Mairie Kerkboitzen

Mairie in de Franzosentied to Anfang dat 19. Johrhunnert

De Mairie Kerkboitzen weer in de Franzosentied (1810 bet 1813) een von de dree Mairien, in de de Kanton Rethen indeelt weer. De Seet weer in Kerkboitzen. Se harr 1963 Inwahners.[1]

Historie ännern

De Ümgegend von Kerkboitzen hett vör de Franzosentied to dat Amt Rethen in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Kerkboitzen een von de 13 Mairien in’n Kanton Hudemöhlen von’n Distrikt Veern, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Kerkboitzen weer nu een von de dree Mairien in’n Kanton Rethen, Distrikt Neenborg, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söss Mairien höört harrn: de Mairien Kerkboitzen, Olenwahlje un Olenboitzen ut’n Kanton Rethen, de Mairie Noordcampen ut’n Kanton Wasra un de Mairien Vethem un Groten Eisderp ut’n Kanton Hudemöhlen. Von de Mairie Olenwahlje is Olenwahlje sülvs an de Mairie Rethen fullen. Blots de Oort Böhm is an de Mairie Kerkboitzen kamen. Von de Mairie Noordcampen is Noordcampen sülvs an de Mairie Kerkboitzen gahn un de Rest an de Mairie Stellich.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd ännern

Dor hebbt düsse Öörd tohöört:

Vondaag sünd düsse Öörd Deel von de Samtgemeen Reten un de Stadt Wasra.

Footnoten ännern

  1. a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 113
  2. a b Bulletin des lois du Royaume de Westphalie. Königliche Bookdruckeree, Kassel 1810, Sied 24