Mairie Freeborg

De Mairie Freeborg weer in de Franzosentied (1810 bet 1813) een von de fiev Mairien, in de de Kanton Freeborg indeelt weer. De Seet weer in Freeborg. Se harr 2911 Inwahners.

Historie

De Ümgegend von Freeborg hett vör de Franzosentied to dat Grevengericht Freeborg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Freeborg een von de söss Mairien in’n Kanton Freeborg von’n Distrikt Stood, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Freeborg weer nu een von de fiev Mairien in’n Kanton Freeborg, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Freeborg, Allwöörden, Stellenfleet un Eggerkamp (all veer in’n Kanton Freeborg) höört harrn. Von de Mairie Eggerkamp is blots de Oort Eggerkamp in de Mairie Freeborg wesselt. De Oort Riddershusen is an de Mairie Balje gahn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Freeborg

• Kaiserriek Frankriek:

  Freeborg (799 Inwahners), Allwöörden, Schöönworth (1030 Inwahners), Stellenfleet, Oosterwechtern (718 Inwahners), Eggerkamp (384 Inwahners)

Vondaag sünd düsse Öörd Deel von de Samtgemeen Noordkeden.