Louis Biester

düütsch Politiker

Louis Biester (* 3. August 1882 in Wenn’n; † 16. Juni 1965 in Königsmoor) weer en düütschen Politiker von de SPD.

Biester is 1882 in Wenn’n as Söhn von Dorothea Marie, borene Helfers (1845-1887), un den Buur Heinrich Friedrich Biester (22. November 1842-1. Februar 1902) boren.[1] He weer von 1888 af an op de Volksschool in Wenn’n un von 1896 bet 1899 op de Präparandenanstalt Wunsdörp. Biester weer denn von September 1899 bet September 1902 op dat Lehrerseminar in Stood.

He hett von’n 1. Oktober 1903 bet April 1906 as tweten Schoolmeester an de Volksschool in Intschen arbeidt un an’n 15. Dezember 1905 sien twete Lehrerprüfung in Stood maakt. In’n April 1906 güng he as Schoolmeester na Hamborg un hett in Allermöh leevt. To’n 1. April 1907 hett he en faste Steed an de Volksschool Seilerstraat kregen. 1912 is he in de SPD rin. Von August 1914 bet 1916 weer he in’n Eersten Weltkrieg Soldaat in dat Ersatzbataillon Res. 31 in Rendsborg. 1919 is he in Hamborg ok Landsvörsitter von’n Sozialistischen Schoolmeesterbund worrn. Von April 1919 af an hett he in Hoisbüttel in’n Kreis Stormarn wahnt.

An’n 27. Juni 1933 is Biester von de Natschonalsozialisten in Schutzhaft nahmen worrn un is bet Januar 1934 in Haft bleven. He weer in disse Tied in dat KZ Lichtenburg. He is as Schoolmeester rutsmeten worrn un güng denn na Wenn’n. Von 1934 bet 1936 is he toeerst as Händler för Kaffe, Tee, Kakao, Honnig un Zigarrn över de Öörd tagen un hett denn von 1936 bet üm de Tied Wiehnachten 1939 rüm en Laden för Zigarrn in Neenborg hatt. Von 1. April 1940 af an hett he en Buurnhoff in Düvelsmoor pacht hatt. Na’n Anslagg von’n 20. Juli 1944 is Biester in de Aktion Gewitter wedder in Haft kamen un dor bet an dat Enn von’n Tweten Weltkrieg bleven. Nadem de Pachtverdrag in Düvelsmoor aflopen is, is he in’n Oktober 1952 na Königsmoor tagen un hett dor bet to sien Dood 1965 leevt.

Von 1920 bet 1933 weer Biester Kreisdagsafornten in’n Kreis Stormarn un von 1921 bet 1925 Afornten in’n Provinziallanddag Sleswig-Holsteen. Von 1948 bet 1952 weer he Kreisdagsafornten in’n Landkreis Oosterholt. As Nafolger von Karl Frohme weer he von 1924 bet 1933 för Sleswig-Holsteen Afornten in’n Rieksdag.

Biester weer 1920 bet 1933 Amtsvörsteher in Hoisbüttel. In de Tied von’n Kapp-Putsch in’n März 1920 hett Biester mit 1.500 Putsch-Gegners de Kreisverwaltung in’n Kreis Stormarn gegen de Putschisten verdedigt un stünn in disse Tied sülvs an de Spitz von’n Kreisutschuss. An’n 15. März 1946 is Biester von de Briten as Landraad in’n Landkreis Oosterholt insett worrn un hett dat Amt bet to’n 31. Oktober 1946 behollen.

1949 weer he Kannedaat för de SPD in’n Bundsdagswahlkreis Veern-Rodenborg-Oosterholt, kunn sik aver nich gegen Hans-Joachim von Merkatz von de DP dörsetten.

An’n 31. Januar 1954 hett Biester dat Verdeenstkrüüz von de Bundsrepublik Düütschland kregen.

Biester hett an’n 7. Juli 1910 in Allermöh Auguste Doris Magdalena Tessloff (27. Juni 1890-10. Februar 1973) freet. De beiden hebbt den Söhn Rudolf (16. August 1915-7. Oktober 2000) un de Dochter Gertrud (* 19. September 1919) hatt.

Footnoten ännern

  1. Biografie von Biester von Hans-Jürgen Perrey