Maio

Maio (vullst. Ilha do Maio vun’t port. maio „Mai“) is en Eiland in’n Atlantik. Dat is een vun de negen bewahnten Eilannen vun Kap Verde.

Geografie

Dat Eiland Maio tellt to de Grupp vun de Ilhas de Sotavento („Eilannen ünnern’n Wind“ oder „Eilannen af vun’n Wind“), de all süüdlich Eilannen vun Kap Verde tohopenfaat. Togliek höört se aver ok to de ööstlichen Eilannen, de sik vun de Landschap her teemlich liek sünd. Maio liggt in’n Oosten vun dat Hööfteiland Santiago un in’n Süüdwesten vun Boa Vista. Dat Eiland hett en Flach vun ruchweg 260 km².

Landschap

Dat Eiland is to’n gröttsten Deel Wööst, de op en Kalksteensockel opsitten deit. Dat Land is flach un even un warrt blots vun en poor olle Vulkansloten dörbroken, de lang nich mehr aktiv un al teemlich verweddert sünd. De hööchste dorvun is de Monte Penoso mit üm un bi 436 m opfolgt vun’n Monte Batalha mit 294 m un den Monte Branco mit 265 m^[1]. Intressante Steden sünd de Westen un de Noorden. In’n Westen liggt dat Feriendörp Morro, dat mit sien Palmbööm un sien feinen Sandstränn ok Touristen antehn deit. Wieter na Noorden achter den Oort Calheta liggt en lütt Wooldrebeet mit Akazienbööm, dat twüschen 1966 un 1974 dör Opforsten entstahn is^[1]. Noch wieter na’n Noorden liggt Terra Salgadas, en Even, de över’n grote Flach mit Solt bedeckt is un en natürlich Salien dorstellt.

Öörd un Städer

Koort vun Maio

Op Maio leevt ruchweg 6.800 Minschen.^[2]. De Hälft dorvun leevt in de Hööftstadt vun’t Eiland Vila do Maio, woneem ok de Verwalten ehrn Sitt hett. Vun wegen de lütte Inwahnertall is Maio nich wieter in Gemenen ünnerdeelt. Vila do Maio is ok afsehn vun de Grött de wichtigste Stadt op Maio, nich opletzt, wieldat dor de Haven liggt, över den dat Eiland mit Nehrmiddel un annere Göder versorgt warrt. In de Neeg liggt ok de Flaaghaven, de aver blots för’n natschonalen Flaagverkehr bruukt warrt.

De restlichen Inwahners verdeelt sik op en ganze Reeg vun Dörper un Wahnsteden, wovun de meisten in’n Oosten to finnen sünd. An de Westküst föhrt en Straat von Vila do Maio na Morro un över Calheta wieter na Morrinho. Vun dor kann een wieter in de nöördlichen Dörper Porto Cais, Cascabulho, Santo Antônio, Praia Gonçalo un Pedro Vaz kamen, de butenste Noorden is aver nich bewahnt. Vun Vila do Maio föhrt en wietere Straat na de süüdlichen Dörper Figueira da Horta un Figueira Seco, Barreiro, Lagoa un Ribeira Dom João. Opletzt leegt in’n Oosten de beiden Öörd Alcatraz un Pilão Cão.

Historie

De Naam vun dat Eiland, Maio, is dat portugeesche Woort för den Maand Mai. De is affleddt vun’n Dag, as dat Eiland opdeckt weer, neemlich an’n 1. Mai 1460. Korte Tiet later weern halfnomaadsch Harderslaven op Maio ansiedelt, de in’n Opdrag vun’t portugeesche Königshuus Veehtüüch hollen müssen, üm de Slavenscheep ut Cidade Velha mit Fleesch un Hüüd to versorgen. Wiel dat 16. Johrhunnert keem de Anbo vun Boomwull dorto un en Deel vun de Inwahners hebbt sik denn daallaten.

Fien wevt Döker (panos de Santiago) sünd dormols en weertvull Good to’n Tuschen in Kontinentalafrika wesen un sünd vör allen bruukt worrn, üm wietere Slaven to köpen. As Santiago in’t 17. Johrhunnert sien Vörmachtpositschoon verloren harr, sünd op Maio de natürlich Salinen utboot worrn, wat fre’e Siedlers natogen hett. Dat portugeesche Königshuus hett denn in den Hööftoort Vila do Maio, dat dunntomalen (bit 1975) Porto Inglês heten hett, en lütte Fasten mit enige Kanonen boen laten, eenmol üm för Piratenangrepen Schuul to geven, to’n annern ok ün de Englänner, de den Solthannel beherrscht hebbt, to’n Betahlen vun Stüern to bewegen.

Jüst as ok annere Eilannen vun Kap Verde, is ok Maio mehrmols vun Hungerkatastrophen plaagt worrn. Mitünner weer dat so gresig, dat de fre’en Minschen dwungen weern, sik sülvst as Slaven na Amerika to verköpen. As Naklapp vun’n Minnern vun’n Solthannel un mit tonehmen Dröög Anfang vun’t 20. Johrhunnert, geev dat en anhollen Utwannern. Dat Överleven op Maio müss na de Unafhangigkeit vun de Kapverden in’t Johr 1975 dör Arbeitsprogrammen in’n Stratenbo un dör Wedderopforsten sekert warrn.

Weertschap

Dat Inkamen op Maio warrt vör allen dör düchtig Veehtucht, Fischeree un Kunsthandwark (Keramik) bestreden. Faken kriegt de Familien, de op Maio leevt, Ünnerstütten vun Anhöörige ut Praia oder ut Översee.

Dat Eiland hett mit sien kilometerlangen fienen Sandstränn un natürlichen felsigen Küstenlienen grote Möglichkeiten för den Tourismus, dat opstunns aver kuum nütt warrt. Dat kummt ünner annern, wieldat de Transport vun Watersportredschoppen noch teemlich swor to maken is.

Bornen

↑ ^a ^b Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0
↑ http://www.sodade.de/maio.htm

Eilannen vun Kap Verde

[dumont-1] Kapverdische Inseln, Dumont Reisetaschenbuch, 3. Oplaag, 2007, ISBN 978-3-7701-5968-0

[2] ttp://www.sodade.de/maio.htm

[1]

[2]