Kahlesand

Wapen/Flagg	Koort
Basisdaten
Bundsland: Neddersassen Landkreis: Stood Gemeen: Drochters
Inwahners:
Postleettall:	21706
Vörwahl:	04143
Geograafsche Laag:	53° 46′ N, 9° 20′ O

Kahlesand (hoochdüütsch Kahlesand) is en Rebeed in de Gemeen Drochters in’n Landkreis Stood, Neddersassen, dat fröher en Insel in de Elv weer.

Geografie

Kahlesand liggt as Sand twüschen de Wischhobener Süderelv in’n Westen, de Kahlesand von’n fasten Wall aftrennt, un den Königspriel in’n Oosten, de den Sand von Wischhobenersand trennt. Dat Rebeed tellt to Keden.

En richtig Eiland is Kahlesand vondaag nich mehr. De Priel in’n Oosten is blots noch en smallen Graven un dat Rebeed liggt kumplett binnen den Hauptdiek an de Elv. Bi Stormflood is dat Rebeed dör dat Ruthenstroom-Sparrwark un dat Sparrwark Wischhoben kumplett vör dat Water ut de Elv schuult. De ole Loop von’n Königspriel is von’n Hauptdiek von de Elv dörsneden.

De Naveröörd sünd Wischhobenersand in’n Oosten, Kruutsand in’n Süüdoosten, Doornbusch un Neeland in’n Süden, Wischhoben in’n Westen un Hamelwöörden in’n Noorden.

Historie

Bevör na de Stormflood 1962 de Hauptdiek an de Elv un de Sparrwarken boot worrn sünd, hett dat keen Dieken geven, de Kahlesand schuult hebbt.

Dat geev op Kahlesand in dat 19. Johrhunnert maal acht Hüüs, de op Worten boot weren. Dor sünd vondaag blots noch dree von nableven.

Verwaltungsgeschicht

De Oort hett vör 1859 to dat Amt Wischhoben tohöört un denn von 1859 bet 1885 to dat Amt Freeborg. Na 1885 weer dat in’n Kreis Keden. 1932 is dat Deel von’n Kreis Stood worrn.

Nadem op’n Sand in dat 19. Johrhunnert de eersten Hüüs boot worrn sünd, hebbt de Inwahners to de Gemeen Kruutsand tohöört. De Gemeen Kruutsand is an’n 1. Juli 1972 mit de Gemeenreform in Neddersassen Deel von de ne’e Gemeen Drochters worrn.

Inwahnertall

Johr	Inwahners
1824-00-001824	ahn Inwahners
1848-00-001848	10 Lüüd, 2 Hüüs
1871-12-011. Dezember 1871	39 Lüüd, 8 Hüüs

Religion

Kahlesand is evangeelsch-luthersch präägt un höört siet 1849 to dat Kaspel von de Kark op Kruutsand.

För de Kathoolschen is de Hillig-Geist-Kark in Stood tostännig.

Weertschop un Infrastruktur

Verkehr

Kahlesand is över en lüttjere Straat verbunnen mit de Kreisstraat 19, de von Kruutsand ut in’n Süüdwesten na Doornbusch an de Landsstraat 111 ran geiht. De K 45 löppt von Kruutsand na Süden un ennt in Drochters an de L 111.

De L 111 geiht in’n Noordwesten na Wischhoben, is dor mit de Bundsstraat 495 verbunnen un denn na Freeborg. In’n Süüdwesten löppt de L 111 över Drochters, Aßel un Bützfleet na Stood.

De nächste Autobahn is de Autobahn 26 (Afsnidd Stood–Hamborg). De Opfohrt 3 Stood-Oost liggt so 30 Kilometer in’n Süüdoosten von Kahlesand an de L 111.

De nächste Bahnhoff is so bi 22 Kilometer wied weg in’n Süüdwesten de Bahnhoff Hemmoor an de Nedderelvbahn. Von 1899 bet 1936 hett dat ok Personenverkehr op de Kedener Kreisbahn geven. De nächste Bahnhoff weer in Wischhoben.