Kanton Rethen

De Kanton Rethen weer as Kanton en Verwaltungsrebeed in de Franzosentied (1810-1813). De Seet weer Rethen.

Historie

Dat Rebeed weer vörher Deel von dat Förstendom Lümborg (Kurförstendom Hannover) un hett dor to dat Amt Rethen höört.

An’n 1. März 1810 hett de König von dat Königriek Westfalen, Hieronymus, kund daan, dat dat Kurförstendom Hannover Deel von sien Königriek warrt. Westfalen weer en Vasallenstaat von dat Franzöösche Kaiserriek, dat siet 1803 dat Kurförstendom besett hollen harr.

Binnen Westfalen weer de Kanton Rethen een von de ölven Kantons in’n Distrikt Veern von dat Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Kanton Rethen weer nu een von de acht Kantons, ut de de Distrikt Neenborg in dat Departement von de Wersermünnen tohoopsett weer. Dichtbi weer de Grenz von dat Franzöösche Kaiserriek na dat Königriek Westfalen.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor.