Korinth

Korinth (neegr. Κόρινθος Kórinthos (F.Sg.) is ene Stadt up den Peloponnes in Grekenland. Hüdigendags (2010) leevt dor ca.58.000 Inwahners. De Stadt liggt an den Isthmus vun Korinth, dat is de Landenge, de dat Faste Land vun Grekenland un de Halfinsel Peloponnes verbinnen deit. In'n Westen vun düsse Landenge liggt de Golf vun Korinth. Korinth is den Peloponnes siene tweetgröttste Stadt. Dor sitt ok de Verwalten vun de Präfektur Korinthia. Um de Stadt rum liggt de Lechaio-, de Kalamaki-, de Loutraki- un de Geraneia-Bargen.

Korinth liggt so wat bi 79 km westlich vun Athen. In de Antike sünd Scheepe up Sleden över de Felsen vun de Landenge trocken wurrn. Vun dat 19. Johrhunnert af an gifft dat dor avers den Kanal vun Korinth.

Historie

Up düssen sülvern Tetradrachmon steiht unner den Pegasus en Qoppa as Teken för de Münten ut Korinth

De Vörtied

Korinthos is en vun de olen Oortsnaams in Grekenland, de noch ut de Tied stammen doot, as de Pelasgers dor vör de Greken al leven döen. Just so, as Mykene, Tiryns un Pylos hett in Korinth in de Bronzetied wohrschienlich al en Stadt mit ene Borg stahn, de to de Kultur vun Mykene torekent weern kann. Na de Mythologie is Sisyphos de eerste vun en ganze Rege vun Königen vu Korinth ween. Jason schall hier Medea verlaten hebben.

Fröh Antike un Klassische Tied

Toeerst is Korinth mit den Bookstaven Qoppa schreven wurrn: Ϙόρινθος Qorinthos, man düsse Bookstave is later afschafft wurrn. Man dat is de Grund, worüm up Münten ut de Stadt jummers dat ϙ as Teken för Korinth to finnen is.

De Stadt is üm dat 10. Johrhunnert v. Chr. vun de Dorers grünnt wurrn. Vunwegen den verkehr un den Hannel över de Landenge konn Korinth dat in de klassische Tied vun de Antike mit Theben un Athen sien Riekdom upnehmen. Bit in de Midden vun dat 6. Johrhunnert v. Chr. weer Korinth en wichtigen Exporteur vun Pöttereen mit swarte Figuren up roden Grund un lever de ut in Städer in ganz Grekenland. Up de Akropolis vun Korinth (Akrokorinth) stünn en groten Tempel, de weer de Göddin Aphrodite toegent. Överhaupt weer Korinth en vun de wichtigsten Öörd för den Kult för Aphrodite. Dat gifft Borns, de seggt, an Aphrodite ehrn Tempel harr dat mehr, as dusend Tempeldeerns geven. In Korinth fünnen ok in jedet tweete Johr de Spelen vun den Isthmus statt.

Korinth weer in de Antike en wichtigen Stadtstaat un grünn verscheden Kolonien rund um de Middellannsche See to, dormank Syrakus up Sizilien. In den duerhaftigen Striet twuschen Athen un Sparta stünn Korinth, sünnerlich in den Peloponnes'schen Krieg, up Sparta siene Siet un klemm sik dorachter, dat Athen to Dutt maakt weern scholl.

Korinth warrt röömsch

As de Römers in Grekenland updükern, hefft se de Stadt belagert un in dat Johr 146 v. Chr. verwööst'.

Caesar

44 v. Chr. hett Julius Caesar Korinth wedder upboot. Korinth is denn gau wedder to en vun de rieksten Städer in Grekenland upbleiht. Dormals is se ok Hööftstadt ween vun de röömsche Provinz Achaea.

Unner annern is Korinth dor üm bekannt wurrn, dat de Apostel Paulushier als heel fröh, üm dat Johr 50 n. Chr. rüm, siene Breven na Korinth schreven hett: De 1. Breef an de Christen in Korinth un de 2. Breef an de Christen in Korinth. Beide sünd later in de Bibel upnahmen wurrn un finnt sik nu in dat Nee Testament. Korinth speelt also en sünnerliche Rull in de geschicht vun dat Christendom un de Kark.

Late Antike, Germanen un Slawen

Al in dat 2. Johrhunnert hett in Korinth en Bischop seten un tominnst vun dat 4. Johrhunnert af an weer dor en Metropolit. So bleev dat ok, bit Athen in dat 9. Johrhunnert wedder hooch keem. 267 fullen de Goten un Herulers up den Peloponnes in. Dor is de Stadt swaar bi in'e Merse maakt wurrn. Man dat duer nich lang, denn weer se wedder upboot. Mehr as hunnert Johre hett se denn noch mol bleiht, ehr dat 395 de Westgoten na Grekenland infullen sünd. jem ehr König Alarich I. hett de Stadt plünnern laten un veel Borgerslüde as Slaven verköfft. Man de Stadt keem doch wedder hooch. 526 hett dat en Eerdbeven geven, man Kaiser Justin I. hett ehr wedder upboen laten. Eerst as de Slawen um 580 rüm ankemen un in dat Land infallen döen, weer dat mit dat antike Leven in de Stadt meist ut. Dat scholl Johrteinten duern, ehr dat en lütt beten wedder bargrup güng.

Fundstäen

De Tempel vun Apollon

De Fundplatz för de Archäologie, dat ole Korinth (Archaía Kórinthos), liggt en Enne buten vun de hüdige Stadt Korinth, de ganz nee boot wurrn is. Vun de antike Stadt is man bloß wenig nableven. Sünnerlich staht dor noch enkelte Sulen vun den Tempel vun Apollo.

Sünst noch wat

• De Krinthen hefft jem ehrn Naam vun düsse Stadt.
• De Partnerstadt vun Korinth is Abilene, Texas, USA

Literatur

• J. B. Salmon: Wealthy Corinth: Ahistory of the city to 338 B.C. Special ed Clarendon, Oxford 1997, ISBN 0-19-814833-X
• Themelis, Petros G.: Ancient Corinth – The site and the museum, briefly illustrated archeological guide, Editions Hannibal, Athens 1998.
• Hanns-Peter Mederer: „Lasst die dröhnende Harfe uns wecken“. Die Schauplätze der Wettkämpfe und Siegesfeiern in Pindars Epinikien. In: Antike Welt 8. 2003. S. 433–440.
• Franz N. Mehling, Evangelos Konstaninou: Knaurs Kulturführer in Farbe Griechenland. Genehmigte Lizenzausg., Weltbild-Verl., Augsborg 1998, ISBN 3-8289-0670-2
• Stuart Rossiter: Reiseführer Griechenland. 4. Upl. München, ira 1984, ISBN 3-406-09251-9
• Hans-Joachim Gehrke: Stasis: Untersuchungen zu den inneren Kriegen in den griechischen Staaten des 5. und 4. Jahrhunderts v. Chr. (Vestigia 35). Beck, München 1985, ISBN 3-406-08065-0
• R.F. Willetts (Rutg.): Bookreeg: States and Cities of Ancient Greece. London, 1972.
• Siegfried Lauffer (Hrsg.): Griechenland: Lexikon der historischen Stätten - von den Anfängen bis zur Gegenwart. Lizenzutgave Bechtermünz, Augsborg 1999, ISBN 3-8289-4144-3

Weblenken

Korinth. Mehr Biller, Videos oder Audiodateien to’t Thema gifft dat bi Wikimedia Commons.