Marienkark (Himmelpoorten)

De Marienkark is en evangeelsch-luthersche Kark in Himmelpoorten. De Kark höört to’n Karkenkreis Stood in’t Sprengel Stood von de Landskark Hannover.

De hüdige Kark is 1738 op de Resten von de ole Kloosterkark von dat Zisterzienser-Klooster Himmelpoorten boot worrn. Blots en Deel von de Noordmüür hebbt se in de ne’e Kark wedder mit inboot. Dat Klooster harr vörher siet 1255 bestahn un is 1580 luthersch worrn.

Örgel

De Örgel is 1587 bet 1590 von Hans Scherer un Antonius Wilde boot worrn un hett toeerst in de Nicolai-Kark in Stood stahn. 1677 hett Arp Snitger ehr ümboot. Nadem 1834 de Nicolai-Kark dichtmaakt hett, hett Peter Tappe de Örgel köfft un Hööftwark, Bostwark un Pedal mit en neet Prospekt in Himmelpoorten opstellt. Dat Rüggpositiv is na de Petrus-Kark in Kerklinneln kamen. 1955/1956 is de Örgel denn noch wedder von Paul Ott ümboot un 1987 von Alfred Führer utbetert worrn.

Binnen

Den Altor mit Preddigstohl un Priechen an de Sieden hett 1737/1738 Joachim August Relling boot.

Binnen gifft dat blangen en Epitaph för de Äbtissin Maria von Weyhe († 1616) ok noch 15 Passionsbiller. De Biller stammt ok ut de Nicolai-Kark in Stood.

Kaspel

To dat Kaspel Himmelpoorten höört de Öörd Himmelpoorten, Düünbeudel (siet 1895, vörher Kaspel Olendörp), Wittenmoor, Middelsdörp, Groot-Steernbarg, Hammah un Hammahermoor to.

De Naverkaspels sünd Host un Grootweurn in’n Noordwesten, Drochters in’n Noorden, Aßel un Bützfleet in’n Noordoosten, St. Cosmae in Stood in’n Oosten, St. Markus in Stood in’n Süüdoosten un Olendörp in’n Süüdwesten.

Pastoorn

-1563: Peter Schlichting
1839-1851: Friedrich Eickenrodt

Steed I:

1978-Juni 2011: Udo Garve
2011-: Rainer Klemme

Steed II:

-Februar 2011: Uwe Baumhauer
2011: Ines Bauschke (övergangswies)
2011-: Christian Plitzko

Weblenken

Marienkark in Himmelpoorten. Mehr Biller, Videos oder Audiodateien to’t Thema gifft dat bi Wikimedia Commons.

Websteed von de Karkengemeen (hoochdüütsch)

Koordinaten:53° 37′ N, 9° 18′ O