Wikipedia

Lost (Feernsehreeg)

Lost (op plattdüütsch so veel as: „Verloren“) is en US-amerikaansche Mystery-Feernsehreeg mit dörgahn Inholt. Se fangt an mit dat Afstörten vun en Fleger op en eensom Einland in’n Pazifik un hannelt vun de Lüüd, de den Unfall överleevt hebbt un wat se op dat Eiland beleven doot. In’n Verloop vun de Reeg gifft dat ünner annern dör Torüchblennen un Vörrutkieken jümmer wedder ne’e Aspekten, de de Sichtwies op de Reeg, enkelte Szenen un op de Personen faken ännern doot.

Daten vun de Reeg
Plattdüütsche Titel: —
Düütsche Titel: Lost
Originaltitel: Lost
Produkschoonsland: USA
Produkschoonsjohr(en): 2004-2010
Produzent(en):

ABC Studios,
Bad Robot Productions,
Grass Skirt Productions

Episodenläng: ~42 Minuuten
Episodentall: 121 in 6 Staffeln
Originalspraak:

Engelsch

Musik:

Michael Giacchino

Idee:

J. J. Abrams, Damon Lindelof,
Jeffrey Lieber

Genre:

Action, Aventüer, Mystery, Drama

Eerst Sennen: 22. September 2004
op ABC
Eerst Sennen (D): 6. Oktober 2004
op Premiere
Dorsteller

Dorstellers: kiek Figuren un Dorstellers

En Strand in’n Noorden vun Oʻahu, woneem de Överlevenen vun Oceanic 815 jemehr Lager boet

De Feernsehreeg is toeerst an’n 22. September 2004 op dat US-amerikaansche Network ABC sennt worrn. De letzte Staffel güng in de USA an’n 23. Mai 2010 to Enn. In Düütschland lööp de Reeg toeerst in’n Oktober 2004 op den Betahlsenner Premiere, de eerste düütschspraakige Utstrahlen weer. In’t Free-TV weer de eerste Staffel vun April 2005 an bi ProSieben to sehn. Produzeert weer de Reeg vun de ABC Studios, J. J. Abrams sien Produkschoonsfirma Bad Robot Productions un Grass Skirt Productions.

Inholt

ännern

Vertellstil

ännern

In de Feernsehreeg Lost boet de enkelten Episoden op’nanner op un vertellt dormit en foortlopen Geschicht. Dorbi kummt dat faken vör, dat de Begeevnissen ut fröhere Folgen un Staffeln wedder opgrepen warrt. Mitünner kriegt de Begeevnissen dör dat Tofögen vun ne’e Informatschonen en ne’e Bedüden un warrt denn wieterföhrt. Afsehn vun en poor wenige Utnahmen warrt in jede Episood mehrere Vertellsträng wiest, de parallel to’nanner passeert un ünnerscheedliche Hööftfiguren inbinnen deit. Tomeist warrt en enkelten Strang dorbi ut de Sicht vun een Figur vertellt. De Geschichten künnt sik översnieden, so dat enkelte Figuren ok Deel vun mehrere Vertellsträng wesen künnt. Vör allen in de eersten dree Staffeln sünd jümmer wedder Episoden produzeert worrn, de sünners de Charakters vun de Figuren entwickeln schülln. Se hebbt de Geschicht nich sünners vörandreven, man deent vör allen dorto de Figuren to beschrieven un jemehr Denken un Hanneln to verkloren.

De eersten dree Staffeln befaat sik in vör allen mit de Begeevnissen op dat Eiland. Togliek warrt jümmer wedder Torüchblennen (Flashbacks) insneden, dör de de Tokieker Inblick in verleden Begeevnissen vun de enkelten Lüüd kriegen doot, de op dat Eiland strannt sünd. Op disse Oort warrt verklort, wat de Figuren in jemehr Hanneln andrifft, un wat jem an Boord vun den Fleger bröcht hett, de afstört is. Vun de tweeten Staffel an warrt de Torüchblennen ok dorto insett, Szenen ut fröhere Episoden ut annere Blickwinkels dortostellen un so Achtergrünnen optodecken, de ut de Sicht vun annere Figuren vörher nich bekannt weern. Dorbi warrt düütlich, dat sik de Weeg vun de Protanogisten ok vör dat Afstörten vun den Fleger af un to al krüüzt hebbt – deels dör tofallig Drapen, deels över gemeensome Bekannte, Firmen oder Institutschonen. De Protagonisten sünd sik doröver aver tomeist nich klor. So warrt de Torüchblennen ok insett, üm dat Verhollen vun en annere Figur nadräglich to verkloren.

De Blick op de tokamen Geschicht (Flashforward) warrt an’t Enn vun de drüdden Staffel inföhrt un kummt vör allen in de veerten Staffel faken vör. Jüst as bi de Torüchblennen hebbt disse Vörutblennen keen klore lineare Affolg, anners as de Hööftgeschicht op dat Eiland, de wieterhen linear verlopen deit.

In de föfften Staffel kummt as nee Stilmiddel dat Reisen dör de Tiet dorto. Föhlt beleevt de Protagonisten dordör jümmer noch en lineare Affolg vun Begeevnissen, man för den Tokieker billt sik so jümmer wedder ne’e Informatschoonslücken, de de Spannung oprecht hollen doot. Mitünner warrt midden in en Geschicht rinblennt, ahn dat de Tokieker den Sinn dorachter weten deit. Dat warrt denn eerst later oplööst. En wieteren Effekt hett de Tietreis, dat de in de Vörutblennen inföhrte tokamen Siet vun’n Inholt nu mit de Hööfthandlung tosamenföhrt warrn kann, de vun dor an as parallele Hööfthandlung vertellt warrt. Se warrt unafhangig vun’nanner vörandreven, nu aver wedder vun de klass’schen Torüchblennen ünnerbroken.

En wieteren ne’e Vertellstil gifft dat in de sössten Staffel: Wiel de Geschicht op dat eiland nu wedder linear verlöpt, speelt en tosätzlichen Vertellstrang blangento, de beide Tietlienen ut de föfften Staffel wedder tohopenföhrt. Vun offizielle Siet weer disse Vertellteven as Flash-Sideways nöömt. Se wiest en gröttstendeels unafahngige Geschicht, de mit en Begeevnis an’t Enn vun de föfften Staffel anfangen deit. De Protagonisten sünd dorbi wedder in’n Fleger Oceanic 815, de ditmol aver ahn Schaden över dat Eiland flüggt un so as plaant in Los Angeles ankamen deit. De Figuren fallt dordör torüch in dat Verhollen un Hanneln, dat in de eersten Staffel tyypsch för jem weer un staht nu vör ne’e Opgaven. De Utgangssituatschoon is be vele Figuren över dat Afstörten vun den Fleger rut verännert, vunwegen dat de Figuren in verleden Tieten den Verloop vun de Geschicht ännert hebbt.

De Tokieker kriggt dordör en Insicht dorvun, woans sik dat Leven vun de Protagonisten ahn dat Ingriepen vun Jacob un ahn dat Afstörten entwickelt harr. Man togliek geevt de Nevengeschichten den Indruck, dat se dat Resultat dorvun sünd, wat in de sössten Staffel op dat Eiland passeert. Düütlich is dorbi dat Spegeln vun de Aflööp: In de Nevengeschicht versöcht to’n Bispeel Sayid mit grote Möh, sien düster’t verleden Leven achter sik to laten, wiel he op dat Eiland ut fre’en Willen ok wieterhen dissen Weg geiht. Ben Linus dorgegen hett in de Nevengeschicht de Mööglichkeit, as Schoolmeester to’n Wohl vun de Schölers den Direkter vun sien Posten to pressen, deit dat aver denn doch nich, üm sien leefste Schölersche Alex Rousseau ehr tokamen Loopbahn to wohren. Op dat Eiland dorgegen hett he all sien Macht verloren un markt eerst veel to laat, dat he sien Dochter Alex to’n Behollen vun sien Macht oppert hett, ofschoonst egentlich se för em dat Wichtigste weer.

Verloop vun de Geschicht

ännern

Eerste Staffel

ännern
 
Utstellt Modell vun den afstörten Oceanic-Fleger

De Feernsehreeg fangt mit en Opbahn vun Jack Sheppard an, de in en Dschungel wedder to sik kummt. Kort dorna warrt kloor, de he mit en Fleger vun Sidney na Los Angeles reisen wull un dorbi op en Eiland afstört is. He is een vun blots 48 Minschen, de bi’t Afstörten vun Oceanic-Flaag 815 överleevt hett un nu mit de Situatschoon op en eensom Eiland, dat mehrere Quadraatkilometer groot is, kloorkamen mutt. Sheppard, de Dokter is, fangt foorts an, sik üm de Lüüd to sorgen un Ornen in dat Chaos to bringen.

Toeerst is dat Hapen groot, dat gau Hülp kummt un se all wedder vun dat Eiland rünnerhalt warrt. Man mit de Tiet seht sik de Lüüd Gefohren un Lasten gegenöver, man vun Hülp gifft dat keen Spoor. Se fangt an sik to organiseren, wobi Jack – mehr ünner Dwang as ut fre’en Willen, dat Seggen övernimmt. Op dat Eiland kriegt de Minschen dat mit en snaaksch Monster to kriegen, dat ut en Wulk vun swarten Rook to bestahn schient, man dat Eiland schient ok go’e Effekten to hebben, as to’n Bispeel de lahme Joch Locke op eenmol wedder lopen kann. Över Torüchblennen warrt na un na de Persönlichkeiten un Achtergrünnen vun de enkelten Lüüd, de op dat Eiland strannt sünd, dorstellt.

Bi den Versöök, mit en Funkutrüsten Hülp to ropen, fangt de Överlevenen en snaaksch Funksignal op franzöösch op, dat al siet sössteihn Johren sennt warrt. Dat Hapen vun buten reddt to warrn is dormit gau tonichten maakt. Mit de Tiet leevt sik de Minschen also in un lehrt mit’nanner kloortokamen. Dorto kummt dat to ne’e Fründschoppen, man ok to Feendschoppen, vunwegen dat na un na ok düstere Geheemnissen bi den een oder annern togang kamt. So is ünner jem to’n Bispeel Kate Austen, de wegen Moord söcht weer un vun en US-Marshal na Los Angeles bröcht warrn schüll. De Iraker Sayid dorgegen stellt sik as ehmolig Liddmaat un Offizeer vun de Republikaansche Garde rut, de fröher Minschen foltert un ümbröcht hett.

 
Emilie de Ravin speel Claire Littleton

As Sayid alleen losgeiht, üm dat Eiland uttoforschen, warrt he vun en sünnerbore Fro fangen sett, de Danielle Rousseau heet un för dat Funksignal verantwoortlich is. Se seggt, dat se de eenzige vun en Kru is, de vör lange Tiet mit en Schipp strannt is un ehr Kollegen dootschaten hett, vunwegen dat se mit en snaaksche Krankheit infizeert weern. Se is butendem op de Söök na ehr Dochter Alex, de na ehr Angaven vun geheemnisvulle Lüüd roovt worrn is, de se as ‚de Annern‘ betekent. Sayid kann utneihn un vertellt de annern, wat he beleevt hett. De glöövt dorvun toeerst nix, bit se een Dag rutfinnt, dat ünner jem en Ethan Rom is, de nich mit in’n Fleger seten hett. Dat is een vun de ‚Annern‘, de den Opdrag harr, jem to beobachten un to ünnerwannern. As he opflüggt, lööpt Ethan ut dat Lager weg, wobi he aver Claire Littleton roovt, de bald en Kind kriggt. Se kann em twee Weken later weglopen. Bi den Versöök, ehr wedder in sien Gewalt to bringen, warrt Ethan dootschaten. An’t Enn vun de eersten Staffel bringt Claire ehr Kind op de Welt un nöömt em Aaron.

Bito versöcht Michael mit Hülp vun en poor annere en Flott to boen, üm mit sien Söhn Walt vun dat Eiland wegtokamen un Hülp för all de annern Passageren to halen. Mit jem föhrt James „Sawyer“ Ford un de Koreaner Jin Kwon. Man, se kamt nich wiet, vunwegen dat se vun en Motorschipp affungen warrt. De Lüüd an Boord höört schienjbor to de ‚Annern‘ un bringt Walt in jemehr Gewalt. Se sprengt dat Flott un laat de annern op See torüch.

Parallel dorto warrt in’n Dschungel en iesern Luuk opdeckt, wat Locke un de junge Boone toeerst aver geheem hollt. Boone blifft an’t Enn vun de Staffel bi en Unfall doot un Locke vertellt na un na de annern vun sien Opdecken un sien Hapen, dat he dormit verbinnt. To glieken Tiet duukt Danielle Rousseau in dat Lager vun de Strannten op un seggt jem Bescheed, dat de ‚Annern‘ jem bald överfallen doot. Se föhrt Jack un en poor annere to en strannt Schipp in’n Dschungel, woneem se Dynamit finnt. Dormit sprengt se de Luuk apen.

Tweete Staffel

ännern
 
Hütt in’t Lager vun de Passageren, de överleevt hebbt

In de tweeten Staffel warrt de Minschen ut’n Fleger gewohr, wat dat mit de Luuk op sik hett. Se finnt dorünner een Forschungsstatschoon, de vun de so nöömten DHARMA-Initiative boet worrn is – as ok annere Statschonen, de in’n wieteren Verloop noch opdeckt warrt. De Organisatschoon hett in de 1970er un 1980er Johren op dat Eiland Experimenten maakt. De Statschoon hett Stroom, Water un Levensmiddel. Man, all 108 Minuuten mutt de Tallenreeg 4, 8, 15, 16, 23, 42 in een Reekner ingeven warrn – Tallen, de in Hurleys Leven al vörher in grote Rull speelt hebbt. In de Statschoon leevt en Mann, de Desmond heet un siet dree Johren alleen is. Jümmer mit de Opgaav, de Tallen intotippen. Joch Locke nimmt dat nu as sien ne’e Opgaav an.

Parallel dorto warrt in de eersten Hälft vun de Staffel vertellt, wat Michael, Jin un Sawyer beleevt. Jemehr Floot is tonichten maakt un so warrt se vun de Strömung – an en annere Steed – wedder op dat Eiland spöölt, woneem se op wietere Lüüd ut den Fleger drapen doot. Vun disse Grupp sünd blots noch fief Minschen an’t Leven. De annern sünd bi Angrepen vun de ‚Annern‘ dootbleven oder vun jem roovt worrn. De Grupp warrt vun de ehmoligen Polizistin Ana-Lucia Cortez anföhrt, de jem eerst nich över’n Weg troet. Denn maakt se sik gemeensom op’n Weg, de annere Grupp to söken, wat nich ahn Gefohr un Möh vör sik geiht.

 
Harold Perrineau Jr. speel Michael

Michael blifft aver nich lang in’t Lager, vunwegen dat he sien Söhn befre’en will, de noch in de Hand vun de ‚Annern‘ is. Jack, Locke, Sawyer un Kate loopt em na, drapt dorbi aver op en Grupp vun de ‚Annern‘. Jem warrt vertellt, dat se jem in Roh laten warrt, wenn se nich över en sünnere Grenz op’t Eiland gahn doot. Se künnt nix wieter maken un gaht torüch na’n Strand. Kort later finnt se in en Fall, de Rousseau op dat Eiland opstellt hett, en Mann, de sik as Henry Gale vörstellt un mit en Hittluftballon op dat Eiland afstört wesen will. Man se finnt rut, dat he logen hett un in Wohrheit to de ‚Annern‘ höört. He warrt insparrt. Michael hett sik intwüschen op en Hannel mit de ‚Annern‘ inalten: He dröff tosamen mit sien Söhn Walt dat Eiland verlaten, wenn he jem den Fangenen un welke vun sien Frünnen bringen deit. He geiht also torüch in’t Lager un befreet „Henry“, mutt dorför aver Ana-Lucia un en wietere Fro dootscheten. Dorna lockt he Sawyer, Jack, Hurley un Kate in en Fall vun de ‚Annern‘ un dröff wohrhaftig gahn. Hurley warrt in’t Lager torüchschickt, de annern dree blieft in Fangenschop vun de ‚Annern‘

In de Twüschentiet hett Locke den Gloven doran verloren, dat dat Intippen vun Tallen en wohren Sinn hett. As he dat dorop ankamen lett un de Tallen nich ingeven deit as dat sowiet is, kummt dat in de Statschoon to en Överladen vun de elektromagneetschen Energie. Desmond, de twüschendör wedder op’t Eiland torüch kamen is, versteiht nu, dat jüst so en Vörfall vör eenige Maanden de Oorsaak för dat Afstörten vun den Fleger weer. He lööst en Nootafschalten ut, de mit en gresigen elektromagneetschen Impuls verbunnen is, de de Statschoon tonichten maken deit. An’t Enn vun de Staffel blifft unkloor, wat ut de Lüüd worrn is, de to de Tiet vun de Explosion in de Neeg vun de Statschoon weern.

Drüdde Staffel

ännern

Anfang vun de drüdden Staffel warrt oplööst, dat de Lüüd in de Neeg vun de Statschoon de Implosion vun de Statschoon överleevt hebbt. Locke, de sien Gloven an dat Eiland verloren harr, winnt sien Toversicht dör en Vision wedder torüch, man de gröttste Utwirken hett de Implosion op Desmond hatt, de na de Implosion jümmer wedder vun Visionen vun tokamen Begeevnissen hett. Dorbi geiht dat vör allen üm den Doot vun Charlie, den he aver wegen sien Visionen mehrmols hinnern kann. Butendem warrt in en Torüchblennen kloor, dat Claire de Halfsüster vun Jack is.

 
Elizabeth Mitchell is de Dorstellersche vun Juliet Burke

In de parallelen Geschicht stellt sik rut, dat de infungene „Henry Gale“ in Wohrheit Benjamin Linus heet un de Anföhrer vun de ‚Annern‘ is. Jack, Sawyer un Kate warrt vun jem op de Statschoon Hydra op en lütt Eiland vör de Küst vun’t Hööfteiland fasthollen. Kate un Sawyer warrt psychisch ünner Druck sett un warrt togliek as Druckmiddel insett, üm Jack dorto to bringen, dat he Benjamin en Tumor ut’n Rüch opereren deit. Ünner de ‚Annern‘ finnt Jack aver ok de Doktersche Juliet, de vun Benjamin gegen Ehrn willen op’t Eiland bröcht worrn is un ok fasthollen warrt. Se will Jack dorto bringen, dat he Benjamin bi de Operatschoon starven lett. Jack seggt opletzt to, de Operatschoon to maken, kann aver dorför sorgen, dat Kate un Sawyer torüch op dat Hööfteiland künnt. Dorhen gaht ok de ‚Annern‘ na de Operatschoon – tosamen mit Jack.

Kate beslutt aver, Jack dor nich alleen to laten. Tosamen mit Sayidf, Rousseau un Locke maakt se sik op’n Weg. Man, in de Twüschentiet hett Jack en Hannel mit Benjamin maakt: he un Juliet drööft mit en U-Boot vun dat Eiland rünner. Dat U-Boot warrt aver vörher vun John Locke in de Luft sprengt. De is neemlich blots mitkamen, üm sik de ‚Annern‘ antosluten. De aver verlaat dorna jemehr Lager, wobi se Kate, Sayid, Jack un Juliet aver torüch laten doot. Se gaht torüch na’t Strandlager. Juliet hett dat as ehmolige ‚Annere‘ swoor in’t Lager un mutt togliek ok noch en Opdrag vun Benjamin utföhren: Se schall ünner de Fronslüüd in’t Lager na Swangere kieken un dat Dörp för en Angreep vörbereiten. Locke is dorgegen mit Benjamin gahn, de em Geheemnissen vun dat Eiland anvertroet un em butendem den snaakschen Jacob vörstellen deit, de op de ‚Annern‘ optopassen schient un jem Anwiesen gifft. Locke kann den aver nich sehn un nicht hören un warrt doröver argerlich. As he de Hütt verlaten will höört he aver doch en lies Suustern. Doröver is nu wedder Benjamin argerlich. He lockt em in den Dschungel na en Massengraff, schütt em in’n Buuk un lett em dor liggen.

 
Mit en U-Boot hollt de ‚Annern‘ Kuntakt mit de Butenwelt

Parallel dorto lannt op dat Eiland en Fro, de Naomi heet un vörgifft vun Penny Widmore schickt worrn to wesen. Se schall na Desmond söken, is dorbi aver mit’n Heevschruver afstört. Se hett en hoochmodern Satellitentelefon dorbi, wat se aver eerst nich bruken kann wegen dat Stöörsignal vun Rousseau. Juliet hett intwüschen vertellt, dat se en Opdrag vun Benjamin harr un stellt sik nu op de Siet vun de Afstörten. Se denkt sik mit Rousseau tosamen en Plaan ut, woans se den Angreep vun de ‚Anneren‘ afwehren künnt. De annern Lüüd maakt sik aver op’n Weg mit Naomi na den Funktoorn, üm dat Signal vun Rousseau aftostellen, dat se mit den Frachter vör de Küst Kuntakt opnehmen kann. Man, dat gifft noch een Stöörsenner, de den Funk blockeert. Üm den aftostellen maakt sik Desmond un Charlie op’n Weg na en Ünnerwater-Statschoon vun de DHARMA-Initiative.

Charlie kann den Senner utschalten un kriggt över Funk kort Kuntakt to Desmond sien Fründin Penny. So warrt he wies, dat de Frachter op de See nich vun ehr schickt worrn is. Dör en Explosion drauht de Statschoon mit Water vulltolopen. Üm Desmond to schulen, slutt Charlie de Döör to den Kontrollruum un schrifft en Henwies op sien Hand, vördem he afsupen deit, dat dat Schipp nich vun Penny is. Liekers is de Störsenner nu afschalt un Naomi kann Kuntakt opnehmen. An’n Funktoorn draapt se all op Benjamin, de jem to verkloren versöcht, dat de Lüüd an Boord vun den Frachter keen go’en Afsichten hebbt. Unvermodens duukt ok Locke wedder op un smitt Naomi en Mess in’n Rüch. Ok he versöcht Jack to övertügen, dat Gefohr vun den Frachter kummt, man Jack glöövt em nich. So nimmt he Kuntakt mit den Frachter op un höört, dat se foorts Lüüd to’n Redden losschicken wüllt.

De Staffel ennt mit de eerste Vörutblennen: De Tokiekers seht Jack, de vun Alkohol un Tabletten afhangig worrn is un mit sien Leven nich kloor kummt. Eerst sütt dat ut as en Torüchblennen, man as sik Jack an’t Enn mit Kate dröpt, warrt kloor, dat de Szeen de tokamen Tiet wiest. So warrt düütlich, dat se vun dat Eiland wegkamen sünd. Man Jack snackt op Kate in, dat dat en Fehler weer, to gahn un se dringend wedder torüch mööt.

Veerte Staffel

ännern

Na Charlie sien Warnen kort vör sien Doot maakt sik Twievel breed un de Grupp brickt ut’neen: En Deel hapt wieter dorop, vun’t Eiland wegtokamen un blifft bi Jack, wiel de annern sik John Locke ansluten doot, ünner annern Sawyer, Hurley, Claire un Benjamin. Se maakt sik op’n Weg in dat ehmolige Dörp vun de ‚Annern‘. De glieke Nacht mutt en Heevschruver vun’n Frachter op’t Eiland nootlannen. Blangen den Fleger Frank Lapidus, sünd de Physiker Daniel Faraday, de Anthropoloogsche Charlotte Lewis un Miles Straume, de de Geester vun Do’e föhlen kann, an Boord. Sayid flüggt tosamen mit Desmond na den Frachter, man, ünnerwegens kamt se in en Störm, dör den Desmond sien Bewusstwesen anfangt, ahn Kontroll in de Tiet hen un her to jumpen. De Physiker Daniel, de sik in sien Forschung mit dat Reisen in de Tiet befaat hülpt em, dat dat ophöört. Daniel warrt sik mehr un mehr seker, dat dat Eiland en Tietanomalie opwiest, as he sik dat dacht harr.

 
Kevin Durand speel den bretalen Martin Keamy

Op den Frachter finnt Desmond un Sayid rut, dat Charles Widmore dat Schipp sennt hett, üm vör allen na Benjamin Linus to söken. Later stellt sik rut, dat Widmore ok inst to de ‚Annern‘ höört hett, man vun Benjamin vun’t Eiland verbannt worrn is, üm sien Steed intonehmen. Wieter stellt se fast, dat Michael ünner en verkehrten Naam an Boord is, un dor as Spion vun Benjamin ünnerwegens is. So hett he to’n Bispeel rutfunnen, dat an Boord ok en Grupp vun Söldners is, de sik ünner dat Regeer vun den bretalen Martin Keamy kort later op dat Eiland bringen laat. Jemehr Opdrag is, Benjamin fangen to nehmen un denn all annern Lüüd op dat Eiland an de Siet to maken. Op’n Weg na Benjamin bringt se eerst noch Rousseau üm un nehmt ehr Dochter Alex as Börgsche. Bi den Angreep op dat ehmolige Dörp gifft dat en Reeg vun Do’e. Keamy sett Benjamin ünner Druck, vunwegen dat he drauht Alex, sien Tehdochter, doottoscheten. Benjamin lett sik nich dorop in un mutt mit ansehn, as Alex henricht warrt. In sien Brass röpt he dat Rookmonster un kann de Söldners dormit eerstmol torüchslahn.

Sawyer, Miles un Claire maakt sik mit Claire ehr Baby Aaron op’n Weg torüch na’n Strand, wiel Benjamin, Locke un Hurley in’n Dschungel na Jacob sien Hütt söökt – se wüllt vun em Raat vunwegen de Gefohr op dat Eiland. Claire löpt ünnerwegens weg as se nachts Christian Shephard, ehrn Vadder, sütt un duukt nich wedder op. Jüst den Christian Shephard – tosamen mit Claire – sütt ok Locke in de Hütt, de em den Raat gifft, dat Eiland to „bewegen“. Dorophen maakt sik de Grupp op’n Weg na de DHARMA-Statschoon Orchidee, woneem Benjamin dat ümsetten will.

Torüch op’n Frachter maakt Keamy de Söldners för den tweeten Angreep praat un sleiht nu en harderen Gang in. He dwingt Lapidus dorto, jem torüch to bringen, maakt aver vörher Sprengstoff scharp, mit en Tünnerer, de mit en Pulsmeter an sien Arm verbunnen is un losgeiht, wenn he doodblifft. Se töövt bi de Orchidee op Benjamin, de Locke den Opdrag gifft, de Statschoon to nütten, wiel he de Söldners aflenken will, dordör dat he sik jem stellen deit. Sayid kann in de Twüschentiet mit en Boot torüch an’n Strand utneihn, woneem de Grupp nu anfangt, de Lüüd na un na op dat Schipp to bringen. Jack un Sawyer dorgegen gaht in’n Dschungel un söökt na Hurley. Sayid un Kate gaht jem na, warrt dorbi aver kort later vun de ‚Annern‘ fangen nahmen, de nu vun Richard Alpert anföhrt warrt. De ‚Annern‘ künnt mit Hülp vun Sayid un Kate de Söldners utschalten un laat jem in’n Gegentog wedder free. As ok Jack un Sawyer bi de Statschoon ankamt, drapt se op Hurley un Locke, de aver op dat Eiland blieven will.

Mit den Heevschruver laat sik Jack, Kate, Hurley, Sawyer un Sayid na den Frachter bringen. Man, de Maschien hett bi den Kamp gegen de Söldners wat afkregen un verlütt Driefstoff. Sawyer jumpt dorüm in’t Water un swemmt torüch an’n Strand, üm de annern de Mööglichkeit to geven wegtokamen. In de Orchidee kummt Benjamin tosamen mit Locke in de Twüschentiet in en Ruum, woneem fröher Experimenten mit Teleportatschoon in Ruum un Tiet maakt weern. Se warrt aver vun Keamy överrascht, de noch jümmer leven deit. Benjamin, de den Doot vun Alex nich verwunnen hett, geiht op em los un stickt em af. Dormit warrt de Explosion an Boord vun den Frachter utlööst. En Versöök den Tünnerer uttoschalten hett nich klappt, man de Explosion kann lang noog ruttögert warrn, dat de Heevschruver noch mol tanken un wedder losflegen kann. Miachel un Jin blieft op dat Schipp torüch as de Bomb hoochgeiht. Blots Jack, Kate, Aaron, Sun, Desmond, Hurley un Sayid künnt tosamen mit Frank Lapidus torüch na’t Eiland flegen. Man, dat Eiland is na en grellen Lichtblitz op eenmol nich mehr to sehn. Benjamin hett neemlich intwüschen Locke na de ‚Annern‘ schickt, üm jem antoföhren. He sülvst aver is in en olle Höhl gahn, woneem he en groot Rad dreiht hett. Dat Eiland füng dorophen an to schuckern bit de Lichtblitz keem.

 
Sawyer sien Kledaasch in de Reeg

As de Heevschruver nu narms mehr lannen kann mit Lapidus nootwatern. Mit en Nootfallflott künnt sik de Lüüd redden un drievt nu op de See, bit se opletzt vun en Schipp opdeckt un an Boord nahmen warrt. Dat Schipp höört Penny Widmore to, de Fründin vun Desmond, de na em söcht hett. De Överlevenden sünd in Sekerheit, man üm ok de annern to schulen, de op’t Eiland torüch bleven sünd, besluut se, nich över dat Eiland un jemehr Begeevnissen to snacken. Penny bringt jem na Indonesien un sett jem vör de Küst af. Vun dor ut warrt se torüch in de Zivilisatschoon bröcht, woneem se as de Oceanic Six bekannt warrt – de eenzigen, de dat Unglück överleevt hebbt.

Parallel dorto warrt in Vörutblennen wiest, woans dat de Oceanic Six geiht, nadem se wedder torüch sünd un in en Kunferenz mit de Presse jemehr Lögengeschicht vertellt hett, wona all annern ümkamen sünd. Vun de Flaagsellschop kriegt se veel Geld för dat, wat se dörmaakt hebbt. Hurley is toeerst froh, warrt aver bald vun Wahnvörstellen un Spöken plaagt, bit he sik wedder in sien olle psychiatrische Anstalt begifft. Sun kriggt ehr Kind, dat se vun Jin hett un truert üm ehrn Ehmann, de torüch blieven müss. Kate sorgt sik üm Aaron, den se as ehr egen Kind utgeven hett. Se kummt vör Gericht wegen ehr fröheren Vergahn, warrt aver freesproken vunwegen dat se nu en annern, betern Minsch worrn is. Sayid heiraat sien grote Leef Nadia, de aver kort later ümbröcht warrt. As se begraven warrt, dröpt he op Benjamin, de vun’t Eiland rünner müss. He vertellt Sayid, dat he bewiesen künn, dat Charles Widmore för den Doot vun Naida verantwoortlich is. Sayid maakt dorophen en Reeg vun Lüüd an de Siet, de em vun Benjamin wiest warrt. Jack kummt anfangs ok goot kloor un leevt en Tiet mit Kate tohopen, man de verleden Tiet lett em nich los. Mehrmols hett he Visionen vun sien Vadder un fallt so langsom in Afhangigkeit vun Tabletten un Alkohol, wat op de Situatschoon föhrt, de an’t Enn vun de drüdde Staffel al in en Vörutblennen wiest worrn is.

Opletzt warrt kloor, dat se all Besöök harrn vun en Jeremy Bentham, de jem övertügen wull, dat se wedder torüch op dat Eiland müssen. Bentham blifft aver doot un schall sik offiziell sülvst ümbröcht hebben. Man, nümms, mit Utnahm vun Jack will wedder torüch. As he een Nacht besopen bi den Bestatter inbreken deit, woneem Bentham sien Sarg steiht, dröpt he op Benjamin, de em vertellt, dat dat bannig wichtig weer, dat se all torüch gaht un dorbi ok de Liek vun Bentham mitnehmt. He will em hülpen, de annern to övertügen. An’t Enn stellt sik rut, dat de geheemnisvulle Bentham in Wohrheit John Locke is.

Föffte Staffel

ännern

In de föfften Staffel gifft dat twee Geschichten, de eerst unafhangig vun’anner afloopt un in’n Verloop vun de Staffel wedder tosamenföhrt warrt. Bi den eersten Strang geiht dat üm de Minschen, de op’t Eiland torüch bleven sünd. Siet dat Eiland dör Benjamin bewegt worrn is, jumpt de Lüüd vör un torüch dör de Tiet, wiel dat Eiland fast blifft. Man, se hett ehr Positschoon in de See ännert. Dör jemehr Tietsprüng warrt se deelwies Szenen ut fröhere Episoden gewohr, man ut annere Sicht, deelwies sünd dat ok Begeevnissen vun de man weet, de aver noch keeneen sehn hett. Dat bedröpt ok Jin, de bi de Explosion vun’n Frachter överleevt hett. Man de Sprüng dör de Tiet hebbt en Naklapp, vunwegen dat de Lüüd dorvun eerst Koppweh, later ok Nesenblöden kriegt, wat an’t Enn sogor to’n Doot föhren kann. Charlotte blifft opletzt doot dorbi. De annern warrt kloor, dat se sik blots redden künnt, wenn se de Tietsprüng hinnern künnt. Se loopt mit Locke torüch na de Orchidee, woneem he opletzt dat Rad, dat Benjamin bewegt harr, wedder in sien Ass torüch drücken kann. Dorophen höört de Tietsprüng wohrhaftig op, man Locke warrt dorbi vun’t Eiland teleporteert – jüst so as Benjamin vör em.

 
Hüüs in dat DHARMA-Dörp

De annern blievt op dat Eiland in befinnt sik nu in dat Johr 1977, as de DHARMA-Initiative noch op dat Eiland aktiv weer. Se mischt sik ünner de Lüüd ahn jemehr Geheemnis to vertellen un warrt wies, dat de DHARMA-Lüüd Arger mit de Inheemschen vun’t Eiland hebbt, man se en Wapenstillstand afmaakt hebbt. Wat mit Locke dorna passeert is, warrt in Torüchblennen vertellt: He waakt in de Wööst vun Tunesien op un warrt vun Charles Widmore besöcht, de em seggt, dat he en Go’en un Benjamin en legen Kerl is. He hülpt Locke dorbi, de Oceanic Six to finnen. Man, Locke kann jem nich övertügen wedder op’t Eiland torüch to gahn, so dat he sik vertwievelt sülvst ümbringen will. Jüst rechttietig kummt Benjamin dorto un hollt em dorvun af, maakt em kort later denn aver sülvst doot, as he de för em wichtige Informatschoon kregen hett.

Parallel dorto warrt vun de Oceanic Six in de Nutiet vertellt. Jack arbeit nu mit Benjamin tohopen, vunwegen dat he sien Bestimmen dorin sütt, torüch to gahn. Eenige vun jem kann he besnacken mit em to kamen. Över Eloise Hawking, de sik as Mudder vun Daniel Faraday rutstellt, warrt se gewohr, woans se torüch kamen künnt: Se mööt wedder in en Fleger stiegen, de jüst de glieke Streck flüggt as Oceanic 815 bi ehr Afstörten. Dör verscheden Ümstännen fleggt opletzt all söss un Benjamin mit Flaag 316 vun Ajira Airways – blots Aaron warrt vun Kate bi sien egentliche Grootmudder torüchlaten. Ok de Liek vun Locke is mit an Boord. Över de Positschon vun’t Eiland warrt de Flaag ruug, wobi Jack, Kate, Hurley un Sayid ut den Fleger teleporteert warrt un sik op’t Eiland wedderfinnt. De Fleger mutt dorgegen op dat lütte Neveneiland, de Hydra, nootlannen.

De Lüüd ut’n Fleger, dorünner ok Benjamen, Sun un Lapidus, de de Maschien flagen hett, finnt dor de Anlagen vör, de in de drüdden Staffel noch vun de ‚Annern‘ bruukt worrn sünd. Ok Locke duukt wedder op, de schienbor wedder leven deit. Heemlich sett Sun un Lapidus mit en Boot op dat Hööfteiland över un gaht in dat verlatene Dörp vun de ‚Annern‘. Locke un Ben kamt wat later ok dorhen. In en Huus finnt se en oolt Foto ut de 1970er Johren, op dat Jack, Kate un Hurley to sehn sünd un warrt dormit wies, dat de in de verleden Tiet lannt sünd. Lapidus schippert torüch na de Hydra, wiel Benjamin, Sun un Lock torüch den Tempel vun de ‚Annern‘ opsöken doot. Dor will sik Benjamin vör dien Daden verantwoorten, man unvermodens lett dat Rookmonster em leven. He hett en Vision vun sien do’e Dochter Alex, de em drauht em ümtobringen, wenn he nich allens deit, wat Locke em seggt. Eerst later warrt kloor, dat dat Rookmonster de Gestalt vun Locke annahmen hett.

 
Nestor Carbonell harr de Rull vun Richard Alpert

An’n Strand drapt de dree op Richard Alpert un sien Lüüd. He lett sik as Anföhrer bestätigen un gifft Richard de Anwiesen jem all na Jacob to bringen. Benjamin kriggt ünnerwegens den Opdrag Jacob an de Siet to maken. As Locke un Benjamin dor sünd, finnt se Jacob wohrhaftig vör, woneem Benjamin em ümbringt, so as Locke em dat seggt hett. Jacob wehrt sik nich un warrt vun Locke in’t Füer stött, wo he gau to Asch verbennen deit. De ‚Annern‘ un Richard töövt so lang buten, as op eenmol de Lüüd ut’n Ajira-Fleger opduken doot, de Lapidus un en Sarg mitbröcht hebbt. Richard lett den Sarg apen maken un finnt dor binnen de Liek vun Locke vör.

Jack, Kate un Hurley warrt parallel dorto vun Jin in’n Dschungel funnen. Jin arbeit intwüschen för de DHARMA-Initiative, so dat ok jem kloor warrt, dat se in de verleden Tiet reist sünd. Jin seggt Sawyer bescheed, de sik to’n Sekerheitsbaas in dat DHARMA-Dörp hoocharbeit hett. He kriggt dat hen, de dree in de DHRAMA-Initiative intoslüsen. Mit Sayid löpt dat nich so goot, vunwegen dat de eerst in’t Biwesen vun an annern DHARMA-Mitarbeiter opfunnen warrt, so dat se em nich heemlich inslüsen künnt. Se sünd dwungen em fasttonehmen, vunwegen dat he för een vun de Inheemschen hollen warrt. In Fangenschop dröpt Sayid op den noch jungen Benjamin Linus, de mit sien Vadder in’t Dörp leevt aver an’n leefsten to de Inheemschen överlopen will. Ben hülpt Sayid, ut dat Gefängnis wegtolopen. Sayid versprickt em, dat he em mitehmen deit, nütt aver de Mööglichkeit em kort later antoscheten. Op de Wies glöövt Sayid de Tokumst ännern to künnen. Man, Benjamin överleevt swoor besehrt. Liekers drauht he to starven, vunwegen dat Juliet em medizinisch nich hülpen kann. Kate bringt den Jungen denn mit Hülp vun Sawyer in’n Dschungel na de ‚Annern‘, de em wedder op de Been bringen schüllt. Se draapt op Richard Alpert, de in all Tieten jümmer gliek oolt utsütt. He seggt to, Benjamin to hülpen, gifft togliek aver to bedenken, dat de Jung denn för jümmer een vun jem warrt. As de Vörfall rutkummt, warrt se vun de annern DHARMA-Lüüd verfolgt.

Togliek warrt se wies, dat de DHARMA-Initiative jüst de Swan-Statschoon boot, üm en starken elektromagneetschen Energieborn uttoforschen. Jüst de Statschoon de 2004 dorför verantwoortlich is, dat Oceanic 815 afstörten deit. Vun Daniel Faraday weer Jack vertellt, dat mit de Explosion vun en Waterstoffbomb in de Neeg vun de Statschoon de Verloop vun de Tiet ännert warrn kann. So en Bomb warrt wohrhaftig vun de ‚Annern‘ verwohrt, wat Daniel bi een vun de Tietsprüng wies worrn is. Man, de Bomb is veel to groot, as dat se transporteert warrn künn. Also boet Jack mit sien Frünnen de veel lüttere Atombomb ut, de to’n Tünnern vun de Waterstoffbomb inboet weer. Ofschoonst dat Sekerheitspersonal vun de DHARMA-Initiative al op jem töövt un dat to en Scheeteree kummt, kann Jack de Bomb in den Bohrschacht smieten, de aver bi’n Opslag nich hoochgeiht. De Bohrkopp is intwüschen an den Energieborn ankamen, worophen sik en bannig stark Magnetfeld opboet, dat allns ut Metall antehn deit. Juliet warrt vun en Iesenkeed ümwickelt un so in dat Bohrlock togen. Swoor besehrt liggt se an’n Grund vun’n Schacht un sütt de Bomb dor liggen. Mit letzte Kraft sleiht se op den Tünnerer in un lööst so doch noch de Explosion ut. Mit den Lichtblitz vun de Explosion geiht de Staffel to Enn.

Sösste Staffel

ännern

De sösste Staffel fangt an mit den Lichtblitz ut de Atomexplosion an’t Enn vun de föfften Staffel. Wohrhaftig hett de Explosion de Överlevenen in jemehr egentliche Tiet torüch bröcht: se staht vör de implodeerten Statschoon. In de Överresten warrt Juliet toeerst noch an’t Leven vörfunnen, man se blifft in de Arms vun Sawyer doot. Wiel Hurley op den swoor besehrten Sayid oppasst, duukt de Geest vun Jacob bi em op un raat em, sien Frünnen in den Tempel vun de ‚Annern‘ to bringen. Ok de Överblennen in de Parallelgeschicht fangt mit den Lichtblitz an. Dorna sütt man de Flaaggäst wedder in’n Fleger vun Oceanic, de ditmol nich afstörten deit, man na Plaan in Los Angeles lannt. Eenmol warrt dat ’n beten ruug an Boord as de Fleger över dat Eiland is, man de Flaag geiht wieter. An Boord is ok Desmond, wat al wiest, dat sik disse parallele Tietstrang anners entwickeln deit. In’n Verloop vun de Staffel warrt jümmer wedder dat Leven vun de Hööftfiguren wiest un woans sik dat alternativ entwickeln künn.

Op dat Eiland nütt dat Rookmonster sien Gestalt as John Locke, üm de Minschen för sien Teel to manipuleren. He maakt sik op de Söök na Jack un de annern, de sik bit op Jin, Kate un Sawyer all in’n Tempel begeevt. Toeerst söcht de verkehrte Locke Kuntakt to Sawyer un övertüügt em, dat he sik em ansluten schall bi den Versöök, dat Eiland duersom to verlaten. Man, he vertellt ok, dat dat blots geiht, wenn ok all de annern Överlevenen gemeensom mit em güngen. Jin slutt sik de Grupp an, as he in’n Dschungel op de vermisste Claire drapen deit, de vun dat Rookmonster manipuleert worrn is. Mit Hülp vun Sayid un Claire kann dat Monster in den Tempel inbreken un all Inwahners ümbringen, de sik em nich freewillig ansluten mögt. Kate överleevt un blifft bi Locke.

 
Mark Pellegrino, de Dorsteller vun Jacob

Wiel den Angreep weer en Koppel vun Lüüd nich in’n Tempel, dorünner Jack, Hurley, Benjamin, Sun un Richard. Se söökt dat Lager an’n Strand op. In en Torüchblennen warrt wiest, woans Richard op dat Eiland kamen is. He weer inst as Slaav an Boord vun dat Schipp in’n Dschungel un weer vun Jacob rett. Richard is denn in Jacob sien Deent gahn un hett in sien Opdrag twüschen em un de Minschen vermiddelt, de he op dat Eiland halt. Es Gegenleistung künn Richard nich mehr doodblieven un weer ok nich mehr öller. As Jacob nu doot is, stört dat Richard in grote Twievel, man Hurley, de nu af un to vun Jacob opsöcht warrt, weet, wat to doon is: Dat Rookmonster mutt doran hinnert warrn, vun’t Eiland wegtogahn. Also beslutt de Grupp, den Ajira-Fleger op de Hydra in de Luft to sprengen. Ünnerwegens drapt se mehrmols op de Grupp ünner Locke sien Regeer, wat to wietere Opdeelen vun de Lüüd föhrt.

Wat dat mit Jacob un sien Gegenspeler, dat Rookmonster, op sik hett, warrt eerst kort vör’t Enn vun de Staffel oplööst. Dorna weern de beiden Tweeschen, de vun jemehr Tehmudder inst in dat Geheemnis vun dat Eiland inweiht worrn sünd: Se wies jem en Höhl midden op’t Eiland, ut de en snaaksch un geheemnisvull Licht schienen deit, wat se as ‚Born vun’t Leven, vun’n Doot un de Weddergeboort‘ betekent. Man, nienich dröff man in dat Licht ringahn, vunwegen dat een denn wat passert, wat gresiger is as der Doot. ’N beten wat vun dat Licht is ok in jeedeen Minschen, man, wenn dat Licht ophöört to lüchten, denn höört dat överall op. De „Mudder“ vertellt de Kinner, dat een vun jem dorto bestimmt is, inst dat Licht to höden. Jacob verkloort an annere Steed vun de Reeg, dat dat Eiland en Oort vun Proppen is, de dat Böse ünner Versluss hollt. Jacob sien Broder, de keen eenzig mol mit Naam ansnackt warrt, kriggt aver rut, dat jemehr wohre Mudder inst vun buten op dat Eiland kamen is un vun de Tehmudder doothaut weer. He beslutt de anndern Minschen to leven, de mit sien wohre Mudder op dat Eiland kamen sünd. So hapt he inst över de See vun’t Eiland wegtokamen. As sien Tehmudder wies warrt, dat he dorto dat Licht bruken will, söcht se em op un haut em bewusstlos, maakt dat Dörp tonichten un verschütt den Togang to dat Licht. Ut Woot maakt he ehr dorför doot, man eerst nadem se an Jacob de Opgaav dat Licht to höden wietergeven hett. Jacob betahlt sien Broder den Moord torüch, sleiht em daal un smitt em in dat Licht, dat vör en korten Ogenblick düster warrt, denn aver en Wulk vun swarten Rook utspeen deit. Jümmer noch versöcht Jacob sien Broder, de nu keen Lief mehr hett, vun dat Eiland wegtokamen, wat he aver blots kann, wenn dat Jacob nich mehr gifft. Dorüm söcht Jacob na Nafolgers, de an sien Steed pedden künnt, wenn sien Broder em een Dag ut’n Weg rüümt. Man, solang de „Kannedaten“ vun Jacob schuult warrt, kann dat Monster jem nich direkt wat andoon.

Intwüschen is ok Charles Widmore op Dat eiland kamen un hett Desmond gegen den sien Willen mitbröcht, vunwegen dat de inst den an sik döödlichen elektromagneetschen Vörfall in de Statschoon överleevt hett. Man, Desmond warrt vun Locke sien Grupp fangen nahmen. As Benjamin twüschen de Fronten to kamen drauht, sleiht he sik wedder op de Siet vun’t Monster un maakt Widmore an de Siet. De Oceanic Six sünd intwüschen op de Hydra ankamen un versöökt dat U-Boot vun Widmore to övernehmen ahn Locke mit an Boord nehmen to möten. Eerst sütt dat ut, as wenn dat goot geiht, denn aver markt se, dat Locke jem jüst dor hebben wull, dat he jem all op eenmol mit Hülp vun en Bomb an de Siet maken kann. Bi den Vörfall blievt Jin, Sun un Sayid doot. Wiel de Rest wedder op dat Hööfteiland strannt. Lapidus, Richard un Miles verfolgt gleiktietig en annern Plaan: se wüllt den Ajira-Fleger wedder flott maken un dormit dat Eiland verlaten. Op dat Hööfteiland wiest sik Jacob nu de Kannedaten, de noch överbleven sünd. He verkloort jem, wat dat mit dat Rookmonster op sik hett, un dat de op gor keen Fall dat Eiland verlaten dröff. Jacob vertellt jem nu ok worüm he jüst jem utwählt un op dat Eiland bröcht hett, neemlich vunwegen dat se nich tofreden weern un in jemehr Leven na wat söcht harrn, wat se nich finnen künnen. Nu müssen se en Wahl drapen, wokeen vun jem de Opgaav övernehmen schüll, op dat Eiland optopassen. Jack mellt sik dorophen freewillig un warrt vun Jacob, de dorna verswinnen deit, mit de ne’en Verantwoortung betroet.

 
Sittreeg vun Oceanic 815

De verblevenen Lüüd drapt sik opletzt all in de Neeg vun dat Licht. Jack as ok Locke glöövt beid, dat se de sünnere Gaav vun Desmond to’n egenen Vördeel insetten künnt. To drütt gaht se na dat Licht, woneem se Desmond an en Reep rünenrlaten doot. De finnt ünnen en Waterbecken vör, wat dat grelle Licht utstrahlt, wat en stark elektromagneetsch Feld dorstellt. In de Mitt vun dat Becken sitt – jüst so as en Proppen – en groten länglichen Steen in en Lock, den he ruttehn deit. Dat Water löpt af un dat Licht geiht ut. Desmond warrt bewusstlos un dat Eiland warrt nu jümmer wedder vun Eerdbeven dörruckelt un fangt an tweitobreken un ünnertogahn. Man, dat Rookmonster is nu nich mehr schuult un kann starven. As em dat kloor warrt, sleiht he Jack bewusstlos un versöcht mit en Seilschipp vun dat Eiland wegtokamen, mit dat Desmond vör Johren hier strannt weer. As Jack wedder kloor is, geiht he em aver na un versöcht em optohollen. En gresigen Kamp fangt an, den Jack blots winnen kann, vunwegen dat Kate Locke anscheten deit. He sülvst warrt swoor besehrt. Liekers hett he jümmer noch de Opgaav dat Eiland to redden.

Intwüschen hebbt Lapidus, Miles un Richard den Fleger meist wedder flott, wat de annern över Funk mitkriegen doot. jem blifft nich mehr veel Tiet to’n starten, vunwegen dat dat Eiland jümmer noch drauht tweitobreken. Benjamin un Hurley blievt liekers bi Jack un hülpt em bi sien Opgaav. Kate un Sawyer dorgegen schippert mit dat Boot na de Hydra un hapt noch rechttietig antokamen, vördem de Fleger weg is. Jack sien Plaan is, sülvst in de Höhl rünnertostiegen un sik dormit sülvst to oppern. He gifft dorüm de Opgaav, dat Eiland to schulen an Hurley wieter. Mit alle sien verbleven Kräft sleept sik Jack na dat Becken, rett Desmond un stickt den Steenproppen wedder an sien vörsehn Steed. As dat Licht wedder strahlen deit höört ok de Eerdbeven wedder op.

As Hurley un Benjamin Desmond an’t Reep hoochtehn doot warrt ok jem kloor, dat Jack nich wedder torüch kummt. Hurley fraagt Ben, dat he em bi sien Opgaav hülpen schall, wat de mit Freid annimmt. Kate un Sawyer kamt gliektietig jüst noch bi’n Fleger an un griept dorbi ok Claire noch op. Se all künnt mit den Fleger vun’t Eiland verswinnen. Opletzt warrt Jack wiest, de sik in’n Dschungel wedder finnt, an de glieken Steed, woneem he na’t Afstörten vun Oceanic 815 opwaakt is. Över em sütt he den Ajira-Fleger un hett nu Wissheit, dat tomindst en Deel vun sien Frünnen nu in Sekerheit is. Denn sluut sik sien Ogen langsom.

De Parallelgeschicht is mit de Begeevnissen op dat Eiland verknütt, vunwegen dat de Figuren na un na all dor in Form vun korte Gedanklenblitzen in de Tiet dor torüchdenken mööt. Sünner in Situatschonen, de vergliekbor op’t Eiland passeert sünd. En grote Rull speelt hier ok Spegels un dat Verhollen vun de Lüüd, wenn se sik sülvst seht. Sünners bi Jack kamt Lücken dorto, wenn he an sien Kindheit denkt, as ok en wedder un wedder opduken blödige Wunn an’n Hals, de sik eerst an’t Enn as en Wunn ut den Kamp gegen Locke rutstellt. Toeerst markt dat blots Desmond, dat twüschen de Lüüd vun Flaag 815 en Verbinnen besteiht. He fangt an, de Hööftpersonen to söken un jem op de Begeevnissen op’t Eiland to stöten. Na un na kriegt se all disse Flashbacks, vör allen denn wenn se en Minschen drapt, to de se sik in de Tiet op’t Eiland sünners hentogen föhlt hebbt. An’n längsten duert dat Bi Jack, de sik eerst na en Drapen mit Kate övertügen lett na en Kark to kamen, woneem intwüschen ok de twüschendör verlorene Sarg mit de Liek vun Jack sien Vadder steiht. Dor wulln sik all de annern drapen, üm dorna „to gahn“. Blots Benjamin sitt alleen vör de Kark un vertellt HUrley, dat he nich mitgeiht, vunwegen dat he noch wat to doon harr.

In de Kark söcht Jack toeerst den Sarg vun sien Vadder op, de aver leddig is. Sien Vadder scheint lebbing to wesen un snackt mit Jack. Dorbi vertellt, dat he dood is, jüst so as all sien Frünnen, de deelwies vör em, deels aver ok lang na em doodbleven sünd. Man, dat speel allns keen Rull mehr, vunwegen dat de Tiet vör jem keen Bedüden mehr harr. Se sülvst harrn sik disse Realität maakt, üm sik na jemehrn Doot hier wedderfinnen un gemeensom wietergahn to künnen. In de Kark drapt se all de Överlevenen vun den Flaag wedder. Opletzt maakt Jack sien Vadder de Döör vun binnen apen un warrt vun en grell Licht anstrahlt.

Epiloog

ännern

In’n Epiloog duukt Benjamin in en DHARMA-Logostiklager in Guam op un vertellt de beiden Mitarbeiters, dat dat de DHARMA-Initiative al siet twintig Johren nich mehr gifft un se gahn künnt. As de beiden Antwoorten verlangt, meent Benjamin, dat se beid een Fraag stellen drööft. De een will weten, wo dat angahn gahn, dat se de Paketer mit dat Eten op dat Eiland schicken doot, ofschoonst se jümmer ünnerscheedliche Koordinaten kregen hebbt. Ben verkloort dorophen, dat dat Eiland sik bewegen deit. De annere Arbeiter will weten, worüm se ok Foder för Iesboren verschickt hebbt, wenn dat Eiland doch in de Tropen liggt. Ben leggt dorophen en DVD mit den Orietnerensfilm vun de Hydra-Statschoon in, in den vun Deerversöken snackt warrt. Bito verkloort de DVD den Sinn vun Ruum 23.

Dorna besöcht Ben de psychiatrische Anstalt Santa Rose, üm Walt to besöken. He övertüügt em, dat he wat sünners is un he op dat Eiland höört. Buten stiegt se in en DHARMA-Bus, in den Hurley al töövt. He seggt Walt, dat he op dat Eiland höört un he mit em över en Opgaav snacken wull.

Figuren un Dorstellers

ännern

To Anfang hett de Hööftcast vun Lost veerteihn Dorstellers ümfaat un weer dormit to de Tiet een vun de gröttsten Casts in’t US-amerikaansche Prime-Time-Feernsehn[1].

 
Michelle Rodríguez, de Dorstellersche vun Ana Lucia Cortez

För de vermeentliche Hööftfigur Jack weer toeerst Michael Keaton vörsehn. Die Figur schüll egentlich in de Pilotepisood doodblieven, worophen Kate dat Seggen in de Grupp övernahmen harr. Op disse Wies wullen de Produzenten den Indruck vermiddeln, dat keeneen vun de Hööftfiguren seker is. Man, de Senner ABC weer fast de Meenung, dat sik de Tokiekers „bedrogen“ föhlen künnen, wenn de vermeentliche Hööftfigur middenmang de Geschicht ümkummt. Ut den Grund is de Rull vun den Fleger in’t Book schreven worrn, de vun Jack, Kate un Charlie to Anfang in’t Cockpit funnen warrt un kort later ansteed vun Jack vun dat Monster ümbröcht warrt. Keaton hett dorophen de Rull aflehnt, vunwegen dat he sik nich op Duer op en Rull in en Feernsehreeg fastleggen wull. So is denn Matthew Fox op de Rull sett worrn.

De Figur Hurley is egens för Jorge Garcia schreven worrn. He weer ok de eerste Dorsteller, de för de Reeg ünner Verdrag nahmen weer[2]. Jüst so weer de Figur Sun egens för Kim Yoon-Jin schreven. Se harr egentlich vör de Rull vun Kate vörsproken, man de Produzenten menen, dat se nich op de Rull passen deit. Liekers wullen se ehr geern in de Reeg dorbi hebben un hebbt dorophen de Rull as ok de vun ehrn Ehmann Jin utdacht.

Charlie Pace schüll oorsprünglich öller anleggt wesen. De Rull weer as Rockstar dacht, de na en lange Loopbahn in de Johren un ut de Mood kamen is. Man, de Produzenten weern so andoon vun dat Vörspeel vun Dominic Monaghan, dat se de Rull op em tosneden hebbt. Kate, de vun Evangeline Lilly speelt worrn is, weer eerst ok düütlich öller vörsehn. Bito weer ok ehr Achtergrund anners dacht: se weer egentlich nich as Kriminelle op de Flucht vörsehn, man as frisch verheiraate Fro, de sik aver nich seker is, dat de Eh wohrhaftig de richtige Weg wesen is. Ehr Ehmann weer achter in’t Heck vun’n Fleger wesen, so dat en Deel vun Kate ehr Motivatschoon de Söök na em wesen weer, wiel se gliektietig mit Jack oder Sawyer anbanneln schüll. En Deel vun disse Motivatschoon is in de Reeg denn för de Nevenfigur Rose övernahmen worrn, wobi de ehrn Ehmann aver ahn Twievel leef hett.

 
Michael Emerson speel de Rull vun Benjamin Linus

Ian Somerhalder (Boone) is al in de eersten Staffel wedder utscheedt, weer aver in Gastoptreden noch en poor mol in Form vun Torüchblennen oder Visionen wedder to sehn. Ok Malcolm David Kelley (Walt) weer na sien Utscheden in en poor Gastoptreden to sehn.

Mit de tweeten Staffel in’t Johr 2005 kemen Michelle Rodríguez, Cynthia Watros un Adewale Akinnuoye-Agbaje to den Hööftcast mit dorto mit Figuren, de an en annere Steed vun’t Eiland lannt sünd. Bi de Dreiharbeiten keem Rodríguez wegen Verstöten gegen Verkehrsregeln mehrmols in Kunflikt mit dat Gesett vun Hawaii. In’n Dezember 2005 is se tosamen mit Watros wegen Missbruuk vun Drogen an’t Stüer fastnahmen worrn[3]. Jemehr Rullen weern 2006 ut dat Dreihbook streken, wobi dat offiziell heten hett, dat dat nix mit de Problemen mit dat Gesett to doon hatt harr[4]. Vun eenige Sieten weer aver vermoodt, dat dat de egentliche Grund weer, vunwegen dat de ABC-Mudderkunzern Disney groten Weert op en rein Image legg. Bi de Dreiharbeiten to de drüdden Staffel 2007 keem ok Adewale Akinnuoye-Agbaje mit dat Gesett in Kunflikt, as he bi’t Autoföhren ahn Föhrerschien faatkregen weer. Dorför müss he een Nacht in’t Gefängnis, vördem he gegen en Kautschoon vun 500 US$ wedder freelaten weer[5]. Kort later is ok sien Rull ut de Reeg streken worrn, wat aver na Utseggen vun all Bedeeligten vun Anfang an so plaant weer.

Mitt vun de tweeten Staffel is de Rull vun Benjamin Linus (speelt vun Michael Emerson) inföhrt worrn, de an sik blots för en poor Episoden anleegt weer. Man, de Produzenten weern so beindruckt vun sien Schauspeel, dat se de Rull utboet hebbt. Vun de drüdden Staffel an tell he denn to de Hööftdorstellers. Jüst so keem Henry Ian Cusick (Desmond) in de drüdden Staffel as Hööftdorsteller dorto, nadem he al in de tweeten Staffel en Nevenrull harr, as ok Elizabeth Mitchell (Juliet). Monaghan dorgegen is utscheedt, weer aver ok noch mehrmols in Gastoptreden dorbi.

In de veerten Staffel kemen dree ne’e Hööftrullen dorto, de vun Jeremy Davies, Ken Leung un Rebecca Mader dorstellt weern. För disse Staffel is ok Harold Perrineau Jr. (Michael) för een Staffel torüchkamen. Bito keem Kevin Durand dorto, de den legen Söldner Keamy spelen de. In de föfften Staffeln weern keen ne’e Dorstellers dortohalt, man de Nevenrullen vun Zuleikha Robinson (Ilana), Nestor Carbonell (Richard) un Jeff Fahey (Lapidus) weern utboet un rücken mehr in’n Middelpunkt., so dat se in de letzten Staffel ok to den Hööftcast rekent warrt. In de sössten Staffel weern vele vun de vörher utscheedten Figuren wedder torüch, vunwegen dat se in de Parallelgeschicht oder wegen de Tietsprüng wedder in de Geschicht Bidrääg harrn.

De Protagonisten

ännern
 
Matthew Fox, Dorsteller vun Jack Shephard
Dr. Jack Shephard

Jack is en exzellenten Chirurg, de sik op Operatschonen an’t Rüchmark spezialiseert hett. Sien Vadder is de Baas vun de Chirurgie in’t glieke Krankenhuus. De beiden kemen al jümmer nich recht mit’nanner kloor, vunwegen dat sien Vadder em gegenöver nie recht Acht wiesen de. Jack hett dorünner teemlich leden. As sien Vadder Christian een Dag besopen opereert un dorbi den Doot vun en Patientin verschullt hett, hett Jack gegen em utseggt. Sien Vadder hett dorophen sien Approbatschoon verloren, is na Sidney reist un hett sik dor dootsopen. Jack weer an Boord vun Oceanic 815 as he den Sarg mit sien Vadder in de USA överföhren wull. He weer mit Sarah verheiraat, de he inst opereert hett un un vör den Rullstohl bewohren künn. De Eh hett aver nich hollen, vunwegen dat Jack wegen sien Beroop keen Tiet för sien Fro harr un ok Sarahs Lengen na en Kind nich tofreden stellt warrn künn. Jack hett de Trennung lang nich verwunnen.

Na’t Afstörten op dat Eiland övernimmt he vun Anfang an de Rull vun den Anföhrer un rett mehrmols dat Leven vun annerre Passageren. Jümmer is he dorop bedacht dat Beste för de Grupp to doon, ok wenn he dorbi gegen den Willen vun annere angahn mutt. Faken gifft dat deswegen Striet. Liekers warrt he vun all annern respekteert. In’n Verloop vun de Reeg leggt he sien Bedenken af, annere Minschen weh to doon oder sogors an de Siet to maken. Liekers wohrt he sien Moral, ok wenn se em faken in’n Weg steiht. Wiel de eersten dree Staffeln verkiekt he sik in Kate, man jemehr Relatschoon warrt jümmer wedder torüchsmeten: eerst, vunwegen dat se en Kriminelle is, later vun de Geföhlen, de Kate gegenöver Sawyer hett.

 
Evangeline Lilly, de Dorstellersche vun Kate Austen
Katherine „Kate“ Austen

Kate is en junge Fro, de wegen Moord an ehrn Vadder söcht warrt, den se dormols, as se em ümbröcht hett för en Steefvadder hollen hett. He harr johrenlang ehr Mudder slahn un keem een Nacht wedder besopen na Huus, wat Kate dorto bröcht hett, dat Huus dör en Gasexplosion in de Luft to sprengen. Vörher harr se en Levensversekerung op den Naam vun ehr Mudder afslaten. As se ehr Mudder dorvun vertellt hett, is de unvermodens aver nich op ehr Siet wesen, man hett ehr anzeigt, so dat sik Kate op de Flucht begeven müss. Later werr se an en Banköverfall bedeeligt, blots üm an en Andenken vun fröher to kamen, Bito hett se en Autounfall veroorsaakt, bi den ehr Leef ut de Jöögdtiet ümkamen is. Ehr Mudder is an Krebs krank worrn.

Se weer an Boord vun Oceanis 815, vunwegen dat se jüst in Australien faatkregen weer un in de USA bröcht warrn schüll. Sünners in de eersten Staffel hett se mit Schuldkumplexen to kriegen. Blangen Jack is se en wietere Person op’t Eiland, de seggt wo dat langs geiht. Se föhlt mit un hülpt annere, kann aver bi Gefohr unvermodens hard wesen. Se kann goot Sporen lesen un weet mit Wapen ümtogahn. Twüschen ehr, Jack un Sawyer entwickelt sik en kumplizeert Dreeecksverhältnis. Beide Mannslüüd föhlt sik to ehr hentogen, wiel se twüschen den heldenhaften Jack un den slussohrig-strolchigen Sawyer hen un her reten is.

 
Josh Holloway speel de Figur Sawyer
James „Sawyer“ Ford

James weer acht Johr oolt, as en Bedreger, de sik to de Tiet Tom Sawyer nöömt hett, an sien Mudder ranmaakt un dorna sien Öllern üm jemehr Vermögen bedrogen hett. James sien Vadder hett dorophen eerst sien Fro un denn sik sülvst dootschaten. He sülvst hett blots överleevt, vunwegen dat sien Mudder em seggt hett, dat he sik ünner’t Bett verkröpen schall. Dor is he nienicht över weg kamen. He schreev dormols en Breef an „Mr. Sawyer“, in den he vertellt, wat de sien Familie andoon hett. He hett sik fast vörnahmen, den Bedreger to finnen un denn ünner de Eer to bringen. Ut Geldnoot hett he later aver jüst de glieken Saken aftogen un sogor den Naam Sawyer dorför bruukt. So is he dorto worrn, wat he hassen deit. James hett en Dochter, de Clementine heet, de he aver nich kennenlehrt. En poor Johren seet he in’t Gefängnis, hett sik aver freeköfft, vunwgen dat he wichtige Informatschonen vun en annern Veroordeelten rutfunnen un an de Justiz wietergeven hett. En Affinnen, de he dorför kregen hett hett he aver nich behollen, man op en anonym Konto för sien Dochter afleggt.

In Australien hett he en Mann opsöcht, vun den he glööv, dat dat de Bedreger vun dormals is. He bringt em üm, mutt aver faststellen, dat sien Informand logen hett un de Mann blots een weer, de sik bi de verkehrten Lüüd Geld leht hett. Kort later is he ut Australien utwiest worrn. Dorüm weer he in den Fleger Oceanic 815. Op dat Eiland gifft he sik arrogant un unfründlich un rafft gau allns an sik, wat he in’t Wrack finnen kann. He provozeert geern, wat opletzt de Ansicht opkamen lett, dat Sayer dat dorop anleggt, dat em keeneen lieden kann. Liekers is he in de Noot to Steed un hülpt ut, sünners Kate gegenöver hett he ok sien fründlichen Ogenblicken. He weet mit Wapen ümtogahn. Wiel he eerst mit Kate anbannelt, leevt he later na de Tietreis dree Johren glücklich mit Juliet tosamen un entwickelt dorbi so veel Charakter, dat he in de DHARMA-Initiative Sekerheitsbaas warrt.

 
Terry O’Quinn stellt John Locke dor
John Locke

John hett en swore Kindheit achter sik un is faken demödigt worrn. Sien Mudder weer söventeihn, as se mit em swanger worrn is un geev dat Kind na de Geboort för de Adopschoon free. In de Reeg warrt he meist blots mit sien Nanaam ansnackt. He is in verschedene Pleegfamilien opwossen. Vele Johren later stell se Kuntakt twüschen em un sien Vadder, Anthony Cooper, her, de swoor krank weer. Gau hett sik John mit em anfrünnt un hett em denn ok en Neer spennt. Foorts na de Operatschoon hett sien Vadder denn aver fallen laten – em güng dat blots üm dat Spennerorgan, wat John in en deepe Krise stört hett. Dat hett em so krank maakt, dat de Fro, de em geern harr, em opletzt verlaten hett. As John een Dag rutfinnt, dat sien Vadder en Fro heiraten will, üm an ehr Vermögen rantokamen, söcht he em op un drauht em to verraden. Sien Vadder grippt em dorophen an un smitt em ut en Hoochhuusfinster, so dat John mehrere Stockwarken rünner fallt. John överleevt, blifft dorna aver lahm. Sien Vadder neiht ut un warrt ok nich tofaten kregen.

Vör Flaag 815 weer John in Australien, üm dor an en langen Walkabout deeltonehmen, de de Droompadden vun de Aborigines folgen schall. As de Tourleider kort vör Affohrt wies warrt, dat Lock in’n Rullstohl sitt, schickt he em wedder na Huus, vunwegen dat de Tour so nich mööglich is. Op dat Eiland kann Locke op eenmol wedder lopen, so dat he vun Anfang an sien Schicksal in dat Eiland sütt un he ok as eenzige nich wedder weg will. Mit dissen Gloven vun vörbestimmte Tokumst eckt he faken bi de annern un sünners bi Jack an. In sien Övertügen vun de egen Tokumst is Locke meist fanaatsch. So is he beseten dorvun, de iesern Luuk in’n Dschungel apen to maken, un sett sik mehrmols doröver weg, wat de Mehrheit seggt. He is en exzellenten Sporenleser un kann goot mit Messers ümgahn un smieten.

 
Jorge Garcia weer as eerst Dorstellers ünner Verdrag nahmen
Hugo „Hurley“ Reyes

Hurley fallt toeerst vör allen dör sien Statur op, vunwegen dat he bannig dick is. Dat warrt ok as Thema jümmer wedder in de Reeg opgrepen. Ünenr sien Gewicht lieden deit he sünners, siet he inst op en Dackterrasse gahn is, de dorophen wegbroken is. He harr doran keen Schuld, vunwegen dat de Terrasse – utleggt för acht Lüüd – mit veeruntwintig Personen bannig överfüllt weer, liekers hett he sik sülvst dorför verantwoortlich maakt, is katatoonsch worrn un opletzt in psychiatrische Therapie kamen. In den Anstalt Santa Rosa hett he en Patienten drapen, de jümmer wedder to Tallen „4, 8, 15, 16, 23 un 42“ vör sik hen brabbeln de. Later, as he ut de Psychiatrie rut weer, hett he de Tallen bi’t Lotto tippt un dormit 150 Millionen US-Dollar wunnen. Man, vun doran güng dat dormit los, wat Hurley en „Flöök“ nöömt: In sien Ümfeld keem dat jümmer wedder to Unglücken un lege Begeevnissen. So is sien Grootvadder unvermodens an een Hartinfarkt dootbleven, en Metoerit in sien Arbeitssteed inslahn, sien jüst nee köfft Huus afbrennt un opletzt de Fleger afstört, wat em op dat Eiland bröcht hett.

In Australien weer Hurley, üm een Mann to besöken, de vörgeevlich wat över de Tallen weten schüll. De harr sik al vör Johren in’t Outback torüchtogen, man över sien Weetfro hett he rutfunnen, dat de Mann ok övertüügt weer, dat op de Tallen en Flöök weer. Üm de Minschen dorför to bewohren, hett he sik sülvst ümbröcht. Hurley wiest keen sünnere Gaven un Anlagen ut, man dör sien minschliche oort un Wies sorgt he jümmer wedder vör ’n beten Freid ünner de Överlevenen. So richt he to’n Bispeel en Golfplatz in, üm mang de Gefohren un de fehlen Wissheit, wat mit jem warrt, ’n beten Aflenken un Spaaß torüch to bringen. Charlie Pace warrt sien besten Fründ, bito verkiekt he sik in Libby un steiht kort vör en eerst Drapen mit ehr alleen, as se vun Michael dootschaten warrt. Wiel de Reeg maakt Hurleys Charakter en bedüden Entwicklung dör. To Anfang is he unseker un föhlt sik minner weert as de annern, man mit de Tiet warrt he sülvstbewusster, driester un sorgt sik mehr un mehr üm de Lüüd, de em all möögt. Mehrmols rett he Frünnen dat Leven un speelt an’t Enn vun de Reeg en Slötelrull.

 
Henry Ian Cusick speel Desmond Hume
Desmond Hume

Desmond sien Vörleven weer dordör kenntekent, datt he nie recht sien Platz funnen. He weer Soldat un Mönk, wat beids nich goot utgahn is. De eenzige kunstante Betog in sien Leven is sien grote Leef Penelope, de Dochter vun den bannig rieken Charles Widmore, de aver wat gegen en Verbinnen twüschen de beiden hett. Desmond hett en Tiet lang in en Militärgefängnis seten, wodör se sik frömd worrn sünd – nich toletzt ok wegen Intrigen, de Charles Widmore spunnen hett. Üm se torüch to winnen un ok ehrn Vadder to beindrucken hett he sik vörnahmen an en vun Charles organiseerte Regatte rund üm de Welt deeltonehmen, bi de he aver op dat Eiland strannt is. He is dor vun en Mann funnen worrn, de in de DHARMA-Statschoon Swaan leevt hett un johrenlang de Tallenreeg in’n Reekner intippt hett, mit de Hurley bi’t Lotto wunnen hett. Dat müss he doon, um de Welt to redden. Desmond finnt rut, dat de Mann heemlich sien Seilboot repareert, üm dat Eiland to verlaten, worophen he em in’n Affekt dootmaakt. He is aver bang, de wohrhaftig de Welt ünnergeiht, wenn de Tallennich mehr intippt warrt un maakt dormit nu alleen wieter.

Desmond hett na Johren dat eerste mol wedder Kuntaklt to annere Minschen, as Locke de Luuk apen sprengt, de in de Statschoon föhrt. He wiest Locke de Opgaav in un neiht eerstmol mit sien Seilboot ut, mit dat he haapt in de Zivilisatschoon torüch to kamen. Man dat kann he nich un lannt na een poor Weken wedder op dat Eiland, vunwegen dat sien Boot jümmer wedder torüchdreven warrt. He slutt sik de Grupp vun de Överlevenen an un finnt in Charlie un Hurley go’e Frünnen. He is en freedvullen Minsch mit en Hang to Philosophie un Melancholie. Siet sien Tiet as Mönk snackt he jeedeen mit „Broder“ an. Sien gröttst Lengen is, sien Fründin Penny weddertofinnen.

 
Dominic Monaghan stellt den Rockstar Charlie Pace dor
Charlie Pace

Charlie is en Briten ut Manchester, de in de engelschen Rockgrupp Drive Shaft den Bass speelt. De Band harr mit You All Everybody een bekannten Hit, den Charlie sülvst schreven hett, is denn aver wegen Drogenmissbruuk ut’nanner broken. An sik weer he de eenzige in de Grupp, de wohrhaftig mit Liev un Seel vun Musik andoon weer, man de Rohm bleev meist alleen bi sien ölleren Broder Liam as Singer vun de Grupp. Dat he jümmerto in’n Schadden vun sien groten Broder stünn, weer opletzt de Grund, dat ok he anfüng Drogen to nehmen un vun Heroin afhangig worrn is. Na eenige Johren is he na Australien flagen, woneem sien Broder intwüschen en Familie grünnt hett un en börgerlich Leven inslahn hett. Charlie wull em besnacken, dat he wedder in de Musik instiegen schüll, wat Liam aver aflehnt. Op’n Torüchweg is Oceanic 815 denn afstört.

Charlie liedt ünner dat Geföhl as Star nich acht to warrn un söcht ok op dat Eiland na Bewunnern un Opmarksomkeit. Mit unkonventschonelle Hülp vun Locke kummt he vun sien Sucht rünner un fangt al fröh wat mit de hoochswangeren Claire Littleton an. Later oppert he sien egen Leven för de Grupp, vör allen aver in’t Hapen, dat he dormit Claire un ehrn Söhn vun dat Eiland redden kann.

 
Naveen Andrews stellt den Iraker Sayid Jarrah dor
Sayid Jarrah

Sayid is en fröheren Soldat un Narichtenoffizier vun de Republiekaansche Garde in’n Irak, de in de Tiet vun’n Tweeten Golfkrieg vele Minschen foltert hett. Een vun sien Oppers weer Nadia, de in sien Kindheit sien Fründin weer. In Nadia hett he sik verkeken un hülp ehr uttoneihn. Later is he ut’n Irak weggahn un hett hapt, dat he Nadia wedderfinnen deit. In Australien arbeit he mit de Behöörden tosamen, üm an Informatschonen to kamen, woneem se sik ophollt. He kreeg den Opdrag sik in en Terrorzell intoslüsen, üm so en Anslag in Sidney aftowennen un den Opdraggever an de Behöörden uttolevern. In’n Gegentog warrt he denn wies, dat Nadia intwüschen in Los Angeles leevt, un kreeg dat Ticket för Oceanic 815, üm dorhen to kamen.

Op dat Eiland warrt he wegen Vöroordelen eerst as’n Butensieter behannelt. Liekers wiest he faken groten Moot un hülpt ok faken, vunwegen dat he de Grupp aktiv ünnerstütt, to överleben un Lüüd to redden, wenn’t nödig is. Sien militäärsche Utbilln un dat Weten üm den Ümgang mit elektroonsche Redschoppen is em dorbi vun Vördeel, ofschoonst sien Vörleven an’n leevsten achter sik laten harr.

 
Kim Yoon-Jin speel Sun
 
Daniel Dae Kim weer Jin
Sun un Jin Kwon

Sun stammt ut en rieke koreaansche Familie mit groten Influss. Ehr Vadder herrsch geern över annere Lüüd in is ok gau in’e Brass. Ok dat Leven vun sien Dochter hett he jümmer to bestimmen wüsst. Üm Verlööf to kriegen Sun to heiraten, mutt Jin, de de Söhn vun en eenfacken Fischer is, en Arbeit in de Firma vun Sun ehern Vadder annehmen. Dorbi mutt he faken ok de Drecksarbeit maken, also Lüüd, de sik mit sien Swiegervadder nich vergahn künnt to drauhn un mitünner sogor an de Siet to maken. Dorför hett he den helen Dag praat to stahn, wat sien Eh mit Sun belasten deit. As beid ahn Spood versöökt, en Kind to kriegen, stellt sik rut, dat Jin keen Kinner tügen kann, wat dat Tosamenleven noch sworer maakt. Sun fangt dorophen wat mit en rieken Hotelarf an, de ehr in de Tiet ok Engelsch bibringt, vunwegen dat Sun heemlich plaant, vör ehrn Vadder un vör Jin in de USA uttoneihn. Man, ehr Vadder kriggt dat spitz, dat se en Affär hett un föhlt sik in sien Ehr bedrogen. Dorüm sett he Jin, de vun nix weet, op den Mann an, den he gresig tosamenhaun deit. Kort later nimmt de sik dat Leven.

Sun flüggt mit ehrn Mann op en gewarfliche Reis na Australoien, vun wo ut se mit Oceanic 815 na Los Angeles ünnerwegens sünd. Op dat Eiland sünnert se sik toeerst vun de anneren Verunglückten af, wobi Jin vör allen dör sien aggressiv Verhollen Sun gegenöver opfallt. As rutkummt dat se Engelsch snacken kann, sünd se sik nich mehr gröön, man mit de Tiet leggt se jümmern Striet bi un fangt noch mol nee an. Sun lehrt ehrn Ehmann de engelsche Spraak un so föögt se sik denn ok goot in de Gemeenschop in. Op dat Eiland warrt Sun unvermodens swanger vun Jin.

Hööftrullen

ännern
Rullennaam Schauspeler(sche) Episoden Synchroonstimm
Dr. Jack Shephard Matthew Fox 1.01-6.18 Peter Flechtner
Katherine „Kate“ Austen Evangeline Lilly 1.01-6.18 Ranja Bonalana
James „Sawyer“ Ford
(ok: Jim LaFleur) 		Josh Holloway 1.01-6.18 Johannes Berenz
John Locke
(ok: Jeremy Bentham) 		Terry O’Quinn 1.01–6.18 Lothar Hinze
Ernst Meincke
Sayid Jarrah Naveen Andrews 1.01–6.18 Tayfun Bademsoy
Hugo „Hurley“ Reyes Jorge Garcia 1.01–6.18 Gerrit Schmidt-Foß
Jin-Soo Kwon Daniel Dae Kim 1.01–6.18 See-Young Cho
Sun-Hwa Kwon Kim Yoon-Jin 1.01–6.18 Kang Moon-suk
Mey Lan Chao
Claire Littleton Emilie de Ravin 1.01–4.14, 5.04, 6.02-6.18 Ilona Brokowski
Charlie Hieronymus Pace Dominic Monaghan 1.01–3.23, 4.01, 6.01,
6.11, 6.17–6.18		 Tommy Morgenstern
Michael Dawson
(ok: Kevin Johnson) 		Harold Perrineau Jr. 1.01–2.24,
4.07–4.14, 6.12		 Charles Rettinghaus
Shannon Rutherford Maggie Grace 1.01–2.08, 3.14, 6.17–6.18 Magdalena Turba
Boone Carlyle Ian Somerhalder 1.01–1.25, 2.06, 3.03,
3.14, 6.01, 6.17–6.18		 Ozan Ünal
Walter „Walt“ Lloyd Malcolm David Kelley 1.01–1.25, 2.01–2.02, 2.06,
2.22, 2.24, 3.22, 4.08, 4.13, 5.07		 Aljoscha Fritzsche
Mr. Eko Adewale Akinnuoye-Agbaje 2.02–3.05 Michael Ojake
Ana Lucia Cortez Michelle Rodríguez 1.23, 2.03–2.21, 5.02, 6.16 Ghadah Al-Akel
Elizabeth „Libby“ Smith Cynthia Watros 2.03–2.23, 4.08, 6.12, 6.18 Maud Ackermann
Benjamin „Ben“ Linus
(ok: Henry Gale) 		Michael Emerson 2.14–2.24, 3.01–6.18 Udo Schenk
Desmond David Hume Henry Ian Cusick 2.01–2.03, 2.23–2.24, 3.03–6.18 Markus Pfeiffer
Dr. Juliet Burke Elizabeth Mitchell 3.01–5.17, 6.01–6.02, 6.17–6.18 Andrea Aust
Nikki Fernandez Kiele Sanchez 3.03–3.14 Maria Koschny
Paulo Rodrigo Santoro 3.03–3.14 Michael Deffert
Miles Straume Ken Leung 4.02–6.18 Alexander Doering
Dr. Daniel Faraday Jeremy Davies 4.01–5.15, 6.11, 6.17 Matthias Deutelmoser
Dr. Charlotte Staples Lewis Rebecca Mader 4.02–5.05, 6.08, 6.17 Katja Primel
Frank Lapidus Jeff Fahey 4.02–5.17, 6.01–6.18 Oliver Stritzel
Richard Alpert Nestor Carbonell 3.07–5.17, 6.01–6.18 Oliver Feld
Ilana Verdansky Zuleikha Robinson 5.06–5.17, 6.01–6.13 Eva Michaelis

Neven- un Gastrullen

ännern
Rullennaam Schauspeler(sche) Episoden Synchroonstimm
Rose Henderson L. Scott Caldwell 1.01–6.18 Astrid Bless
Regina Lemnitz
Cindy Chandler Kimberley Joseph 1.01–3.19, 6.02–6.13 Antje von der Ahe
Marshal Edward Mars Fredric Lehne 1.01–3.15, 6.01–6.03 Erich Räuker
Dr. Christian Shephard John Terry 1.05–6.18 Reinhard Kuhnert
Noor „Nadia“ Abed Jazeem Andrea Gabriel 1.09–6.13 Pervaneh Parviz-Hamidi
Ilknur Bahadir-Schrag
Danielle Rousseau Mira Furlan 1.09–4.10, 6.16 Ulrike Johannson
Dr. Ethan Rom William Mapother 1.09–3.16, 5.01–5.12 Olaf Reichmann
Carmen Reyes Lillian Hurst 1.18–6.12 Alexandra Lange-Baehr
Anthony Cooper Kevin Tighe 1.19–3.19, 6.14 Otto Mellies
Aaron Littleton William Blanchette 1.20–6.18  
Sarah Shephard Julie Bowen 1.20–3.22 Christin Marquitan
Diane Janssen Beth Broderick 1.22–4.04 Andreschka Großmann
Tom M. C. Gainey 1.25–4.08 Michael Telloke
Axel Lutter
Dr. Pierre Chang François Chau 2.03–6.18 Uwe Büschken
Dr. Bernard Nadler Sam Anderson 2.04–6.18 Peter Hladik
Goodwin Brett Cullen 2.07–4.06 Klaus-Dieter Klebsch
Cassidy Philips Kim Dickens 2.13–3.15, 5.11 Katrin Zimmermann
Alexandra „Alex“ Rousseau Tania Raymonde 2.15–6.16 Berenice Weichert
Beatrice „Bea“ Klugh April Grace 2.22–3.11 Claudia Urbschat-Mingues
Danny Pickett Michael Bowen 2.22–3.07 Joachim Siebenschuh
Gerald Paradies
Penelope „Penny“ Hume Sonya Walger 2.23–6.18 Melanie Hinze
Charles Widmore Alan Dale 2.23–6.16 Klaus Nietz
Karl Martin Blake Bashoff 3.01–4.10 Wanja Gerick
David Reyes Cheech Marin 3.10–5.02 Andreas Mannkopff
Carole Littleton Susan Duerden 3.12–5.11 Ulrike Möckel
Naomi Dorrit Marsha Thomason 3.17–5.13 Vera Teltz
Horace Goodspeed Doug Hutchison 3.20–5.16 Axel Malzacher
Eloise Hawking Fionnula Flanagan 3.08, 5.02–6.18 Inken Sommer
Martin Christopher Keamy Kevin Durand 4.05–4.14, 6.06, 6.10 Dennis Schmidt-Foß
Bram Brad William Henke 5.09–6.01 Marco Kröger
De swarte Mann Titus Welliver 5.16–6.18 Oliver Siebeck
Jacob Mark Pellegrino 5.16–6.16 Jens-Uwe Bogadtke
Dogen Hiroyuki Sanada 6.02–6.06  
Lennon John Hawkes 6.02–6.06 Robert Missler
David Shephard Dylan Minette 6.05–6.17 Joel Armbruster

Enkelte Aspekten

ännern

‚De Annern‘

ännern

Al in’n Verloop vun de eersten Staffel warrt dorvun vertellt, dat dat en Grupp vun Personen gifft, de as de ‚Annern‘ betekent warrt. Een vun jem, Ethan Rom, slickt sik in de Grupp vun de Överlenen an’n Strand in un roovt denn ok noch de swangere Claire. As sik later eerst rutstellen deit güng dat dorbi dorüm, ehr Överleven un dat vun’t Kind to sekern. An’t Enn vun de eersten Staffel warrt dat Flott, mit dat en poor Lüüd vun dat Eiland wegkamen wüllt vun en Motorboot vun de ‚Annern‘ affungen. Walt warrt roovt un dat Flott in de Luft sprengt. In de tweeten Staffel kamt de ‚Annern‘ toeerst as Grupp vun Wille vör, de in Lumpen kleedt sünd. Later stellt sik rut, dat dat blots en Verkleeden weer. En vun jem, de sik eerst as de över’t Eiland afstörte Henry Gale utgifft, warrt in de tweeten Staffel vun Rousseau fangen nahmen, kummt aver dör Hülp vun Michael wedder free. Dorna eerst stellt sik rut, dat he in Wohrheit Benjamin Linus heet un dat Seggen bi de ‚Annern‘ hett. De Grupp vun de ‚Annern‘ rückt in de drüdden Staffel wieter in’n Middelpunkt, wobi sik denn rutstellt, dat de meisten vun jem nich op’t Eiland boren weern, man vun de Butenwelt rekruteert worrn is.

Se seht sik sülvst as de Go’en an un verstaht nich, worüm de Överlevenen so aggressiv jem gegenöver sünd, de natürlich mit Gewalt reageert hebbt, nadem de eersten Personen roovt worrn sünd. Se hebbt en düütlich högeren Levensstandard as de Överlevenen. Se leevt in de ollen Hüüs vun de DHARMA-Initiative un föhrt dor en normal Leven. Jemehr Motivatschoon warrt nie vullstännig oplööst.

De DHARMA-Initiative

ännern
 
Levensmiddel vun de fiktiven DHARMA-Initiative

De DHARMA-Initiative warrt mit de tweeten Staffel inföhrt. Se is aver al lang nich mehr op dat Eiland togang. In’n Orienterungsfilm vun de Swaan-Statschoon warrt vertellt, dat de Initiative 1970 grünnt weer un to de Tiet ok op dat Eiland keem. Mit Hülp vun de eersten Statschoon Lampenpahl weer dat mööglich, dat Eiland an en sünnern Punkt op’n Planet to finnen. As se dor ankamen weer, sünd verschedene Inrichten boet worrn, as dat Dörp un tallrieke Forschungsstatschonen, de in’n Verloop vun de Reeg vun de Protagonisten opdeckt warrt oder in Torüchblennen wiest warrt. En poor vun de ollen Statschonen warrt tietwies ok vun de Överlevenen nütt, wiel de ‚Annern‘ in de Baracken in’t Dörp wahnt. De Mitarbeiters vun de DHARMA-Initative sünd 1992 bi en Angreep vun de ‚Annern‘ mit Giftgas ümbröcht worrn. As en poor vun de Överlevenen dör de Tiet na 1974 torüchreisen doot kamt se in de DHARMA-Initiative ünner un warrt Liddmaten.

Bedüden vun Naams

ännern

De Produzenten seggen, dat all Naams in de Feernsehreeg en Bedüden harrn[6]. Eenige Verbinnen weern teemlich licht to kennen, as to’n Bispeel Jack sien Nanaam Shephard, wat över sett so veel as „Harder“ heet. Dat is denn ok de Rull, de he in de Grupp spelen deit. De Naam vun Claire ehr Söhn Aaron kummt vun den biblischen Broder vun Moses, wat in de Reeg ok direkt ansnackt warrt.

Mehrere Hööft- un Nevenfiguren weern na beropene Philosophen, Schrievers oder Wetenschopplers nöömt, so as John Locke, Jeremy Bentham, Richard Alpert, Mikhail Bakunin, Edmund Burke un Anthony Ashley-Cooper. Ok Desmond sien vullstännigen Naam Desmond David Hume betüüt sik op den Philosooph David Hume un de Naam Sayid Jarrah op Edward Said. Danielle hett den glieken Nanaam as Jean-Jacques Rousseau, Charlotte Staples Lewis den glieken as Clive Staples Lewis, wiel Dnaiel Faraday vun den Physiker Michael Faraday afleidt is.

Butendem kamt Naams vun Romanfiguren vör, so as de vörgeevliche Naam Henry Gale, den Ben Linus bruken deit un de ut dat Book The Wonderful Wizard of Oz kummt. De Naam Goodwin betütt sik op den Töverer ut de russ’schen Neebearbeiten vun den glieken Stoff, Wolschebnik Isumrudnogo goroda. De Naam Benjamin hett doirgegen wedder en Betog to de Bibel, wat de Söhn is vun Jakob. So is in de Reeg ok Benjamin Linus den geheemnisvullen Jacob ünnerstellt. De Figur vun den Dokter Jack speelt an op William Golding sien Roman Lord of the Flies, in de de Anföhrer vun de strannten Kinner denglieken Naam hett. Desmond sien Bruut Penelope driggt den Naam vun Odysseus sien Fro, de twintig Johren lang dorop töövt hett, dat he torüch kummt.

En intressanten Betog gifft dat twüschen Benjamin Linus un en Romanfigur vun Sir Arthur Conan Doyle. In de veerten Staffel checkt Linus ünner den Naam Dean Moriarty in en tunesisch Hotel in. In de Romanen vun Doyle gifft dat de Figur vun den Professer James Moriarty as de geniale Gegenspeler to Sherlock Holmes, wobi de Theorie ümgeiht, dat Holmes un Moriarty een un de glieke Person sünd. Bito gifft dat in den Roman On The Road vun den US-amerikaanschen Schriever Jack Kerouac en Figur mit den Naam Dean Moriarty.

En veel bruukt Thema bi de Naams sünd Anagrammen. So hannelt sik dat bi Ethan Rom üm en Anagramm vun other man, vunwegen dat Ethan een vun de ‚Annern‘ weer. Den Naam vun de Firma Mittelos kann ok to Lost Time formt warrn, wiel sik de Naam vun de Flaagsellschop Herarat Aviation op Amelia Earhart betütt, de ok in’t ARG Find 815 en Rull speelt. De Naam vun dat Bestattungsünnernehmen Hoffs/Drawlar ut dat Finale vun de drüdden Staffel is en Anagramm vun Flash forward, un twee vun de Identitäten vun Locke sien Vadder, Anthony Cooper un Adam Seward, geevt tosamennahmen en Anagramm för Sawyer, the con man, a poor dad, en fröhen Henwies dorop, dat Cooper de Sawyer is, vun den James Ford den Naam övernahmen hett. De Naam vun Harper Stanhope, en Nevenfigur ut de veerten Staffel, kann ok as Perhaps an Other leest warrn.

Bedüden vun Tallen

ännern

De Tallenreeg 4, 8, 15, 16, 23 un 42 speelt in de Reeg jümmer wedder en Rull. Toeerst duukt se enkelt oder in lüttere Kombinatschonen op (to’n Bispeel in Flaag 815, mit Afflaag op Gate 23), wobi en sünnere Bedüden noch nich to kennen is. Eerst in de Episood Numbers ut de eersten Staffeln warrt de hele Reeg in’n Middelpunkt stellt: Toeerst hannelt sik dat üm de Tallen, mit de Hurley bi’t Lotto winnen deit, denn is dat de Reeg ut en Funknaricht, op de hen Rouseau un ehr Team op dat Eiland kamen sünd. An’t Enn vun de Episood stellt sik denn rut, dat de Tallen ok an’n Rand vun de Luuk inslahn sünd, de Boone un Locke in’n Dschungel funnen hebbt. In de nächsten Staffel heet dat denn, dat de sülve Tallenreeg all 108 Minuuten (de Summ vun all Tallen) in den Reekner vun de Statschoon ingeven warrn mööt, üm en elektromagneetsch Feld to entladen.

Ok later duukt de Tallen jümmer wedder as sünner’t Element op, so as Psalm 23, oder de Pakettall 4815, wat för de Tokiekers en Ophanger is för Spekulatschonen un Theorien. In de sössten Staffel warrt verkloort, worüm enige vun de Protagonisten op dat Eiland halt worrn sünd: De verkehrte Locke vertellt, dat Jacob de Schuler vun dat Eiland is un bestimmt hett wokeen de sonöömten Kannedaten sünd. Sien Opteken dorto weern: 4 Locke, 8 Reyes, 15 Ford, 16 Jarrah, 23 Shephard und 42 Kwon. Op de Fraag, wat de Tallen to bedüden harrn, seggt de verkehrte Locke blots, dat Jacob Tallen geern harr. En Episood later warrt Jacke un Hurley na en bannig ollen Lüüchttoorn schickt. Binnen in finnt se en bewegelichen Spegel mit en Winkel-Skala, op de hunnerte vun Naams vun Kannedaten mit jemehr Tallen ingraveert sünd. Se schall op 108 Grad instellt warrn. As Jack den Spegel in de Positschoon dreiht, woneem sien egen Naam steiht, sütt he as swack Andüden dat Huus, in dat he opwossen is. Bi 23 Grad hett Jacob also Jack bekieken künnt, bi 4 Grad John Locke, un so wieter. So kummt rut, dat de Tallen de Richten sünd, woneem de Kannedaten leevt hebbt.

Apene Fragen

ännern

De Schrievers harrn ankünnigt, dat vele vun de Geheemnissen bit to’n Enn vun de Reeg oplööst warrn schüllt. Man, ok na de letzten Episood sünd noch sünd noch vele Fragen apen bleven. Se blifft dat en Radels, worüm op dat Eiland keen Kinner tüügt warrn künnt, de ok överleven doot, un de Fronslüüd doodblievt. In’n Epiloog warrt dorto verkloort, dat dat an de elektromagneetschen Feller liggt, dor de ok de swangeren Iesboren starven doot. Eerst na en sünner’t Stadium kann dat Kind leven – dorüm överleevt ok Claire un ehr Baby. Nich verkloort warrt in de Reeg ok, wokeen de Statue mit de acht Töhn boet hett. Anfang vun de sössten Staffel hett Spiegel Online teihn apene Fragen oplist un hett in’n Verloop vun de Staffel tosamenfaat, woveel un woans disse Fragen antert weern[7].

Produkschoon

ännern

Tostannenkamen

ännern
 
J. J. Abrams, een vun de Makers vun Lost

De Anfang vun de Feernsehreeg weer Januar 2004 sett, as Lloyd Braun, de dormolioge Baas vun de ABC bi Spelling Television en Skript in Opdrag geven hett, dat op de Kunzepten vun Lord of the Flies, Cast Away un de Reality-Show Survivor baseren schüll. De Schriever Jeffrey Lieber hett toeerst en Pilotepisood ünner den Titel Nowhere schreven[8] Braun weer aver nich övertüügt vun dat Skript un hett dorophen J. J. Abrams mit en nee Dreihbook beopdraagt. De hett toseggt, man ünner de Bedingen, dat he övernatürliche Elementen verwennen dröff[9]. Tosamen mit Damon Lindelof hett Abrams den Stil vun de Mysteryreeg utklamüstert as opk de Figuren un de Mythologie in de Reeg un de Plot points[10]. De Utwahl vun de Dorstellers un dat Entwickeln vun’t Dreihbook för den Pilotfilm lööp gliektietig, so künnen enkelte Rullenkunzepten op de Dorstellers tosneden warrn.

De Dreiharbeiten to de Pilotepisood weern an’n Mokulē'ia-Strand op Oʻahu, Hawaii maakt. Bit dorhen weer de Pilotfilm de düürste US-amerikaansche Feernsehprodukschoon vun ABC. De eersten beiden Folgen hebbt twüschen 10 un 14 Millionen US-Dollars köst. Dorvun weer alleen mehr as een Million US-Dollars dorför opwennt, de Wrackdeelen vun de Lockheed L-1011 TriStar op dat Eiland to bringen[11]. Wegen disse hogen Kosten hett de ABC-Hööftakschonär Disney Lloyd Braun, de för dat Rebeet Entertainment verantwoortlich weer, vör de Döör sett. He harr för de Reeg gröön Licht geven[9]. De eerste Episood weer op ABC an’n 22. September 2004 utstrahlt un harr en Tokiekertall vun 18,6 Millionen Lüüd.

Produkschoonsafloop

ännern

Lost weer in’t 35-mm-Filmformat mit Hülp vun Kameras vun Panavision gröttstendeels op Oʻahu dreiht. Na den Pilotfilm weern de Arbeiten an’n North Shore vun’t Eiland verlagert. De Szenen, de in de eersten Staffel in de Höhl speelt, sünd in en Ruum in en oolt Lagerhuus vun Xerox opnahmen worrn. En poor Binnenszenen weern bito in’t Hawaii-Filmstudio afdreiht. För Szenen, de nich op dat Eiland spelen doot, sünd verschedene Öörd in un üm Honolulu nütt worrn.

Vun Anfang an weer veel Weert dorop leggt, dat de Mysterien vun’t Eiland geheem blieven doot. Blots Lindelof, Cuse un Abrams weern in dat vullstännige Kunzept vun de Geschicht inweiht[12]. An’n 21. September 2005 güng dat Utstrahlen vun de tweeten Staffel los. Twüschen de tweeten un drüdden Staffel weer dat so nöömte Alternate Reality Game The Lost Experience maakt, an dat sik Fans aktiv bedeeligen künnen.

 
Blick över Oʻahu, den Dreihoort von Lost

Mit de drüdden Staffel güng dat an’n 4. Oktober 2006 los. De weer nu in twee Blöcken utstrahlt, üm to hinnern, dat de Tiet twüschen enkelte Episoden to groot warrt (mehr as een Week). Dat weer neemlich in de tweeten Staffel mehrmols vun de Fans kritiseert worrn. So weern de eersten söss Folgen an’t Stück sennt, de Rest keem na de Winterpoos in’t Fröhjohr 2007. In disse Staffel weer ok de Influss vun de Fans to marken. Twee vun de Nevenfiguren, de in disse Staffel nee inföhrt weern, sünd ut de Reeg wedder streken worrn un müssen in de Geschicht dootblieven, vunwegen dat de Fans jem nich lieden künnen[13][14]. In’n Juni 2007 weer ankünnigt, dat dat nioch dree wietere Staffeln vun Lost geven schüll, de blots noch sössteihn Episoden ümfaat un ahn grote Ünnerbreken utstrahlt warrt. Dormit geev de ABC de Produzenten jemehrn Wunsch na, en Fast Enn vun de Reeg to besluten, üm beter planen to künnen[13].

De Produkschoon vun de veerten Staffel güng in’n August 2008 los, weer aver in’n November wegen den Schrieverstreik vun de Writers Guild of America ünnerbroken. Liekers güng de Staffel an’n 31. Januar 2008 op Sennen. Ut Tietmangel dör den Streik sünd denn avber nich mehr all Episoden dreiht worrn, de vör de Staffel vörsehn weern[15]. In’n Januar 2008 is butendem mit Find815[16] noch en Alternate Reality maakt worrn, üm de Tiet bit to’n Start vun de veerten Staffel to verkörten.

De föffte Staffel güng an’n 21. Januar 2008 bi ABC op Sennen, de letzte Staffel lööp an’n 2. Februar 2010 an un weer an’n 23. Mai 2010 to Enn.

Musik

ännern

In de Reeg warrt vele Musikstücken to’n Ünnermolen vun de Begeevnissen insett, de Michael Giacchino komponeert hett. Annere Leder stammen vun Patsy Cline, Joe Purdy, Willie Nelson, Blind Boys Of Alabama, Damien Rice, Bob Marley, Mama Cass Elliot un Petula Clark. Wieter kummt in de Reeg de fiktive Grupp Driveshaft vör, to de Charlie – een vun de Hööftfiguren – höört. Een Leed vun jem kummt vun en Musiker ut Los Angeles, de Jude heet.

Kritik

ännern

In’t Johr 2005 heebt Kolumnisten vun fief US-amerikaansche Daagblööd un Tietschriften, dorünner de Boston Globe un USA Today, Lost as de beste Feernsehreeg vun’t Johr betekent. Ok in de Listen vun annere Publikatschonen weer de Reeg meist ahn Utnahm in de Top Ten to finnen[17].

Al teemlich fröh geev dat Kritik doran, dat de Reeg Antwoorten schullig blieven de op Fragen, de in’n Verloop opkamen sünd. De Schrievers un Produzenten kregen faken to höörn, dat se de Antwoorten sülvst noch nich kennen, man jem eerst laterhen mit Hülp vun snaaksche Entwickeln konstrueren deen. De Kolumnist Steven Simunic verwies in den Tosamenhang in’n März 2007 in dat US-amerikaanschen Blatt The Daily Californian op de Reeg The X-Files, de in latere Staffeln vergliekbore Lasten harr[18]. De tweete Staffel un de eersten Folgen vun de drüdden Staffel weern kritiseert, vunwegen dat de Geschicht blots langsom vörankamen un noch mehr ne’e Fragen bringen de, man wenig olle Radsels oplösen de. Goot ankamen is aver, dat al wiel de drüdden Staffel en fast Enn na de sössten Staffel ankünnigt weer. Al de to de Tiet sennten Episoden ut de drüdden Staffel weern as Teken sehn, dat de Produzenten un Schrievers mit en fast Enn vör Ogen beter planen un de Geschicht beter vöran bringen künnen[19].

Na’t Utstrahlen vun de letzten Episood (The End) keem Kritik op, dat jümmer noch apene Fragen bleven, nadem en mööglichst kumplexe Andüden un Anspelen maakt worrn weern. Butendem weer bi’t Enn to dull op religiöse Metaphorik sett worrn, üm de apenen Fragen nich wetenschopplich verkloren to möten[20]. Al in en Interview mit dat britische Blatt The Guardian harr Hööftdorsteller Matthew Fox Anfang 2010 vertellt, dat vele Fans mit dat Enn noich tofreden wesen warrt[21].

In Düütschland geev dat vör allen ok Kritik an de grote Tietduer twüschen de Eerstsennen in de USA un dat Utstrahlen in’t düütsche Free-TV. Dorin weer ok en Grund vermodt, dat de Inschaltquoten jümmer wieter rünner güngen, vunwegen dat sik vele Fans de Reeg lever illegal ut dat Internett besorgt harrn, as op’t düütsche Feernsehn to töven[22]. Mit de sössten Staffel weer dat anners, vun de de Episoden jümmer al 24 Stunnen na de US-Utstrahlen in de Originalfaten mit Ünnertitel legal in den Online-Shop iTunes vun Apple un in’n Deenst Videoload, de to T-Online höört, anboden worrn sünd. De Mööglichkeit, de topaktuellen US-Regen foorts köpen to künnen, weer bannig goot opnahmen.

De Lost-Blogger vun Spiegel Online fünnen dat Enn vun de Reeg an sik goot maakt, man se kritiseren de Oplösen vun de vun jem to Anfang vun de sössten Staffel tosamenstellten „10 wichtigsten Radsels ut de Reeg“ in de Mehrtall vun de Fäll, dat se dormit nich tofreden weern[23].

In de FAZ weer Lost as Bispeel för US-amerikaansch Göödfeernsehn beschreven. De Tokiekers weern dör eenfach „Berieseln-laten“ frustreert, an de Steed müss man oppassen, dat een de Geschicht folgen künn. De Tokiekers müssen en „lang Engagement“ un „denkstarke Kombinatorik“ mitbringen, wat to ümfangrieke Diskusschonen op Fan-Blogs, Wikis un Internett-Plattformen föhren de. De Reeg weer as een vun de opstunns gröttsten un ideenrieksten Vertellexperimenten vun’t 21. Johrhunnert betekent[24].

Utteken

ännern

De Feernsehreeg hett utermatig groten Spood hatt, wat sik in en grote Tall vun Priesen un Utteken wiest. Alltohopen is Lost mit söventig Priesen uttekent worrn! Dorto kamt meist dreehunnert Nomineren. Uttekent weer de Reeg ünner annern mit:

  • 2005: den Golden Satellite Award in de Kategorie Best Schauspeler in en Dramareeg för Matthew Fox
  • 2005: den Primetime Emmy in de Kategorie Rutragen Speelbaas in en Dramareeg för J.J. Abrams
  • 2005: den ASCAP Award in de Kategorie Top Feernsehreeg för J.J. Abrams un Michael Giacchino
  • 2006: den Screen Actors Guild Award in de Kategorie Rutragen Ensemble in en Dramareeg för dat Ensemble
  • 2006: den Golden Globe in de Kategorie Beste Feernsehreeg – Drama
  • 2007: den Primetime Emmy in de Kategorie Rutragen Nevendorsteller in den Dramareeg för Terry O’Quinn
  • 2009: den AFI Award in de Kategorie Best Feernsehprogramm vun’t Johr
  • 2009: den Primetime Emmy in de Kategorie Rutragen Nevendorsteller in en Dramareeg för Michael Emerson
  • 2010: den Primetime Emmy in de Kategorie Rutragen Filmsnitt för en enkelte Kamera för en Dramareeg för Stephen Semel, Mark Goldman, Christopher Nelson un Henk Van Eeghen
  • 2010: den Saturn-Pries in de Kategorie Beste Reeg in en Feernseh-Nettwark

Influss un Wohrnehmen

ännern

De grote Spood vun de Feernsehreeg Lost hett dorför sorgt, dat de Reeg oder enkelte Elementen dorvun in de Medien referenzeert waart. Dorto tellt Feernsehregen, Warfspots, Comics, Tietschriften un so wieter. So warrt to’n Bispeel in den Film Mission: Impossible III, an den J. J. Abrams bedeeligt weer, in’n Afspann en sünnern Dank an de Hanso Foundation, wat en fiktive Stiftung ut de Feernsehreeg weer. Ok an Cloverfield weer Abrams bedeeligt. Dor is dat Logo vun de DHARMA-Initiative to sehn[25].

Jorge Garcia, de Dorsteller vun Hurley, harr en Gastrull in de Episood Blitzgiving vun de Reeg How I Met Your Mother, bi de op sien Rull in Lost anspeelt warrt. Ok hier hett he mit en Flöök to doon. Bito snackt he de snaakschen Tallenreeg 4, 8, 15, 16, 23, 42 an un jökelt över en Eiland. De Lost-Episood Numbers hett butendem in de USA to en högere Deelnehmertall bi’t Lotto föhrt. Wohrhaftig sünd de Tallen, mit de Hurley sien groten Gewinn harr, laterhen fakener bi Lotto-Tipps angeven worrn.[26][27]

In de düütschen Medien hett de Feernsehreeg buten vun sünnere Genrepublikatschonen blots wenig Resonanz funnen. Alleen Spiegel Online hett de sösste Staffel verfolgt, de eerstmols ok för düütsche Internett-Brukers gau na’t Eerstutstrahlen över legale Borns anboden worrn is. Dorto geeev dat en aktualiseerte Analyys vun de Episoden in Form vun en Blog[28].

Borns

ännern
  1. ↑ TV hits maximum occupancy, Bill Keveney op USA Today, 8. August 2005; afropen an’n 6. Oktober 2011
  2. ↑ Informatschoon vun de DVD to de eersten Staffel vun LOST
  3. ↑ Two 'Lost' stars charged with drunken driving, Associated Press an’n 2. Dezember 2005; afropen an’n 21. Juli 2006
  4. ↑ War of the Worlds afropen an’n 19. Juli 2007
  5. ↑ TV.com – „Lost actor arrested“ vun’n 5. September 2006; afropen an’n 12. Januar 2008
  6. ↑ The games people play with names, Boston.com, 10. Februar 2005; afropen an’n 2. Oktober 2007.
  7. ↑ Ende der letzten „Lost“-Staffel: Welche Rätsel wurden wie gelöst? Spiegel Online
  8. ↑ „Cast Away“ vun David Bernstein, Chicago Magazine, August 2007; afropen an’n 6. November 2011
  9. ↑ a b The man who discovered ‚Lost‘ – and found himself out of a job vun Olga Craig, The Daily Telegraph vun’n 14. August 2005; afropen an’n 22. August 2011
  10. ↑ When Stephen King met the 'Lost' boys… vun Jeff Jensen; afropen an’n 24. November 2007
  11. ↑ Ryan, Tim, „New series gives Hawaii 3 TV shows in production“, Honolulu Star-Bulletin, 17. Mai 2004
  12. ↑ Spiegel Online: „Wir schreiben ‚Lost‘ für unsere Mütter“ vun’n 29. November 2006, afropen an’n 12. Januar 2008
  13. ↑ a b EW.com – 'Lost' in Transition, afropen an’n 12. Januar 2008
  14. ↑ Serienjunkies: „Lost: 2010 mit würdigem Finale“, afropen an’n 12. Januar 2008
  15. ↑ fictionBOX: „‚LOST‘: Zusätzliche Folge für Staffel 4 bestellt!“
  16. ↑ Find815.com, offizielle Promo-Websteed to’n Start vun de veerten Staffel; afropen an’n 1. Januar 2008.
  17. ↑ „Best of 2005“, Metacritic.com; anfropen an’n 19. Juli 2009.
  18. ↑ Steven Simunic: „Why ABC’s ‘Lost’ Is Losing It“, an’n 15. März 2007; afropen an’n 19. Juli 2009.
  19. ↑ Scott D. Pierce: „Is 'Lost' found?“, Deseret News, den 23. Mai 2007; afropen an’n am 19. Juli 2009.
  20. ↑ „Lost“-Finale: Großes Epos, kleines Glück Spiegel Online; afropen an’n 2. Dezember 2014
  21. ↑ How will Lost end? guardian.co.uk; afropen an’n 2. Dezember 2014
  22. ↑ Jürgen Schmieder: „Verspätet, versteckt, verheizt“, Sueddeutsche.de, an’n 21. Januar 2009, afropen an’n 19. Juli 2009.
  23. ↑ Christian Stöcker:„Lost“-Finale: Großes Epos, kleines Glück, Spiegel Online, an’n 25. Mai 2010; afropen an’n 26. Juli 2010
  24. ↑ faz.net: „Serien als Stresstest“ vun’n 3. Februar 2012; afropen an’n 17. April 2012.
  25. ↑ DocArzt.com, 22. Januar 2008; afropen an’n 6. Mai 2008.
  26. ↑ „No winning ticket found with Lost numbers.“ in: Pittsburgh Tribune-Review vun’n 19. Juni 2005; afropen an’n 6. November 2011
  27. ↑ „Lost Numbers Lose Millions.“ vun Gina Serpe op Eonlone.com, 20. Oktober 2005; afropen an’n 6. Oktober 2011
  28. ↑ Hannah Pilarczyk, Christian Stöcker, Konrad Lischka un Andreas Borcholte: „Lost“-Blog, Spiegel Online, toletzt aktualiseert an’n 19. Mai 2010; afropen an’n 26. Juli 2010.

Weblenken

ännern
  Lost. Mehr Biller, Videos oder Audiodateien to’t Thema gifft dat bi Wikimedia Commons.
Vun „https://nds.wikipedia.org/w/index.php?title=Lost_(Feernsehreeg)&oldid=1008567“