ankummt sütt de Kamer toeerst leddig ut, man denn sütt he Porter bewusstlos ünner sien Bett liggen. He is vullstännig katatoonsch un mutt in’n Rullstohl föhrt warrn.
To de glieken Tiet as Prot sien schienbore Verwanneln is de Patienten Bess verswunnen. De Patienten glöövt, dat Prot sien Verspreken hollen hett un se mitnahmen hett. In’n Epilog warrt Dr. Powell wiest, as he den katatoonschen Porter in’n Rullstohl rümföhrt un mit em vertellt. De annern Patienten hebbt go’e Foortschreden maakt un sünd deelwies al ut de Anstalt rut. Liekers maakt he sik jümmer noch Sorgen üm Bess, de nich wedder opduukt is. Opletzt dröpt he sik mit sien Söhn ut eerste Eh, den he finanziell jümmer ünnerstüüt, aver al lange Tiet nich mehr sehn hett. Prot hett em vör Ogen hollen, wo wichtig en Familie is.
Na den Afspann warrt noch en letzte Szeen wiest, in de Dr. Powell mit en Teleskop nachts in sien Goorn sitt un in’n Himmel kiekt.
Kritik
ännern- Dat Lexikon vun’n internatschonalen Film oordeel, dat de rutragen Schauspelers un de feine Fotografie starker in’n Bann tehn de, as de Geschicht, de vertellt warrt, dat egentlich verdeent harr un snack vun en wenig egenstännige Fantasy-geschicht.[1]
- Das Science Fiction Jahr meen, dat K-PAX en Oort vun Science-Fiction beden de, as man dat anners blots all poor Johren mol to sehn kriggt. De Film weer as richtig intelligent Hollywood-Starkino beschreven un faszineer över de hele Läng.[2]
Utteken
ännernDe Film hett keen Priesen wunnen, weer aver in’t Johr 2002 tweemol nomineert. To’n een Alfre Woodard in de Kategorie Best Schauspelersche in en Speelfilm för den Image Award, to’n Annern Kevin Spacey in de Kategorie Best Schauspeler för den Saturn-Pries
Produkschoon
ännernDe Film is in en Tosamenarbeit vun de britischen Firmen „Intermedia Films“ un „Pathé Pictures International“ mit de düütschen „IMF Internationale Medien und Film GmbH & Co. 2. Produktions KG“ un de US-amerikaanschen „Lawrence Gordon Productions“ entstahn.
Borns
ännern- ↑ Filmkritik in’t Lexikon vun’n internatschonalen Film, afropen an’n 18. September 2014
- ↑ Wolfgang Jeschke, Sascha Mamczak (Rutgevers): Das Science Fiction Jahr 2003. Wilhelm Heyne Verlag, München, S. 314.
Weblenken
ännern- K-PAX in de Internet Movie Database (engelsch)
- Kritiken to’n Film op Rotten Tomatoes