Mairie Worth

De Mairie Worth weer in de Franzosentied (1810 bet 1813) een von de veer Mairien, in de de Kanton Ritzbüttel indeelt weer. De Seet weer op de Worth. Se harr 2235 Inwahners.

Historie

De Worth hett vör de Franzosentied to Land Hadeln höört un dat Land ümto to dat Amt Noordholt un dat Vaagdiegericht Land Wusten in dat Hartogdom Bremen. Dat Land Hadeln un dat Hartogdom Bremen hebbt all beid in dat Kurförstendom Hannover legen. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Worth een von de söss Mairien in’n Kanton Oterndörp von’n Distrikt Stood, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Worth weer nu een von de veer Mairien in’n Kanton Ritzbüttel, Distrikt Stood, Departement von de Elvmünnen. De Mairie weer nu grötter, dor sünd Öörd in tohoopfaat worrn, de vörher in Westfalen to de twee Mairien Worth un Olenwoold (all beid in’n Kanton Oterndörp) höört harrn. Tosätzlich is dor noch de Oort Godendörp mit tokamen, de bet 1811 noch to dat hambörgsche Amt Ritzbüttel höört harr.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Worth, Franzenborg

• Kaiserriek Frankriek:

  Worth (1978 Inwahners), Olenwoold, Franzenborg, Godendörp (257 Inwahners)

Vondaag sünd düsse Öörd Deel von de Stadt Cuxhoben.