Kerklinneln
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | 2.523 (2004) | |
| Hööchd: | 41 m över NN | |
| Postleettall: | 27308 | |
| Vörwahl: | 04236 | |
| Geograafsche Laag: | Koordinaten:52° 56′ N, 9° 19′ O52° 56′ N, 9° 19′ O | |
|
| ||
Kerklinneln (hoochdüütsch Kirchlinteln) is en Dörp in de Gemeen Kerklinneln in’n Landkreis Veern, Neddersassen. Binnen de Gemeen Kerklinneln billt de Oort Kerklinneln en egene polietsche Oortschop, to de ok Hoost, Lindhoop un Deelsen mit tohöört.
Geografie
ännernDe Oort liggt op de Linnelner Geest. Dör’n Oort flütt de Gibbeek, de later in’n Gohbeek münnt.
De Naveröörd sünd Deelsen un Holbm in’n Noorden, Brammer, Kreepm un Lüttjen Linneln in’n Noordoosten, Huxhaal, Kohlenföör, Neenkroog un Gohbeek in’n Oosten, Kükenmoor, Neenföör un Ramels in’n Süüdoosten, Specken, Armsen un Wetenmöhlen in’n Süden, Bössel in’n Süüdwesten, Lindhoop, Hoost un Oosterkroog in’n Westen un Scharnhors un Wall in’n Noordwesten.
Historie
ännern
Kerklinneln kummt 1123 as Lintlo toeerst in de Oorkunnen vör. Von de Kerke to Lintloh warrt toeerst 1385 in en Oorkunn von’n Veerner Bischop Johann II. schreven. In fröhere Tieden is de Oort mehrstendeels eenfach Linneln nöömt worrn. Blots wenn de Ünnerscheed to dat Dörp Lüttjen Linneln wichtig weer, is de Oort Groten Linneln oder eben Kerklinneln nöömt worrn.
Verwaltungsgeschicht
ännernIn de Franzosentied von 1810 bet 1814 hett de Oort to de Mairie Kerklinneln in’n Kanton Veern höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Vaagdie Kerklinneln in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem to’n ne’en un grötteren Kreis Veern tohoopgahn is.
De Gemeen Kerklinneln bestünn fröher blots ut dat Dörp Kerklinneln mit de twee lüttjen Öörd Hoost un Lindhoop. An’n 1. Juli 1968 is ok de vörher egenstännige Gemeen Deelsen Deel von de Gemeen Kerklinneln worrn. Eerst an’n 1. Juli 1972 mit de Gemeenreform in Neddersassen sünd 17 Gemenen to de ne’e Gemeen Kerklinneln tohoopslaten worrn, de denn düüdlich grötter weer as vörher. Sietdem billt de ole Gemeen Kerklinneln (mit Deelsen) binnen de ne’e Gemeen Kerklinneln en Oortschop mit egen Oortsvörsteiher.
Inwahnertall
ännern| Johr | Inwahners |
|---|---|
| 1791[1] | 19 Füürsteden |
| 1812[2] | 211 |
| 1824[3] | 23 Füürsteden |
| 1848[4] | 259 Lüüd, 43 Hüüs |
| 1. Dezember 1871[5] | 344 Lüüd, 49 Hüüs |
| 1. Dezember 1885[6] | 479 Lüüd, 80 Hüüs |
| 1. Dezember 1905[7] | 544 Lüüd, 100 Hüüs |
| 1. Dezember 1910[8] | 616* |
| 1925[9] | 691* |
| 1933[9] | 745* |
| 1939[9] | 678* |
- * tohoop mit Hoost un Lindhoop
Religion
ännern
Kerklinneln is evangeelsch-luthersch präägt un billt mit de Petrus-Kark en egen Kaspel.
För de Kathoolschen is de St.-Josef-Kark in Veern tostännig.
Oortsvörsteihers
ännern| Tied | Naam | Partei |
|---|---|---|
| –2011 | Bernd Maas | SPD |
| 2011– | Joachim Köhler | CDU |
Kultur
ännernDen Rövenmarkt gifft dat in Kerklinneln siet 1660. He is jümmer an dat letzte Wekenenn in’n September.
Verenen
ännernDe Schüttenvereen Kerklinneln is in’n Mai 1880 grünnt worrn. De Turn- un Sportvereen (TSV) Kerklinneln is 1920 grünnt worrn.
Weertschop un Infrastruktur
ännernKerklinneln hett en egene freewillige Füürwehr, de in’n April 1884 grünnt worrn is.
Verkehr
ännernDör Kerklinneln löppt de Landsstraat 171, de in’n Süüdwesten na Veern geiht un in’n Noordoosten över Jeddingen na Visselhöövd. En Reeg Kreisstraten gaht von de L 171 af: na Noorden de K 21 na Deelsen un Holbm, na Noordoosten de K 18 na Brammer, Kreepm, Lüttjen Zähln un Groten Zähln, na Süüdoosten de K 12 na Kükenmoor un na Süden de K 21 na Wetenmöhlen un Lutten. Lüttjere Straten loopt ans noch na Scharnhors un Specken.
De nächste Autobahn is de Autobahn 27 (Afsnidd Bremen–Wasra). De Opfohrt 26 Veern-Oost liggt dree Kilometer in’n Süüdwesten von Kerklinneln an de L 171.
De nächste Bahnhoff is so bi söss Kilometer wied weg in’n Süüdwesten de Bahnhoff Veern an de Bahnlien Wunsdörp–Bremen. Disse Bahnhoff is ok inbunnen in dat Nett von de Regio-S-Bahn Bremen/Neddersassen. De Bahnhoff Kerklinneln an de Bahnlien Ülzen–Langwedel, de an’n 15. April 1873 apenmaakt harr, is 1987 dichtmaakt worrn.
Scholen
ännernKerklinneln harr fröher en egen Volksschool. Vondaag gaht de Kinner op de Lintler Geest-School in Bennbössel.
Literatur
ännern- Robert Kienzle: Chronik Kirchlinteln. 1969
Footnoten
ännern- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 143
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 100
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 376
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 155
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 164
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 174
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 180
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Armsen | Bennbössel | Brouk | Heinz | Hogenabargen | Holbm | Kerklinneln | Kreepm | Kükenmoor | Lutten | Neernabargen | Odersen | Schepinkel | Zähln | Stemmen | Wetenmöhlen | Wittloh