Michael Morris Rosbash

Michael Morris Rosbash (* 7. März 1944 in Kansas City, Missouri) is en US-amerikaansch Molekular- un Chronobioloog un Perfesser an de Brandeis University in Waltham, Massachusetts. 2017 wurr hüm gemeensam mit Jeffrey Connor Hall un Michael Warren Young de Nobelpries för Physiologie oder Medizin tospraaken.

Michael Rosbash

Leven

De Öllern vun Michael Rosbash weern jöödsch Flüchtlinge un mussen 1938 Düütschland verlaaten. De Familie truck vun Kansas City nah Boston, Massachusetts, as Michael noch en lütt Kind weer. Rosbash hett Chemie an dat California Institute of Technology (Caltech) in Pasadena, Kalifornien studeert. Nah en Praktikum bi Norman Davidson fung he aber an, sück mehr för Biologie to interesseeren. Rosbash hett 1965 den Bachelor-Afsluss maakt. Nah een Johr as Fulbright-Stipendiat an dat Institut de biologie physico-chimique in Paris gung he an dat Massachusetts Institute of Technology (MIT) in Cambridge, Massachusetts, wo he 1970 sien Doktertitel (Ph.D.) in Biophysik maakt hett. As Postdoktorand hett Rosbash dornah an de University of Edinburgh in Schottland arbeit. Siet 1973 hörrt he to den Lehrkörper vun de Brandeis University in Waltham. Aktuell (Stand 2011) is he dor Perfesser för Biologie un Direkter vun dat National Center for Behavioral Genomics (Natschonale Zentrum för Verhollensgenetik). Rosbash hett dorto noch en Professur för Molekularbiologie an dat Massachusetts General Hospital vun de Harvard University in Boston. Siet 1989 forscht Rosbash tosätzlich för dat Howard Hughes Medical Institute (HHMI).

Wirken

Rosbash hett herutragen Bidrääg to dat Utforschen vun de RNA-Prozesseren un de zirkadianen Rhythmik leist. Gemeensam mit Jeffrey Connor Hall kunn Rosbash 1984 eerstmals mit period en „Verhaltensgen“ vun de zirkadianen Rhythmik kloneeren. Hör Arbeiten hemm in de Folge to de Identifizeeren un Funktschonsanalyse vun de Proteine führt, de de biologische Klock vun de Fruchtfleeg (Drosophila melanogaster) togrunnen liggen. Hall un Rosbash hemm en negative Rückkopplung vun de Transkriptschoon as Mechanismus vun disse biologische Klock vörslahn. Dat Modell is wiederhen gültig un kunn up all Levewesen insluutend den Minschen överdragen wurrn. De Chronotherapie gellt as potentielle Anwennen vun de Forschungsergevnisse bi Menschen mit Slaapstörungen. Nee Arbeiten vun Rosbash befaaten sück mit de Betrecken vun de Träemaker vun de biologische Klock bi Fruchtfleegen mit deb Wessel vun Helligkeit un Dunkelheit as ok deren neuronale Schaltkreisen, de den Wessel vun Aktivität un Ruhe togrunnen liggen.

Utteknungen (Utwahl)

• 1988: Guggenheim-Stipendium
• 1997: Liddmaat American Academy of Arts and Sciences
• 2003: Liddmaat National Academy of Sciences
• 2007: Liddmaat (Fellow) in de American Association for the Advancement of Science
• 2009: Gruber-Pries för Neurowetenschapen (mit Jeffrey Connor Hall un Michael Warren Young)
• 2011: Louisa-Gross-Horwitz-Pries (mit Jeffrey Hall und Michael W. Young)
• 2012: Canada Gairdner International Award (mit Jeffrey Hall un Michael W. Young)
• 2012: Massry-Pries (mit Jeffrey Hall un Michael W. Young)
• 2013: Wiley Prize in Biomedical Sciences (mit Jeffrey Hall und Michael W. Young)
• 2013: Shaw Prize in Medizin (mit Jeffrey Hall un Michael W. Young)
• 2017: Nobelpries för Physiologie oder Medizin (mit Jeffrey Hall un Michael W. Young)

Weblenken

• Michael Rosbash, Ph.D., Rosbash Lab un Faculty Guide bi de Brandeis University (brandeis.edu)
• Bio un Research Abstract bi dat Howard Hughes Medical Institute (hhmi.org)